Read Malagasy Salamo 50 Bible Online

Salamo 50 - Malagasy bible

Salamo 50

¹Salamo nataon i Asafa. Andriamanitra Andriananahary, dia Jehovah, no miteny ka miantso ny tany hatramin'ny fiposahan'ny masoandro ka hatramin'ny filentehany.

²Avy ao Ziona, izay tena fahatsaran-tarehy, no amirapiratan'Andriamanitra.

³Avy Andriamanitsika ka tsy hangina; afo no mandevona eo alohany, ary tafio-drivotra mahery no manodidina Azy.

⁴Miantso ny lanitra any ambony Izy, sy ny tany koa, mba hitsaràny ny olony:

⁵Angony etỳ amiko ny oloko masina izay manao fanekena amiko amin'ny fanatitra.

⁶Hasehon'ny lanitra ny fahamarinany; fa Andriamanitra no Mpitsara.

⁷Mihainoa, ry oloko, fa hiteny Aho; Ry Isiraely ô, fa hanambara aminao Aho; Izaho no Andriamanitra, dia Andriamanitrao.

⁸Tsy ny fanatitrao no ananarako anao, ary efa eo anatrehako mandrakariva ny fanatitra doranao.

⁹Tsy maka vantotr'ombilahy amin'ny tranonao Aho, na osilahy amin'ny valanao;

¹⁰Fa Ahy ny biby rehetra any an'ala, sy ny biby fiompy arivoarivo eny an-tendrombohitra.

¹¹Fantatro ny vorona rehetra eny an-tendrombohitra; ary eto amiko ny zava-mihetsiketsika eny an-tsaha.

¹²Raha mba noana Aho, dia tsy hilaza aminao; fa Ahy izao tontolo izao sy izay rehetra eo aminy.

¹³Hihinana ny nofon'ombilahy va Aho, na hisotro ny ran'osilahy?

¹⁴Manatera fanati-pisaorana ho an'Andriamanitra; ary efao amin'ny Avo Indrindra ny voadinao;

¹⁵Antsoy Aho amin'ny andro fahoriana, dia hamonjy anao Aho, ka hanome voninahitra Ahy ianao.

¹⁶Fa amin'ny ratsy fanahy kosa dia hoy Andriamanitra: ahoana no itorianao ny lalàko sy itondranao ny fanekeko eo am-bavanao?

¹⁷Fa ianao mankahala fananarana, ary arianao eo ivohonao ny teniko.

¹⁸Raha mahita mpangalatra ianao, dia faly hikambana aminy, ary miray anjara amin'ny mpijangajanga.

¹⁹Ny vavanao alefanao hiteny ratsy, ary ny lelanao mamorom-pitaka.

²⁰Mipetraka miteny ratsy ny rahalahinao ianao, sady manendrikendrika ny zanakalahin-dreninao.

²¹Izany no nataonao, nefa nangina ihany Aho, ka dia nataonao fa mitovy aminao ihany Aho! Hananatra anao Aho ka handahatra izany eo imasonao.

²²Mihevera izany ankehitriny, ianareo izay manadino an'Andriamanitra, fandrao hamiravira Aho, ka tsy hisy hamonjy.

²³Izay manatitra fanati-pisaorana no manome voninahitra Ahy; ary izay mitandrina ny lalany no hanehoako ny famonjen'Andriamanitra.