Read Malagasy Salamo 85 Bible Online

Salamo 85 - Malagasy bible

Salamo 85

¹Ho an'ny mpiventy hira. Salamo nataon'ny Koraita. Jehovah ô, efa naneho fitia tamin'ny taninao Hianao, Efa nampodinao Jakoba avy tamin'ny fahababoany.

²Voaisotrao ny heloky ny olonao, Voasaronao ny fahotany rehetra.

³Efa nampijanona ny fahatezeranao rehetra Hianao, Ary niala tamin'ny fahatezeranao mirehitra.

⁴Miverena aminay, ry Andriamanitry ny famonjena anay ô, Ary ampitsaharo ny fahatezeranao aminay.

⁵Ho tezitra aminay mandrakizay va Hianao? Hampaharetinao hahatratra ny taranaka fara mandimby va ny fahatezeranao?

⁶Tsy hovelominao indray va izahay, Mba hifalian'ny olonao aminao?

⁷Asehoy anay ny famindram-ponao, Jehovah ô, Ka omeo anay ny famonjenao.

⁸Hihaino izay holazain'i Jehovah Andriamanitra aho; Fa hilaza fiadanana amin'ny olony Izy, dia amin'ny olony masina; Koa aoka tsy hiverina ho ao amin'ny fahadalana ireo.

⁹Eny tokoa, akaikin'izay matahotra Azy ny famonjeny, Mba hitoeran'ny voninahitra eo amin'ny tanintsika.

¹⁰Mihaona ny famindram-po sy ny fahamarinana; Mifanoroka ny rariny sy ny fihavanana.

¹¹Ny fahamarinana mitsimoka amin'ny tany; Ary ny rariny mitsinjo eny an-danitra.

¹²Eny, Jehovah hanome ny tsara Ary ny tanintsika hahavoka-javatra.

¹³Ny rariny no hialoha Azy, Sady hizotra hanaraka ny diany eny an-dalana.