Read Malagasy Ohabolana 22 Bible Online

Ohabolana 22 - Malagasy bible

Ohabolana 22

¹Aleo ho tsara laza toy izay ho be harena, Ary tsara ny fitia noho ny volafotsy sy ny volamena.

²Mihaona ny manan-karena sy ny malahelo; Fa Jehovah no Mpanao azy roa tonta.

³Ny mahira-tsaina mahatsinjo ny loza ka miery; Fa ny kely saina kosa mandroso ka voa.

⁴Ny valin'ny fanetren-tena sy ny fahatahorana an'i Jehovah Dia harena sy voninahitra ary fiainana.

⁵Tsilo sy fandrika no amin'ny alehan'ny maditra; Fa izay te-hiaro ny ainy dia manalavitra izany.

⁶Zaro amin'izay lalana tokony halehany ny zaza, Ka na rehefa antitra aza izy, dia tsy hiala amin'izany.

⁷Ny manan-karena dia manapaka ny malahelo, Ary izay misambotra dia mpanompon'ny mampisambotra.

⁸Izay mamafy heloka dia hijinja fahoriana, Ary ho levona ny tsorakazon'ny fahatezerany.

⁹Izay manana maso miantra hotahina, Satria anomezany ho an'ny malahelo ny haniny.

¹⁰Roahy ny mpaniratsira, dia ho afaka ny fifandirana, Eny, hitsahatra ny ady sy ny fahafaham-baraka.

¹¹Izay tia fahadiovam-po, dia milaza soa ny molony. Sady sakaizan'ny mpanjaka izy.

¹²Ny mason'i Jehovah miaro ny manam-pahalalana; Fa ny tenin'ny mpivadika dia foanany.

¹³Hoy ny malaina: Misy liona any ivelany; Ho fatin'ny sasany any an-dalambe aho.

¹⁴Ny vavan'ny vehivavy jejo dia lavaka lalina; Izay voaozon'i Jehovah no ho latsaka ao.

¹⁵Miraikitra amin'ny fon'ny zaza ny hadalana; Fa ny tsorakazo famaizana no hampanalavitra izany aminy.

¹⁶Izay mampahory ny malahelo dia mampitombo ny hareny; Fa izay manome ho an'ny manana kosa dia mampihena ny hareny.

¹⁷Atongilano ny sofinao, ka henoy ny tenin'ny hendry, Ary ampitandremo ny fahalalako ny fonao;

¹⁸Fa mahafinaritra raha voatahirinao ao an-kibonao izany, Koa aoka samy ho eo amin'ny molotrao.

¹⁹Hianao dia ianao no nampahafantariko izany, Mba hitokianao amin'i Jehovah.

²⁰Tsy efa nanoratra zava-tsoa ho anao va aho, Izay misy hevitra tsara sy fahalalana,

²¹Mba hampahafantariko ny fahamarinan'ny teny mahatoky ianao, Sy hahazoanao teny holazaina amin'izay naniraka anao?

²²Aza manosihosy ny malahelo, saingy malahelo izy; Ary aza dia manifakifa ny ory eo am-bavahady;

²³Fa Jehovah anie ka hisolo vava azy amin'ny adiny. Ary hanimba ny ain'izay manimba azy.

²⁴Aza misakaiza amin'ny olona mora tezitra, Ary aza miara-dia amin'ny olona foizina,

²⁵Fandrao ianao mianatra ny fanaony Ka mahazo fandrika ho an'ny ainao.

²⁶Aza mety ho isan'ny mifandray tanana, Na izay mianto-trosa;

²⁷Raha tsy manan-kaloa ianao, Nahoana no dia halainy ny lafika andrianao?

²⁸Aza manakisaka ny fari-tany ela, Izay naorin'ny razanao.

²⁹Mahita olona mailaka amin'ny raharahany va ianao? Eo anatrehan'ny mpanjaka no hitsanganany, Fa tsy hitsangana eo anatrehan'ny olona ambany izy.