Read Malagasy Salamo 92 Bible Online

Salamo 92 - Malagasy bible

Salamo 92

¹Salamo. Tonon-kira hatao amin'ny andro Sabata. Tsara ny hidera an'i Jehovah Sy ny hankalaza ny anaranao, ry Avo Indrindra ô,

²Ary hanambara ny famindram-ponao nony maraina Sy ny fahamarinanao nony alina,

³Amin'ny valiha tory folo Sy amin'ny feon-dokanga.

⁴Fa ampifalinao amin'ny nataonao aho Jehovah ô; Ny asan'ny tananao no hihobiako.

⁵Jehovah ô, akory ny halehiben'ny asanao! Lalina indrindra ny fisainanao.

⁶Ny ketrina tsy mahafantatra izany, Ary ny adala koa tsy mba mahalala.

⁷Raha mitsiry tahaka ny ahitra ny ratsy fanahy, Ary mamony ny mpanao ratsy rehetra, Dia izany no ho fandringanana azy mandrakizay.

⁸Nefa Hianao, Jehovah ô, dia avo mandrakizay.

⁹Fa, indreo, ny fahavalonao, Jehovah ô, Fa, indreo, ringana ny fahavalonao; Mihahaka ny mpanao ratsy rehetra.

¹⁰Fa ny tandroko kosa asandratrao ho tahaka ny an'ny ombimanga; Mihosotra diloilo vaovao aho.

¹¹Ary faly ny masoko mahita ny amin'ny fahavaloko, Ary finaritra ny sofiko mandre ny amin'ny ratsy fanahy izay efa mitsangana hamely ahy.

¹²Ny marina hamololona tahaka ny rofia; Hisandrahaka tahaka ny sedera any Libanona izy;

¹³Efa nambolena tao an-tranon'i Jehovah izy Ka maniry eo an-kianjan'Andriamanitsika;

¹⁴Mbola manorobona ihany izy, na dia efa antitra aza; Dofodofotra sy maitso izy,

¹⁵Mba hanambara fa mahitsy Jehovah, Vatolampiko Izay tsy misy tsiny.