Read Malagasy Ohabolana 18 Bible Online

Ohabolana 18 - Malagasy bible

Ohabolana 18

¹Izay mitokana ho azy dia mitady ny mahafinaritra ny tenany ihany, Misafoaka manohitra izay hevitra mahasoa rehetra izy.

²Ny adala tsy mba finaritra amin'ny fahalalana, Fa ta-haneho izay ao am-pony.

³Raha avy ny ratsy fanahy, dia avy ny fanamavoana; Ary miaraka amin'ny fahafaham-baraka ny henatra.

⁴Rano lalina ny teny aloaky ny vavan'ny olona, Ary rano miboiboika ny loharanon'ny fahendrena,

⁵Tsy mety raha manohana ny ratsy fanahy Handresy ny marina amin'ny fitsarana.

⁶Ny molotry ny adala manatona ny fifandirana, Ary ny vavany mihantsy kapoka.

⁷Ny vavan'ny adala no fandringanana azy, Ary ny molony ihany no fandriky ny fanahiny.

⁸Ny tenin'ny mpifosafosa dia toy ny hanim-py Ka mikorotsaka ao anaty kibo indrindra.

⁹Ary izay malaina amin'ny asany Dia rahalahin'ny mpanimba.

¹⁰Ny anaran'i Jehovah dia tilikambo mafy; Ny marina miezaka ho ao aminy ka voavonjy.

¹¹Ny haren'ny manan-karena no vohiny mafy, Ary raha araka ny fiheviny, dia toa manda avo izany.

¹²Ny fireharehan'ny fon'ny olona mialoha ny fahasimbana; Fa ny fanetren-tena kosa mialoha ny voninahitra.

¹³Izay mamaly teny mbola tsy re, Dia hadalana sy henatra ho azy izany.

¹⁴Ny faharariany dia zakan'ny fanahin'ny olona ihany; Fa ny fanahy kivy, iza no mahazaka izany?

¹⁵Ny fon'ny manan-tsaina mahazo fahalalana; Ary ny sofin'ny hendry mitady izany.

¹⁶Ny fanomezan'ny olona dia mahalalaka ny alehany, Hahatonga azy eo anatrehan'ny lehibe.

¹⁷Izay mandahatra aloha no toa marina; Fa nony avy kosa ny an-daniny, dia mamaly ny teniny.

¹⁸Ny filokana mampitsahatra ady Ary mampisaraka ny samy mahery.

¹⁹Ny mampionona ny rahalahy voaisy ratsy dia sarotra noho ny manafaka vohitra mafy, Ary ny fifandirana aminy dia tahaka ny hidin'ny lapan'ny mpanjaka.

²⁰Ny vokatry ny vavan'ny olona no mahavoky soa azy; Eny, ny vokatry ny molony no mahavoky azy.

²¹Ny mahafaty sy ny mahavelona samy hain'ny lela, Koa izay manarana azy dia hihinana ny vokany.

²²Izay lehilahy mahazo vady dia mahazo zava-tsoa Sady mahita sitraka amin'i Jehovah.

²³Fitarainana no ataon'ny malahelo; Nefa ny manan-karena kosa dia mamaly mahery.

²⁴Izay maro sakaiza tsy maintsy tra-pahoriana; Fa misy sakaiza tia, izay mifikitra noho ny rahalahy aza.