Read Malagasy Ohabolana 2 Bible Online

Ohabolana 2 - Malagasy bible

Ohabolana 2

¹Anaka, raha raisinao ny teniko, Ary raketinao ao am-ponao ny didiko,

²Ka atongilanao amin'ny fahendrena ny sofinao, Ary ampitandremanao fahalalana ny fonao;

³Eny, raha miantso ny fahalalana ianao Ary manandratra ny feonao hahazo saina,

⁴Raha mitady azy toy ny fitady volafotsy ianao Ary mikatsaka azy toy ny fikatsaka harena afenina:

⁵Dia ho fantatrao marina ny fahatahorana an'i Jehovah, Ary ho hitanao ny fahalalana an'Andriamanitra.

⁶Fa Jehovah no manome fahendrena; Avy amin'ny vavany no ihavian'ny fahalalana sy ny fahazavan-tsaina.

⁷Izy mitahiry fanambinana ho an'ny mahitsy Sady ampingan'izay mandeha tsy misy tsiny;

⁸Ka dia mitandrina ny lalan'ny fahamarinana Izy Ary miambina ny lalan'ny olony masina.

⁹Ary amin'izay dia ho fantatrao ny fahamarinana sy ny rariny Ary ny hitsiny, dia ny lalana tsara rehetra.

¹⁰Raha latsaka ao am-ponao ny fahendrena, Ary mamin'ny fanahinao ny fahalalana,

¹¹Dia hiaro anao ny fisainana mazava, Ary hiambina anao ny fahalalana,

¹²Ka hamonjy anao amin'ny lalan-dratsy Sy amin'ny lehilahy izay miteny fitaka,

¹³Izay mahafoy ny lalan'ny fahamarinana Mba hizorany amin'ny lalan'ny fahamaizinana,

¹⁴Dia izay faly hanao ratsy Sy finaritra amin'ny fitaky ny ratsy,

¹⁵Dia izay melo-dalana Sy maniasia amin'ny alehany;

¹⁶Ary hamonjy anao amin'ny vehivavy jejo koa izany, Dia amin'ny vahiny janga izay mandrobo amin'ny teniny,

¹⁷Izay mahafoy ny vadin'ny fahatanorany Sy manadino ny fanekeny teo amin'Andriamaniny.

¹⁸Fa ny tranony milentika ho amin'ny fahafatesana, Ary ny alehany mankany amin'ny maty.

¹⁹Tsy misy afa-miverina izay mankany aminy, Na mihazo amin'ny lalan'aina,

²⁰Handehananao amin'ny lalan'ny tsara fanahy Sy hitandremanao ny alehan'ny marina.

²¹Fa ny olona mahitsy no honina amin'ny tany, Ary ny tsy manan-tsiny ihany no ho sisa mitoetra ao;

²²Fa ny ratsy fanahy kosa hofongorana amin'ny tany, Ary ny mpivadika hongotana.