Read Malagasy Ohabolana 4 Bible Online

Ohabolana 4 - Malagasy bible

Ohabolana 4

¹Ry zanaka, henoy ny anatry ny ray, Ary tandremo mba hahazoanareo ny fahalalana tsara.

²Fa anatra tsara no omeko anareo; Aza mahafoy ny lalàko.

³Fa zanak'ikaky aho, Sady tiana no hany malala teo imason'ineny.

⁴Ary nampianatra ahy izy ka nanao tamiko hoe: Aoka ny fonao hitana ny teniko; Tandremo ny didiko, dia ho velona ianao.

⁵Mahazoa fahendrena, mahazoa fahalalana; Fa aza hadinoina na ihemorana ny teny aloaky ny vavako.

⁶Aza mahafoy azy, fa hiaro anao izy; Tiavo izy, dia hitandrina anao.

⁷Ny voaloham-pahendrena dia izao: Mahazoa fahendrena; Eny, lanio ny fanananao rehetra hamidy fahalalana tsara.

⁸Asandrato izy, dia hanandratra anao kosa Eny, hanome voninahitra anao izy, raha tananao.

⁹Dia hasiany fehiloha mahafinaritra ny lohanao; Eny, satro-boninahitra tsara tarehy no homeny anao.

¹⁰Anaka, mihainoa, ka raiso ny teniko; Dia hihamaro ny taona hiainanao.

¹¹Làlam-pahendrena no atoroko anao: Eny, mitarika anao amin'ny lalana mahitsy aho.

¹²Raha mandeha ianao, dia tsy ho etỳ ny lalanao; Ary raha mihazakazaka ianao, dia tsy ho tafintohina.

¹³Tano mafy ny fananarana, ka aza avela hiala; Hazony izy, fa ainao.

¹⁴Aza mankany amin'ny alehan'ny ratsy fanahy, Ary aza mizotra amin'ny lalan'ny ratsy.

¹⁵Manalavira azy; aza mandalo eo akory; Mivilia azy, ka mizora.

¹⁶Fa tsy matory ireny, raha tsy efa nanao ratsy; Ary tsy mahita torimaso izy, raha tsy efa nanafintohina ny sasany.

¹⁷Fa mihinana ny mofon'ny faharatsiana izy, Sy misotro ny divain'ny fahalozàna.

¹⁸Fa ny lalan'ny marina dia toy ny fipoak'andro maraina, Izay mihamazava mandra-pitataovovonan'ny andro.

¹⁹Ny alehan'ny ratsy fanahy dia toy ny aizim-pito; Tsy fantany akory izay manafintohina azy.

²⁰Anaka, tandremo ny teniko; Atongilano ny sofinao hihaino ny filazako.

²¹Aza avela hiala eo imasonao izy, Fa raketo ao am-ponao.

²²Fa aina ho an'ny mahazo azy izy Ary fahasalamana ho an'ny nofony rehetra.

²³Tandremo ny fonao mihoatra noho izay rehetra tokony hotandremana; Fa avy ao aminy no ihavian'ny aina.

²⁴Esory aminao ny vava mandainga, Ary ampanalaviro anao ny molotra mamitaka.

²⁵Aoka ny masonao hijery mahitsy, Ary ny hodimasonao hibanjina eo anoloanao.

²⁶Ataovy marina ny alehan'ny tongotrao, Dia ho voalamina ny alehanao rehetra;

²⁷Aza mivily, na ho amin'ny ankavanana, na ho amin'ny ankavia; Esory amin'ny ratsy ny tongotrao.