Read Malagasy Salamo 49 Bible Online

Salamo 49 - Malagasy bible

Salamo 49

¹Ho an'ny mpiventy hira. Nataon'ny Koraita. Salamo. Mandrenesa izao, ry firenena rehetra; mihainoa, ry mponina rehetra amin'izao tontolo izao:

²Na ny ambany, na ny ambony, na ny manan-karena, na ny malahelo.

³Ny vavako hiteny fahendrena; ary ny fieritreretan'ny foko dia fahalalana.

⁴Hanongilana ny sofiko hihaino oha-teny aho, ary hanonona teny saro-pantarina ampiarahiko amin-dokanga.

⁵Nahoana no hatahotra amin'ny andro fahoriana aho, nony manodidina ahy ny haratsian'ny mpamingana ahy,

⁶Dia izay matoky ny hareny, Sy mirehareha amin'ny haben'ny fananany?

⁷Tsy misy mahavotra ny rahalahiny akory, na mahazo manome an'Andriamanitra izay avony,

⁸(Fa sarotra avotra ny ainy ka tsy azo atao mandrakizay),

⁹Mba ho velona mandrakizay izy, ka tsy ho latsaka ao amin'ny lavaka.

¹⁰Fa hita fa maty ihany ny olon-kendry; ary ny adala sy ny ketrina samy levona, ka mamela ny fananany ho an'ny hafa.

¹¹Araka ny heviny dia ataony fa ho mandrakizay ny tranony, ary ny fonenany hahatratra ny taranaka fara mandimby; araka ny anarany no anononany ny taniny.

¹²Nefa na dia manana voninahitra aza ny olona, dia tsy maharitra izy; tahaka ny biby izay samy tsy maintsy ho faty izy.

¹³Izany no falehan'ny olona adala; ary ny taranany mandimby azy mankasitraka ny teniny.

¹⁴Tahaka ny fanangona ondry no fanangona azy any amin'ny fiainan-tsi-hita; ny fahafatesana no mpiandry azy; ary hanapaka azy ny mahitsy nony maraina; ary ny bikany ho levona any amin'ny fiainan-tsi-hita, ka tsy hisy fonenany.

¹⁵Fa Andriamanitra kosa hamonjy ny aiko amin'ny herin'ny fiainan-tsi-hita,3 satria handray ahy Izy.

¹⁶Aza matahotra ianao, raha misy olona tonga manan-karena, ka mitombo ny voninahitry ny tranony;

¹⁷Fa tsy hitondra na inona na inona izy, raha maty; tsy mba hidina hanaraka azy ny voninahiny.

¹⁸Na dia miarahaba tena aza izy, raha mbola velona - Fa hidera anao ny olona, raha manisy soa ny tenanao ianao -

¹⁹Dia hankany amin'ny razany izy, tsy hahita ny mazava intsony mandrakizay ireny.

²⁰Izay olona manana voninahitra, nefa tsy manan-tsaina, dia tahaka ny biby izay samy tsy maintsy ho faty.