Read Malagasy Ohabolana 17 Bible Online

Ohabolana 17 - Malagasy bible

Ohabolana 17

¹Tsara ny sombi-mofo maina misy fiadanana Noho ny trano feno hena misy fifandirana.

²Ny mpanompo hendry dia hanapaka ny zanaka manao izay mahamenatra Sady hizara lova amin'ny mpirahalahy.

³Ny memy ho an'ny volafotsy, ary ny fatana fandrendrehana ho an'ny volamena; Fa Jehovah ihany no Mpamantatra ny fo.

⁴Ny mpanao ratsy mampandry sofina amin'ny molotra mandainga; Ary ny mpandainga mihaino ny lela mampidi-doza.

⁵Izay mihomehy ny malahelo manala baraka ny Mpanao azy; Ary izay faly amin'ny fahorian'ny sasany dia tsy maintsy hampijalina.

⁶Satroboninahitry ny antitra ny zafiny; Ary voninahitry ny zanaka ny rainy.

⁷Ny teny jadona tsy tandrifiny halahatry ny adala, Koa mainka fa tsy tokony ho an'ny zanak'andriana ny molotra mandainga.

⁸Ny kolikoly dia toy ny vato soa eo imason'izay mahazo azy, Ka na aiza na aiza alehany dia ambinina ihany.

⁹Izay te-ho be fitiavana dia manaron-keloka; Fa izay mamohafoha teny mampisaraka ny tena mpisakaiza.

¹⁰Ny anatra dia manan-kery kokoa amin'ny hendry Noho ny kapoka injato amin'ny adala.

¹¹Ny maditra dia fatra-pitady ny ratsy, Ka dia iraka lozabe no irahina hamely azy.

¹²Aleo mifanena amin'ny bera very anaka Toy izay amin'ny adala feno hadalana.

¹³Izay mamaly ratsy ny soa, Ny ratsy tsy hiala ao an-tranony.

¹⁴Ny fiandohan'ny ady dia toy ny manata-drano, Koa ilaozy ny fifandirana, dieny tsy mbola mifandramatra.

¹⁵Izay manamarina ny meloka, na izay manameloka ny marina,Dia samy fahavetavetana eo imason'i Jehovah.

¹⁶Hatao inona re ity vola an-tànan'ny adala? Hamidy fahendrena va? tsy manan-tsaina izy.

¹⁷Izay tena sakaiza tokoa dia tia amin'ny andro rehetra, Sady miseho ho rahalahy hamonjy amin'ny fahoriana.

¹⁸Olona tsy ampy saina izay mifandray tanana Hiantoka eo anatrehan'ny sakaizany.

¹⁹Izay tia ady dia tia heloka; Ary izay manao vavahady avo mitady fahasimbana.

²⁰Izay madi-po tsy hahita soa; Ary izay manana lela mandainga hivarina any amin'ny loza.

²¹Izay miteraka adala hahazo alahelo; Ary ny rain'ny adala tsy ho faly.

²²Ny fo ravoravo mahasalama tsara; Fa ny fanahy kivy mahamaina ny taolana.

²³Ny ratsy fanahy mandray kolikoly avy any anaty lamba Ho entiny mamadika ny rariny.

²⁴Eo anoloan'ny manan-tsaina ny fahendrena; Fa ny mason'ny adala dia mibirioka any amin'ny faran'ny tany.

²⁵Ny zanaka adala mampalahelo ny rainy Sady fahoriana mangidy amin'ny reniny niteraka azy.

²⁶Tsy mety raha mampijaly ny marina, Na mamely ny manan-kaja noho ny fahamarinany.

²⁷Izay mahafihim-bava no manam-pahalalana; Ary izay mahatsindry fo no manan-tsaina.

²⁸Na ny adala aza, raha tsy miteny, dia atao ho hendry, Ary izay mahafihim-bava dia toa manan-tsaina.