Read Malagasy Fitomaniana 5 Bible Online

Fitomaniana 5 - Malagasy bible

Fitomaniana 5

¹Jehovah ô, tsarovy izay nanjo anay; Hevero sy diniho ny latsa mahazo anay.

²Ny lovanay dia afindra ho an'ny vahiny ary ny tranonay ho an'ny hafa firenena.

³Efa kamboty izahay ka tsy manan-dray, ny reninay dia toy ny mpitondra-tena.

⁴Na dia ny loharanonay aza dia andoavanay vola vao azonay isotroana, ary ny kitay hazonay dia vidinay vao azo.

⁵Rambondrambonan'ny mpanenjika amin'ny hatokay izahay; Reraka izahay fa tsy manam-pitsaharana.

⁶Nanolo-tanana tamin'ny Egyptiana sy ny Asyriana izahay mba ho voky hanina.

⁷Nanota ny razanay tsy etỳ intsony izy; Ary izahay no mivesatra ny helony.

⁸Andevo no manapaka anay; Tsy misy manafaka anay amin'ny tànany.

⁹Noho ny sabatra mamely any an-efitra dia manao vy very ny ainay izahay vao mahazo hanina.

¹⁰Mahamay toy ny fatana ny hodi-tray noho ny fahamaimaizana avy amin'ny mosary.

¹¹Nosavihina ny vehivavy tao Ziona ary ny virijina tao amin'ny tanànan'ny Joda.

¹²Nahantona tamin'ny tànany ny lehibe; Ary ny antitra tsy mba nohajaina.

¹³Ny zatovo nitondra ny fikosoham-bary; Ary ny ankizy madinika nivembena nitondra ny hazo.

¹⁴Ny loholona tsy misy eo am-bavahady, ary ny zatovo tsy mitendry zava-maneno intsony.

¹⁵Ny hafalian'ny fonay dia nitsahatra, ary ny dihinay niova ho fitomaniana.

¹⁶Efa afaka ny satro-boninahitra tamin'ny lohanay; Idiran-doza izahay, fa efa nanota!

¹⁷Ary noho izany dia reraka ny fonay, eny, noho izany dia maizina ny masonay,

¹⁸Noho ny amin'ny tendrombohitra Ziona, izay efa lao sady ikarenjen'ny amboahaolo.

¹⁹Jehovah ô, ianao no mipetraka mandrakizay, eny, ny seza fiandriananao no maharitra hatramin'ny taranaka fara mandimby.

²⁰Ahoana no dia anadinoanao anay mandrakizay sy ahafoizanao anay andro lava ?

²¹Jehovah ô, ampivereno aminao izahay, mba hiverenanay; Havaozy ho toy ny fahiny ny andronay.

²²Moa dia nandà anay tokoa va Hianao sy tezitra aminay indrindra?