Read Malagasy Ohabolana 5 Bible Online

Ohabolana 5 - Malagasy bible

Ohabolana 5

¹Anaka, tandremo ny fahendreko, Ary atongilano ny sofinao ho amin'ny fahalalako,

²Hiheveranao tsara ny fisainana mazava Sy hitandreman'ny molotrao ny fahalalana.

³Fa ny molotry ny vehivavy jejo dia mitete toy ny tantely avy amin'ny tohotra, Ary ny vavany dia malama noho ny diloilo;

⁴Nefa ny farany mangidy tahaka ny hazo mahafaty Ary maranitra hoatra ny sabatra roa lela.

⁵Ny tongony midina ho any amin'ny fahafatesana, Ary ny diany mizotra ho any amin'ny fiainan-tsi-hita.

⁶Tsy mahazo mandia ny lalan'aina mihitsy izy, Fa manjenjena, ka tsy fantany akory izay halehany.

⁷Koa mihainoa ahy, ry zanaka, Ary aza miala amin'ny teny aloaky ny vavako.

⁸Ampanalaviro azy ny alehanao, Ary aza manakaiky ny varavaran'ny tranony;

⁹Fandrao omenao ho an'ny sasany ny voninahitrao, Ary ny taonanao ho an'izay lozabe;

¹⁰Fandrao hivokisan'ny vahiny ny fanananao; Ary izay nisasaranao ho tonga ao an-tranon'ny vahiny;

¹¹Ka dia hitoloko ianao any am-parany, Raha mihalevona ny nofonao sy ny tenanao;

¹²Dia hanao hoe ianao: Nahoana re no nankahala famaizana aho? Ary nahoana no naniratsira fanaranana ny foko,

¹³Ka tsy nihaino ny tenin'ny mpanoro hevitra ahy, Ary tsy nanongilana ny sofiko hihaino ny mpampianatra ahy?

¹⁴Efa saiky azon'ny ratsy rehetra aho Tao amin'ny fiangonana sy ny fivoriana.

¹⁵Misotroa rano avy amin'ny lavaka famorian-dranonao ihany Sy rano miboiboika avy amin'ny fantsakanao.

¹⁶Hipasaka eny ivelany va ny rano avy amin'ny loharanonao, Ary eny an-dalambe ny rano velonao?

¹⁷Aoka ho anao irery ihany izany, Fa aza iombonana amin'ny hafa.

¹⁸Aoka hotahina ny loharanonao, Ary mifalia amin'ny vadin'ny fahatanoranao.

¹⁹Fa dieravavy mahate-ho-tia sy osi-dia tsara bika izy, Dia aoka ny tratrany no hahafeno fifaliana anao mandrakariva, Ary aoka ho feno faharavoravoana lalandava amin'ny fitiavany ianao.

²⁰Nahoana ianao, anaka, no ho renoka amin'ny fitiavana vehivavy jejo Ka hanohona ny tratran'ny vahiny janga?

²¹Fa eo imason'i Jehovah ny alehan'ny olona, Ary ny diany rehetra dia dinihiny avokoa.

²²Ny heloky ny ratsy fanahy dia mahazo ny tenany ihany, Ary ny kofehin'ny fahotany no itanana azy

²³Maty noho ny tsi-fahazoany famaizana izy, Eny, mikorapaka noho ny haben'ny fahadalany.