Read Malagasy Ohabolana 23 Bible Online

Ohabolana 23 - Malagasy bible

Ohabolana 23

¹Raha mipetraka hiara-komana amin'ny mpanapaka ianao, Dia hevero tsara izay eo anatrehanao,

²Ka andraso antsy ny tendanao, Raha dia liana loatra ianao.

³Aza mitsiriritra ny hanim-piny, Fa hani-mamitaka izany.

⁴Aza manasa-tena hanan-karena, Aza entina amin'izany ny fahendrenao.

⁵Moa hampanarahinao azy va ny masonao, nefa tsy ao intsony izy? Fa maniry elatra tokoa izy Ka manidina toy ny voromahery ho eny amin'ny lanitra.

⁶Aza homana ny mofon'izay ratsy fijery, Ary aza mitsiriritra ny hanim-piny;

⁷Fa tahaka ny heviny ao am-pony ihany no toetrany: Hoy izy aminao: Mihinàna, misotroa; Kanjo tsy sitrany ianao.

⁸Izay sombiny kely voatelinao aza dia mbola haloanao, Ka ho very foana ny teny mahafinaritra nataonao.

⁹Aza miteny amin' ny adala;Fa hohamavoiny foana ny fahendren'ny teninao.

¹⁰Aza manakisaka ny fari-tany ela, Ary aza manitatra mankamin'ny sahan'ny kamboty;

¹¹Fa mahery ny Mpanavotra azy, Izy no hisolo vava azy amin'ny adiny aminao.

¹²Ampiekeo famaizana ny fonao, Sy tenim-pahalalana ny sofinao.

¹³Aza tsy manafay zanaka, Fa tsy dia ho faty izy tsy akory na dia asianao ny hazo aza;

¹⁴Raha mamely azy amin'ny hazo ianao, Dia ho voavonjinao tsy ho any amin'ny fiainan-tsi-hita ny fanahiny.

¹⁵Anaka, raha hendry ny fonao,Dia ho faly koa ny foko, dia ny foko;

¹⁶Eny, ho ravoravo ny fanahiko, Raha miteny marina ny molotrao.

¹⁷Aoka tsy hialona ny mpanota ny fonao; Fa matahora an'i Jehovah mandritra ny andro;

¹⁸Fa raha mbola hisy koa ny farany, Dia tsy ho foana ny fanantenanao.

¹⁹Mihainoa ianao, anaka, ka hendre, Ary ampizory amin'ny lalana ny fonao.

²⁰Aza misakaiza amin'izay mpiboboka divay Sy izay fatra-pitia hena;

²¹Fa halahelo izay mpiboboka sy izay fatra-pitia hena; Ary ny fitiavan-torimaso mampitafy voro-damba.

²²Maneke ny rainao izay niteraka anao. Ary aza manamavo ny reninao, saingy efa antitra izy.

²³Vidio ny marina, ka aza amidy, Dia ny fahendrena sy ny fananarana ary ny fahazavan-tsaina.

²⁴Hifaly dia hifaly ny rain'ny marina, Ary izay miteraka zaza hendry hanampifaliana aminy.

²⁵Aoka ho faly ny rainao sy ny reninao, Eny, aoka ho ravoravo ny reninao izay niteraka anao.

²⁶Anaka, atolory ahy ny fonao, Ary aoka ny masonao ho faly mijery ny lalako;

²⁷Fa ny vehivavy jejo dia hady lalina, Ary ny vahiny janga lavaka etỳ;

²⁸Eny, manotrika toy ny jiolahy ireny Ary mahamaro ny olona mpivadika.

²⁹An'iza ny Indrisy? An'iza ny Endrey? An'iza ny fifandirana? An'iza ny fitolokoana? An'iza ny ratra tsy ahoan-tsy ahoana? An'iza ny maso mivoara-mena?

³⁰An'izay mikikitra amin'ny divay, Eny, an'izay mandeha hanandrana divay voaharoharo zavatra.

³¹Aza mijery ny divay noho ny hamenany Sy ny fanganohanony eo anaty gilasy Ary ny fikoriany mahafinaritra;

³²Fa amin'ny farany dia hanaikitra toy ny bibilava izy Ary hanindrona toy ny menarana.

³³Koa ny masonao dia hijery vehivavy jejo, Ary ny fonao hieritreri-dratsy.

³⁴Eny, ho sahala amin'izay mandry ao amin'ny ranomasina ianao Sady ho tahaka izay mandry eo an-tendron'ny andrin-tsambo.

³⁵Nokapohiny aho, hoy ianao, fa tsy reko naharary ahy, Nandalasiny aho, fa tsy tsaroako; Rahoviana ange aho no hifoha mba hitadiavako azy indray?