Read Malagasy Ohabolana 3 Bible Online

Ohabolana 3 - Malagasy bible

Ohabolana 3

¹Anaka, aza manadino ny lalàko; Fa aoka ny fonao hitandrina ny didiko;

²Fa andro maro sy taona ela iainana Ary fiadanana no hanampiny ho anao.

³Aoka tsy handao anao ny famindram-po sy ny fahamarinana; Afehezo eo am-bozonao izany, Ary soraty ao amin'ny fonao tahaka ny amin'ny vato fisaka,

⁴Ka dia hahazo fitia sy fahalalana tsara Eo anatrehan'Andriamanitra sy ny olona ianao.

⁵Matokia an'i Jehovah amin'ny fonao rehetra, Fa aza miankina amin'ny fahalalanao;

⁶Maneke Azy amin'ny alehanao rehetra, Fa Izy handamina ny lalanao,

⁷Aza manao anao ho hendry; Matahora an'i Jehovah, ka mifadia ny ratsy.

⁸Dia ho famelombelomana ny nofonao izany Sy ho fanamandoana ny taolanao.

⁹Mankalazà an'i Jehovah amin'ny fanananao Sy amin'izay voaloham-bokatrao rehetra;

¹⁰Ka dia ho feno mitafotafo ny fitoeram-barinao, Ary hihoatra ny ranom-boaloboka eo amin'ny vata fanantazanao.

¹¹Anaka, aza manamavo ny famaizan'i Jehovah, Ary aza tofoka amin'ny fananarany;

¹²Fa izay tian'i Jehovah no anariny, Dia tahaka ny ataon'ny ray amin'ny zanaka tiany.

¹³Sambatra izay olona mahita fahendrena Sy izay olona mahazo fahalalana.

¹⁴Fa ny fandrantoana azy dia tsara noho ny fandrantoana volafotsy, Ary ny tombom-barotra aminy dia mihoatra noho ny volamena tsara.

¹⁵Sarobidy noho ny voahangy izy; Ary izay rehetra irinao tsy misy azo ampitahaina aminy.

¹⁶Fa andro maro no eo an-tànany ankavanana; Ary harena sy voninahitra no eo an-tànany ankavia.

¹⁷Làlana mahafinaritra ny lalany, Ary fiadanana ny alehany rehetra.

¹⁸Hazon'aina ho an'izay rehetra mifikitra aminy izy; Ary izay rehetra mitana azy no hatao hoe sambatra.

¹⁹Fahendrena no nanorenan'i Jehovah ny tany, Ary fahalalana no nampitoerany ny lanitra.

²⁰Ny fahalalany no entiny mampiboiboika ny rano any amin'ny lalina Sy ampitetevany ando avy amin'ny rahona.

²¹Anaka, aoka tsy hiala amin'ny masonao izany; Raketo ny tena fahendrena sy ny fisainana mazava,

²²Ka dia ho ain'ny fanahinao izany Ary ho firavaky ny vozonao,

²³Dia handroso aman-toky ianao, Ka tsy ho tafintohina ny tongotrao.

²⁴Tsy hatahotra ianao, raha mandry; Eny, handry ianao, ary ho mamy ny torimasonao.

²⁵Aza manahy ny tahotra avy tampoka, Na ny rivo-doza mamely ny ratsy fanahy, raha avy izany;

²⁶Fa Jehovah no ho tokinao Ka hiambina ny tongotrao tsy ho voafandrika.

²⁷Aza mamihina ny soa amin'izay tokony homena azy, Raha azon'ny tananao atao ihany;

²⁸Aza manao amin'ny namanao hoe: Mandehana, ka avia indray, fa rahampitso no homeko; Kanefa manana ihany ianao.

²⁹Aza mamorona sain-dratsy ho enti-mamely ny namanao, Saingy mitoetra matoky eo aminao izy.

³⁰Aza miady amin'olona foana, Raha tsy mbola nanisy ratsy anao izy.

³¹Aza mialona ny olon-dozabe, Na mifidy izay lalany akory,

³²Satria fahavetavetana eo imason'i Jehovah ny maniasia, Fa ao amin'ny marina kosa ny fisakaizany.

³³Ny ozon'i Jehovah dia ao an-tranon'ny ratsy fanahy; Fa ny fonenan'ny marina dia tahìny kosa.

³⁴Na dia tsiratsirainy aza ny mpaniratsira, Dia omeny fahasoavana kosa ny mpandefitra.

³⁵Ny hendry handova voninahitra; Fa henatra kosa no ho anjaran'ny adala.