Read Malagasy Ohabolana 6 Bible Online

Ohabolana 6 - Malagasy bible

Ohabolana 6

¹Anaka, raha niantoka ny namanao ianao Ary nandray tanana hiantoka ny hafa,

²Ka voafandriky ny teny naloaky ny vavanao ianao Sady voasingotry ny teny naloaky ny vavanao,

³Dia izao no ataovy, anaka, ka afaho ny tenanao (Satria efa mby eo an-tanan'ny namanao ianao): Andeha mihohoka sy mifona mafy amin'ny namanao.

⁴Aza avela hatory akory ny masonao, Ary aza avela hilondolondo ny hodimasonao.

⁵Afaho ny tenanao toy ny gazela miala amin'izay mihazona azy, Ary toy ny voron-kely miala amin'ny tanan'ny mpamandrika.

⁶Mandehana any amin'ny vitsika, ry ilay malaina; Diniho ny fanaony, ka mba hendre;

⁷Tsy manana komandy ireny, Na mpifehy, na mpanapaka,

⁸Nefa mamory ny haniny raha fahavaratra izy, Ary manangona ny fihinany amin'ny fararano.

⁹Mandra-pahoviana no mbola handry ihany ianao, ry ilay malaina? Rahoviana no hifoha amin'ny torimasonao ianao?

¹⁰Mbola hatory kely ihany, mbola ho renoka kely ihany, Ary mbola hanohon-tanana kely hatory,

¹¹Dia ho tonga toy ny lehilahy mimaona hamely ny alahelonao, Ary ny fahantranao ho toy ny jiolahy.

¹²Ny olona tena ratsy fanahy sy mpanao ratsy Dia ilay mandehandeha manao vava ratsy,

¹³Izay mami-maso sy manao famantarana amin'ny tongony Ary manao baiko amin'ny rantsan-tànany;

¹⁴Fahafetsena no ao am-pony, Mihevi-dratsy mandrakariva izy Sady mamafy ady.

¹⁵Ary noho izany dia ho avy tampoka kosa ny loza hanjo azy; Ho torotoro tampoka izy, ka tsy hisy fahasitranana.

¹⁶Izao enina izao no halan'i Jehovah, Eny, fito no ataony ho fahavetavetana:

¹⁷Ny maso miavonavona, ny lela fandainga, Ary ny tanana mandatsa-drà marina,

¹⁸Ny fo mamoron-tsain-dratsy, Ny tongotra malaky mihazakazaka hanao ratsy,

¹⁹Ny mamoaka lainga ho vavolombelona tsy marina, Ary ny mamafy ady ao amin'ny rahalahy.

²⁰Anaka, tandremo ny didin-drainao, Ary aza mahafoy ny lalàn-dreninao.

²¹Afatory amin'ny fonao mandrakariva ireo, Ary afehezo eo am-bozonao,

²²Raha mandeha ianao, dia hitari-dalana anao ireo; Raha mandry ianao, dia hiambina anao; Ary raha mifoha ianao, dia hamelona eritreritra anao.

²³Fa jiro ny didy, ary fanazavana ny lalàna, Ary lalan'aina ny anatra famaizana,

²⁴Hiarovana anao amin'ny vehivavy ratsy fanahy, Ary amin'ny fandroboan'ny lelan'ny vahiny janga.

²⁵Aoka ny fonao tsy haniry ny hatsaran-tarehiny; Ary aoka tsy hahazo anao amin'ny hodimasony izy.

²⁶Fa noho ny vehivavy mpijangajanga no mila tsy hananan'ny lehilahy sombi-mofo, Ary ny amin'ny vadin'ny olona no mihaza ny aina soa.

²⁷Mahatondra afo ao an-tratran'akanjony va ny olona, Ka tsy ho may ny akanjony?

²⁸Misy mahadia vain'afo va, Ka tsy ho may ny tongony?

²⁹Dia toy izany izay mankamin'ny vadin'ny namany; Tsy maintsy hampijalina izay mikasika azy.

³⁰Tsy avelan'ny olona ho afa-maina ny mpangalatra, Raha maka zavatra hahavoky ny tenany izy, na dia noana aza;

³¹Fa raha azo izy, dia hampanoneriny fito heny Ka hanome ny fananana rehetra ao an-tranony.

³²Izay mijangajanga amin'ny vehivavy dia tsy ampy saina; Izay ta-hanimba tena no manao izany.

³³Voakapoka sy afa-baraka izy Ary tsy ho afaka amin'ny tondro-molotra.

³⁴Fa ny fahasaro-piaro dia mampirehitra ny fahatezeran-dehilahy, Koa tsy hamindra fo izy amin'ny andro hamaliany.

³⁵Tsy handray vola ho enti-manalady akory izy, Ary tsy hety, na dia omenao fanambatambazana be aza.