Read Malagasy Salamo 73 Bible Online

Salamo 73 - Malagasy bible

Salamo 73

¹Salamo nataon'i Asafa. Andriamanitra mahasoa ny Isiraely tokoa, dia ny madio fo.

²Fa izaho, dia saiky nibolasitra ny tongotro; saiky solafaka ny diako,

³Satria nialona ny mpirehareha aho, raha nahita ny fiadanan'ny ratsy fanahy.

⁴Fa tsy misy fanaintainana amin'ny fahafatesany, ary fatratra ny heriny.

⁵Tsy mba misy manavesatra azy, tahaka ny olona sasany, ary tsy mba azom-pahoriana tahaka ny olon-kafa izy.

⁶Dia izany no iambozonany rehareha toy ny rojo, sy itafiany fahalozàna tahaka ny lamba.

⁷Bongon-tavy ny masony; miloatra ny hevitry ny fony.

⁸Manazimbazimba izy ka miresaka fampahoriana an-dolom-po; avo vava izy.

⁹Manao vava manakatra ny lanitra izy, ary ny lelany mandeha mitety ny tany.

¹⁰Izany no itodihan'ny olony hankany aminy; ary rano be no gohin'ireny;

¹¹Ka hoy izy: Hataon'Andriamanitra ahoana no fahalala? ary manam-pahalalana va ny Avo Indrindra?

¹²Indro, ireny dia olona ratsy fanahy; miadana mandrakariva izy ka mitombo harena.

¹³Foana mihitsy ny nanadiovako ny foko sy ny nanasàko ny tanako tamin'ny fahamarinana.

¹⁴Azom-pahoriana mandritra ny andro aho, ary faizana isa-maraina.

¹⁵Raha tahìny aho nanao hoe: Hiteny izany aho, dia ho namitaka ireo zanakao.

¹⁶Dia nieritreritra ta-hahalala izany zavatra izany aho, kanjo sarotra teo imasoko izany.

¹⁷Mandra-piditro tao amin'ny fitoera-masin'Andriamanitra ka nihevitra izay ho farany.

¹⁸Eo amin'izay mahasolafaka tokoa no ametrahanao azy, ary aripakao ho ringana izy.

¹⁹Hià! rava indray mipi-maso izy! levona izy, matin-java-mahatahotra izy!

²⁰Tahaka ny anaovan'ny olona ny nofiny ho tsinontsinona, dia tahaka izany, Tompo ô, no anaovanao ny endrik'ireny ho tsinontsinona, raha mifoha Hianao.

²¹Raha lotika ny foko, ka voatsindrona ny voako,

²²Dia ketrina aho ka tsy nahalala; eny, biby teo anatrehanao aho.

²³Nefa izaho dia eo aminao ihany mandrakariva, mihazona ny tanako ankavanana Hianao.

²⁴Ny saina omenao no hitondranao ahy, ary rehefa afaka izany, dia horaisinao ho amin'ny voninahitra aho.

²⁵Iza no ahy any an-danitra? ary tsy misy etỳ ambonin'ny tany iriko tahaka Anao.

²⁶Na dia levona aza ny nofoko sy ny foko, dia mbola vatolampin'ny foko sy anjarako mandrakizay Andriamanitra.

²⁷Fa, indro, very izay lavitra Anao; aringanao izay rehetra mijangajanga mahafoy Anao.

²⁸Fa, izaho, dia ny ho akaikin'Andriamanitra no mahatsara ahy; Hianao, Jehovah Tompo ô, no nataoko aroko, mba hilaza ny asanao rehetra aho.