Read Malagasy Salamo 91 Bible Online

Salamo 91 - Malagasy bible

Salamo 91

¹Ny mitoetra ao amin'ny fierena izay an'ny Avo Indrindra Dia monina eo ambanin'ny aloky ny Tsitoha.

²Izaho hilaza an'i Jehovah hoe: Fialofako sy batery fiarovana ho ahy Izy Ary Andriamanitro, Izay hitokiako.

³Fa Izy no hanafaka anao amin'ny fandriky ny mpihaza sy ny areti-mandoza.

⁴Ny volon'elany no anaronany anao, Ary ao ambanin'ny elany no hialofanao; Ho ampinga kely sy ampinga lehibe ny fahamarinany.

⁵Tsy hatahotra ny horohoro nony alina ianao, Na ny zana-tsipìka manidina nony andro,

⁶Na ny areti-mandringana mandeha amin'ny maizina, Na ny fandringanana mandripaka amin'ny mitataovovonana.

⁷Na dia hisy arivo aza lavo eo anilanao sy iray alina eo an-kavananao, Dia tsy hihatra aminao izany

⁸Hijery maso fotsiny ianao,Ka ho hitanao ny hamaliana ny ratsy fanahy.

⁹Satria hoy ianao: Jehovah ô, Hianao no aroko, Sady nataonao ho fonenanao ny Avo Indrindra,

¹⁰Dia tsy hisy loza hanjo anao, Na aretina hanakaiky ny lainao.

¹¹Fa Izy handidy ny anjeliny ny aminao Mba hiaro anao eny amin'izay rehetra halehanao.

¹²Eny an-tànany no hitondran'ireo anao, Fandrao ho tafintohina amin'ny vato ny tongotrao.

¹³Ny liona masiaka sy ny vipera hodiavinao; Ny liona tanora sy ny menarana no hohitsahinao.

¹⁴Satria Izaho no niraiketan'ny fitiavany, Dia hamonjy azy Aho, Hanandratra azy ho any amin'ny avo Aho, satria mahalala ny anarako izy

¹⁵Hiantso Ahy izy, dia hamaly azy Aho; Ho eo aminy Aho, raha ory izy; Hamonjy sy hanome voninahitra azy Aho.

¹⁶Hovokisako fahela-velona izy Ary hasehoko azy ny famonjeko.