Read Malagasy Salamo 80 Bible Online

Salamo 80 - Malagasy bible

Salamo 80

¹Ho an'ny mpiventy hira. Al-shoshanim-edoth. Salamo nataon'i Asafa. Ry Mpiandry ny Isiraely ô, mihainoa, Hianao Izay mitondra an'i Josefa toy ny ondry; Hianao, Izay mipetraka amin'ny kerobima, mamirapiratra.

²Fohazy ny herinao eo anoloan'i Efraima sy Benjamina ary Manase, ka avia hamonjy anay.

³Andriamanitra ô, ampodio izahay, ka ampamirapirato ny Tavanao, ary aoka hovonjena izahay.

⁴Jehovah, Andriamanitry ny maro ô, mandra-pahoviana no hanetroka amin'ny fivavaky ny olonao ny fahatezeranao?

⁵Mampihinana azy mofo len-dranomaso Hianao, ary mampisotro azy ranomaso tovozina.

⁶Ataonao ho fifandirana amin'ny mifanila fonenana aminay izahay; ary ny fahavalonay mifaly handatsa.

⁷Andriamanitry ny maro ô, ampodio izahay, ka ampamirapirato ny tavanao, ary aoka hovonjena izahay.

⁸Nisy voaloboka nafindranao avy tany Egypta; nandroaka ny jentilisa Hianao ka namboly azy kosa.

⁹Nitevy teo alohany Hianao, dia namaka lalina izy ka nameno ny tany.

¹⁰Nanaloka ny tendrombohitra ny alokalony, ary ny sampany nanaloka ny sedera andrian-kazo.

¹¹Nampisandrahaka ny rantsany hatramin'ny ranomasina izy, ary ny sakeliny hatramin'ny Ony.

¹²Nahoana no noravànao ny fefiny ka anotazan'izay rehetra mandalo eny an-dalana izy?

¹³Ny lambo avy any an'ala mitrongy azy; ary izay bibi-dia any an-tsaha mandàny azy.

¹⁴Ry Andriamanitry ny maro ô, miverena, ka tsilovy any an-danitra, ary jereo, ka vangio ity voaloboka ity.

¹⁵Arovy izay nambolen'ny tananao ankavanana sy ny zanaka izay nampaherezinao ho Anao.

¹⁶Voadotry ny afo izy sady voakapa; fongotry ny fananaran'ny tavanao izy.

¹⁷Aoka ny tananao ho amin'ny lehilahin'ny tananao ankavanana, dia amin'ny zanak'olombelona izay nampaherezinao ho Anao.

¹⁸Dia tsy hihemotra hiala aminao izahay; velomy izahay, dia hiantso ny anaranao.

¹⁹Ry Jehovah, Andriamanitry ny maro ô, ampodio izahay; ampamirapirato ny tavanao, ary aoka hovonjena Izahay.