Read Malagasy Ohabolana 26 Bible Online

Ohabolana 26 - Malagasy bible

Ohabolana 26

¹Toy ny oram-panala amin'ny lohataona, Ary toy ny ranonorana amin'ny taom-pijinjana, Dia toy izany ny voninahitra tsy tandrifiny ho an'ny adala.

²Toy ny vorona mivezivezy sy ny sidintsidina manidina, Dia toy izany ny fanozonam-poana: tsy mba hihatra izany.

³Ny karavasy ho amin'ny soavaly ny lamboridy ho amin'ny boriky, Ary ny tsorakazo kosa ho amin'ny lamosin'ny adala.

⁴Aza mamaly ny adala araka ny hadalany, Fandrao mba adala tahaka azy koa ianao.

⁵Valio ny adala araka ny hadalany, Fandrao dia manao azy ho hendry izy

⁶Manapaka ny tongony sady misotro loza Izay mampitondra teny ny adala.

⁷Mikepikepika ny tongotry ny malemy tongotra, Dia toy izany ny ohabolana eo am-bavan'ny adala.

⁸Toy ny manisy vato eo amin'ny antsamotady, Dia toy izany ny manome voninahitra ny adala.

⁹Toy ny tsilo eny an-tànan'ny olona mamo, Dia toy izany ny ohabolana eo am-bavan'ny adala.

¹⁰Ny mpiasa mahay dia mahavita ny zavatra isan-karazany; Fa izay manakarama ny adala dia toy ny manakarama izay sendra mandalo.

¹¹Toy ny amboa miverina amin'ny loany, Dia toy izany ny adala miverina amin'ny hadalany.

¹²Hitanao va ny olona manao azy ho hendry? Ny adala misy hantenaina kokoa noho izy.

¹³Hoy ny malaina: Misy liona any an-dalana, Misy liona atsy an-dalambe.

¹⁴Toy ny varavarana mihodina amin'ny saviliny, Dia toy izany ny kamo eo amin'ny fandriany,

¹⁵Ny malaina mangarona ny eo an-doviany, Nefa ny hampakatra azy ho amin'ny vavany dia mahasasatra azy.

¹⁶Ny kamo manao ny tenany ho hendry mihoatra noho ny olona fito izay mahavaly tsara.

¹⁷Izay mandalo ka mitsaraingona amin'ny ady tsy azy Dia mandroritra amboa amin'ny sofiny.

¹⁸Toy ny adala izay manely afo sy zana-tsipìka ary fahafatesana,

¹⁹Dia toy izany ny olona mamitaka ny namany ka manao hoe: Tsy vosobosotra ihany va no ataoko?

²⁰Raha tsy misy kitay intsony, dia maty ny afo; Ary raha tsy misy mpifosafosa intsony, dia mitsahatra ny fifandirana.

²¹Toy ny arina atao amin'ny vainafo sy ny kitay hazo atao amin'ny afo, Dia toy izany, ny olona tia ady mandrehitra fifandirana.

²²Ny tenin'ny mpifosafosa dia toy ny hanim-py ka mikorotsaka ao anaty kibo indrindra.

²³Tavim-bilany misy ankosotra taim-bolafotsy ny molotra mihatsaravelatsihy sy ny fo ratsy.

²⁴Ny mpandrafy dia mody ho hafa amin'ny molony Sady manafim-pitaka ao am-pony;

²⁵Koa na dia miteny soa aza izy, aza mino azy; Fa fahavetavetana fito no ao am-pony.

²⁶Ny lolompo dia miafina ao amin'ny fitaka; Nefa ny haratsiany dia haharihary eo am-pahibemaso.

²⁷Izay mihady lavaka no ho latsaka ao, Ary izay manakodiadia vato no hikodiavany kosa.

²⁸Halan'ny lela mandainga izay efa nampahoriny, Ary ny vava mandrobo dia mampidi-doza.