Read Malagasy Fitomaniana 3 Bible Online

Fitomaniana 3 - Malagasy bible

Fitomaniana 3

¹Izaho ilay lehilahy nahita fahoriana tamin'ny tsorakazon'ny fahatezerany.

²Izaho no notarihiny sy nampandehaniny ho amin'ny maizina, fa tsy ho amin'ny mazava.

³Izaho ihany no asian'ny tànany mandritra ny andro mandrakariva.

⁴Nataony antitra ny nofoko sy ny hoditro, notapatapahiny ny taolako.

⁵Manorina izay hamelezany ahy Izy ary manemitra ahy amin'ny zava-mangidy sy ny fahoriana.

⁶Ampitoeriny ao amin'ny maizina toy izay efa maty fahagola aho.

⁷Nofefeny manodidina aho ka tsy afa-nivoaka, nataony mavesatra ny gadrako.

⁸Ary na dia mitaraina sy minananana aza aho, dia tampenany ny fivavako.

⁹Vato voapaika no narafiny natampiny ny lalako, naolikoliny ny alehako.

¹⁰Tonga bera manotrika ahy Izy, ary toy ny liona ao amin'ny fierena;

¹¹Namily ny alehako Izy, ary noviravirainy aho ka nataony mahatsiravina.

¹²Nanenjana ny tsipìkany Izy ka nanangana ahy ho toy ny marika hokendrena zana-tsipìka.

¹³Nampitsatoka ny zana-tsipìkany tamin'ny voako Izy.

¹⁴Tonga fihomehezan'ny fireneko rehetra aho sady ataony an-kira mandritra ny andro.

¹⁵Novokisany zava-mangidy aho ary nobobohany zava-mahafaty.

¹⁶Ary notorotoroiny tamin'ny sila-bato ny nifiko, sady natsinkasinkasiny tamin'ny lavenona aho.

¹⁷Ary noroahinao tsy hahita fiadanana ny fanahiko, ka efa hadinoko ny tsara.

¹⁸Dia hoy izaho: Levona ny faharetako sy ny fanantenako an'i Jehovah.

¹⁹Tsarovy ny fahoriako sy ny fanjenjenako, dia ny zava-mahafaty sy ny rano mangidy.

²⁰Tsaroan'ny fanahiko indrindra izany, ka mitanondrika ato anatiko izy.

²¹Izany no ho eritreretiko ato am-poko, ka dia hanantena aho.

²²Ny famindram-pon'i Jehovah no tsy nahalany ritra antsika, fa tsy mitsahatra ny fiantrany.

²³Vaovao isa-maraina izany; lehibe ny fahamarinanao.

²⁴Jehovah no anjarako, hoy ny fanahiko, ka dia hanantena Azy aho.

²⁵Tsara Jehovah amin'izay manantena Azy, dia amin'ny olona izay mitady Azy.

²⁶Tsara ny miandry ny famonjen'i Jehovah amin'ny fanginana.

²⁷Tsara amin'ny olona ny mitondra zioga, raha mbola tanora izy.

²⁸Aoka hanjokaiky irery izy ka hangina, raha ampitondraina izany.

²⁹Aoka hanohoka ny vavany eo amin'ny vovoka izy, angamba hisy hantenaina.

³⁰Aoka hanolotra ny takolany ho amin'izay mamely azy izy ka ho feno latsa.

³¹Fa tsy hanary mandrakizay ny Tompo;

³²Eny fa na dia mampahory aza Izy, dia mbola hiantra ihany araka ny haben'ny famindram-pony.

³³Fa tsy sitrany ny mampahory na mampalahelo ny zanak'olombelona.

³⁴Ny fanitsakitsahana ny mpifatotra rehetra ambonin'ny tany ho eo ambanin'ny tongotra,

³⁵Ny familiana ny rariny amin'ny olona eo anatrehan'ny Avo Indrindra,

³⁶Ny famadihana ny adin'ny olona, dia samy tsy sitraky ny Tompo.

³⁷Iza moa no miteny, ka dia mahatonga izany, raha tsy zavatra efa nodidian'ny Tompo?

³⁸Tsy avy amin'ny vavan'ny Avo Indrindra va no ivoahan'ny soa sy ny loza ?

³⁹Koa ahoana no imonomononan'ny olona mbola velona, fa no tsy aleo misento noho ny amin'ny fahotany avy?

⁴⁰Aoka isika handinika sy hamantatra ny alehantsika ka hiverina indray amin'i Jehovah.

⁴¹Aoka hasandratsika amin'Andriamanitra any an-danitra ny fontsika sy ny tanantsika.

⁴²Izahay efa nanota sy nanao ditra, ary Hianao kosa tsy namela heloka.

⁴³Nisarona fahatezerana Hianao ka nanenjika anay; eny, novonoinao izahay, fa tsy niantranao.

⁴⁴Nisarona rahona Hianao, ka dia voasakana ny vavaka.

⁴⁵Nataonao tahaka ny fakofako sy ny zavatra nariana teo afovoan'ny firenena izahay.

⁴⁶Ny fahavalonay rehetra misanasana vava aminay.

⁴⁷Mahavoa anay ny tahotra sy ny lavaka ary ny fandringanana sy ny fahatorotoroana.

⁴⁸Rano mandriaka no mijononoka amin'ny masoko noho ny faharatran'ny oloko zanakavavy.

⁴⁹Ny masoko mandrotsa-dranomaso ka tsy mijanona, eny, tsy misy fiatoana,

⁵⁰Ambara-pitazan'i Jehovah ka ho tsinjony any an-danitra.

⁵¹Ny masoko mampiditra fahoriana ho an'ny fanahiko noho ny amin'ny zanakavavin'ny tanànako rehetra.

⁵²Izay fahavaloko tsy ahoan-tsy ahoana dia nanenjika ahy mafy hoatra ny fanenjika voron-kely.

⁵³Nanjera ahy tao an-davaka famoriandrano izy ka nitady hahafaty ahy sady nitora-bato ahy.

⁵⁴Mandifotra ny lohako ny rano, ka dia hoy izaho: Maty aho ity!

⁵⁵Jehovah ô, niantso ny anaranao tany an-davaka lalina indrindra aho.

⁵⁶Ny feoko dia efa renao, aza tampenana ny sofinao, raha mitaraina mitady izay mba hiainana kely aho.

⁵⁷Nanakaiky Hianao tamin'ny andro niantsoako Anao, ka dia hoy Hianao: Aza matahotra.

⁵⁸Tompo ô, Hianao nandahatra ny adiko izay nikasika ny aiko, eny, nanavotra ny aiko Hianao.

⁵⁹Jehovah ô, hitanao ny fitsarana miangatra natao tamiko, ka mba tsarao ny adiko.

⁶⁰Hitanao ny famalian-dratsy rehetra ataon'ireo, dia ny saina rehetra entiny mamely ahy

⁶¹Jehovah ô, efa renao ny latsa ataony, dia ny saina rehetra entiny mamely ahy,

⁶²Dia ny molotr'izay mitsangana hanohitra ahy sy ny saina ataony mandritra ny andro hamelezana ahy.

⁶³Jereo ny fipetrany sy ny fitsangany, fa ataony an-kira aho.

⁶⁴Hovalianao araka ny asan'ny tànany izy, Jehovah ô.

⁶⁵Eny, hohamaizininao ny fony, hihatra aminy ny ozonao.

⁶⁶Henjehinao amin'ny fahatezerana izy ka haringanao tsy ho etỳ ambanin'ny lanitr'i Jehovah.