Read Malagasy Tonon-kiran'i Solomona 1 Bible Online

Tonon-kiran'i Solomona 1 - Malagasy bible

Tonon-kiran'i Solomona 1

¹Ny tonon-kira tsara indrindra, izay nataon'i Solomona.

²Enga anie ka hanoroka ahy amin'ny fanorohan'ny vavany izy! Fa tsara noho ny divay ny fitiavanao.

³Mani-pofona ny menakao tsara, menaka manitra voaidina ny anaranao, koa izany no itiavan'ny zatovovavy anao.

⁴Taomy aho, dia hihazakazaka hanaraka anao izahay; Nentin'ny mpanjaka ho ao an-efi-tranony aho. Hifaly sy hiravoravo aminao izahay; Hankalazainay mihoatra noho ny divay ny fitiavanao; Fitiavana marina no itiavany anao.

⁵Mivalomainty aho, nefa tsara tarehy, ry zanakavavin'i Jerosalema, toy ny lain'i Kedara, toy ny ambain-dain'i Solomona.

⁶Aza mibanjina ahy, fa mivalomainty aho, satria efa azon'ny hainandro; Tezitra tamiko ny zanak'ineny; Notendreny ho mpiandry ny tanim-boalobony aho; Nefa ny tanim-boaloboko kosa, dia ny an'ny tenako, tsy mba nandrasako.

⁷Lazao amiko, ry ilay tian'ny fanahiko, izay iandrasanao ny ondrinao, sy izay ampandrianao azy raha antoandro; Fa nahoana no ho tahaka izay mivezivezy foana aho Eny amin'ny andian'ny namanao?

⁸Raha tsy fantatrao, ry tsara tarehy indrindra amin'ny vehivavy, dia mandehana hanaraka ny andian'ny ondry aman'osy, ary andraso eny amin'ny lain'ny mpiandry ondry ny zanak'osinao.

⁹Ry tompokovavy havako, ianao dia ampitahaiko amin'ny soavalivaviko mitarika ny kalesin'i Farao.

¹⁰Mahatsara ny tarehinao ireo voahangy voatohy; Manendrika ny vozonao ireo rado.

¹¹Nefa rojo volamena misy voavola mibontsimbontsina kosa no hataonay ho anao.

¹²Raha mipetraka amin'ny latabany ny mpanjaka, dia mamerovero tsara ny nardako.

¹³Ny malalako dia miora am-pehezana madinika mandry eo an-tratrako.

¹⁴Ny malalako dia tahaka ny vonin'ny kofera amiko, any an-tanimbolin'i En-jedy.

¹⁵Indro, tsara tarehy ianao, ry tompokovavy havako; Indro, tsara tarehy ianao; Voromailala ny masonao.

¹⁶Indro, tsara tarehy ianao, ry malalako, eny, mahafinaritra; Maitso ny fandriantsika.

¹⁷Sedera ny sakamandimbin'ny tranontsika, ary kypreso ny peta-drindrintsika.