Read Malagasy Ohabolana 8 Bible Online

Ohabolana 8 - Malagasy bible

Ohabolana 8

¹Tsy miantso va ny fahendrena, Ary tsy manandra-peo va ny fahalalana?

²Eo an-tampon'ny fitoerana avo amoron-dalana Sy eo an-tsampanan-dalana no ijoroany.

³Eo anilan'ny vavahady, amin'ny fidirana ho ao an-tanàna, Sy eo anaty vavahady no iantsoany maty hoe:

⁴Hianareo no antsoiko, ry olona; Ary ny feoko ho amin'ny zanak'olombelona.

⁵Fantaro ny fahendrena, ry kely saina; Ary fantaro ny fahalalana, ry adala.

⁶Henoy, fa hilaza zava-tsoa aho; Ary ny hilaza ny mahitsy no isokafan'ny molotro.

⁷Fa ny marina ihany no holazain'ny vavako; Ary ny ratsy dia fahavetavetana, raha amin'ny molotro.

⁸Marina ny teny rehetra aloaky ny vavako; Tsy misy fiolakolahana na fitaka ao aminy.

⁹Miharihary avokoa izy, raha amin'ny mazava saina, Ary mahitsy, raha amin'ny efa nahazo fahalalana.

¹⁰Aza ny volafotsy no raisina, fa ny anatro, Ary aleo ny fahalalana toy izay ny volamena voafantina.

¹¹Fa ny fahendrena dia tsara noho ny voahangy; Ary ny zavatra irina rehetra tsy azo ampitahaina aminy.

¹²Izaho fahendrena dia miara-monina amin-tsaina, Ary hitan'ny fahalalako ny fisainana mazava.

¹³Ny fankahalana ny ratsy no fahatahorana an'i Jehovah. Ny fiavonavonana sy ny fireharehana sy ny lalana ratsy Ary ny vava fandainga dia samy halako avokoa.

¹⁴Ahy ny fisainana sy ny fanambinana; Izaho no fahalalana, izaho no manan-kery;

¹⁵Izaho no anjakan'ny mpanjaka Sy andidian'ny mpanapaka araka ny rariny;

¹⁶Izaho no anapahan'ny andriandahy sy ny lehibe, Dia ny mpitsara rehetra amin'ny tany.

¹⁷Tiako izay tia ahy; Ary izay fatra-pitady ahy dia hahita ahy.

¹⁸Ato amiko ny harena sy ny voninahitra, Eny, ny harena mateza sy ny fahamarinana.

¹⁹Ny vokatro dia tsara noho ny volamena, eny, noho ny tena volamena aza, Ary ny fitomboan'ny hareko mihoatra noho ny volafotsy voafantina.

²⁰Amin'ny alehan'ny fahamarinana no izorako, Dia ao amin'ny lalan'ny fitsarana marina,

²¹Mba hampandovako harena izay tia ahy, Sy hamenoako ny firaketany.

²²Jehovah nahary ahy ho fiandohan'ny alehany, Ho voalohany amin'ny asany hatramin'ny taloha.

²³Izaho notendreny hatramin'ny fahagola, Eny, hatramin'ny voalohany indrindra, dia fony tsy mbola ary ny tany.

²⁴Fony tsy mbola ary ny lalina, no efa teraka aho, Fony tsy mbola ary ny loharano miboiboika be,

²⁵Fony tsy mbola naorina ny tendrombohitra, Fony tsy mbola nisy havoana, no efa teraka aho,

²⁶Fony tsy mbola natao ny tany, na ny saha, Na ny voalohan'ny vovo-tany ambonin'izao rehetra izao.

²⁷Raha namorona ny lanitra Izy, dia tany aho, Raha namaritra ny hababakaka tambonin'ny lalina Izy,

²⁸Raha nampitoetra ny rahona eny ambony Izy, Raha niboiboika fatratra ny loharanon'ny lalina,

²⁹Raha nanisy faritra ho an'ny ranomasina Izy, Mba tsy hahazoan'ny rano mihoatra ny fetrany, Ary nandidy ny amin'ny fanorenan'ny tany,

³⁰Dia mpità-marika teo anilany aho Sady ravoravo isan'andro isan'andro Ka nilalao mandrakariva teo anatrehany;

³¹Eny, nahafaly ahy ny tany nataony honenana, Ary naharavoravo ahy ny zanak'olombelona.

³²Koa mihainoa ahy ianareo, anaka; Fa sambatra izay manaraka ny diako;

³³Minoa anatra, ka hendre, Fa aza mandà.

³⁴Sambatra izay olona mihaino ahy Ka miari-tory mandrakariva eo am-bavahadiko, Ary miandry eo amin'ny tolam-baravarako.

³⁵Fa izay mahita ahy dia mahita fiainana Sady mahazo sitraka amin'i Jehovah;

³⁶Fa izay diso ahy kosa mampidi-doza amin'ny fanahiny; Ary izay rehetra mankahala ahy tia fahafatesana.