Read Malagasy Salamo 60 Bible Online

Salamo 60 - Malagasy bible

Salamo 60

¹Ho an'ny mpiventy hira Al-sho-shanedoth. Miktama nataon'i Davida hampianarana, fony izy nanafika an'i Mesopotamia sy Arama-zoba tamin'ny niverenan'i Joaba ka namelezany ny Edomita roa arivo amby iray alin-dahy teo amin'ny lohasahan-tsira. Andriamanitra ô, efa nanary sy nampihahaka anay Hianao; efa tezitra Hianao, velombelomy izahay.

²Efa nampihorohoro ny tany Hianao ka namaky azy; amboary izay rava aminy, fa mihozongozona izy.

³Efa nampahita ny olonao zava-tsarotra Hianao, ary efa nampisotro anay divay mampiraikiraiky.

⁴Efa notoloranao faneva ny matahotra Anao, hatsangany noho ny fahamarinana.

⁵Mba hahafahan'ny malalanao, dia vonjeo amin'ny tananao ankavanana aho, ka valio.

⁶Andriamanitra niteny tamin'ny fahamasinany hoe: hifaly Aho ka hizara an'i Sekema; ary ny lohasahan'i Sokota horefesiko;

⁷Ahy Gileada, Ahy koa Manase; ary aron'ny lohako Efraima tehim-panjakako Joda;

⁸Tavin-dranoko fanasana Moaba; Edoma no anipazako ny kapako; mihobia noho ny amiko, ry Filistia.

⁹Iza no hitondra ahy ho any an-tanàna mafy? iza no hitarika ahy ho any Edoma?

¹⁰Tsy Hianao va, Izay efa nanary anay, Andriamanitra ô. Sady tsy nivoaka niaraka tamin'ny antokon'ny miaramilanay, Andriamanitra ô?

¹¹Vonjeo amin'ny mpandrafy izahay; fa zava-poana ny famonjena ataon'ny olona.

¹²Andriamanitra no haherezantsika; fa Izy no hanitsakitsaka ny fahavalontsika.