Read Malagasy Nomery 33 Bible Online

Nomery 33 - Malagasy bible

Nomery 33

¹Ary izao no nandehan'ny Zanak'Isiraely, izay nentin'i Mosesy sy Arona nivoaka avy tany amin'ny tany Egypta araka ny antokony.

²Dia nosoratan'i Mosesy ny nialany araka ny nandehanany, araka ny didin'i Jehovah; ary izao no nandehanany araka ny nialany:

³Niala tao Ramesesa Izy tamin'ny volana voalohany, dia tamin'ny andro fahadimy ambin'ny folo tamin'ny volana voalohany; nony ampitson'ny Paska no nivoahan'ny Zanak'Isiraely tamin'ny tanana avo teo imason'ny Egyptiana rehetra.

⁴Fa ny Egyptiana mbola nandevina izay efa novonoin'i Jehovah teo aminy, dia ny lahimatoa rehetra; ary ny andriamaniny dia notsarain'i Jehovah.

⁵Ary nony niala tao Ramesesa ny Zanak'Isiraely, dia nitoby tao Sokota.

⁶Ary nony niala tao Sokota izy, dia nitoby ao Etama, izay teo an-tsisin'ny efitra.

⁷Ary nony niala tao Etama izy, dia nivily nankao Pi-hahirota, izay tandrifin'i Balazefona, ka nitoby tandrifin'i Migdola.

⁸Ary nony niala tandrifin'i Hahirota izy, dia nandeha nita teo afovoan'ny ranomasina ho any an-efitra, dia nandeha lalan-kateloana tany an-efitra Etama izy ka nitoby tao Mara.

⁹Ary nony niala tao Mara izy, dia nankany Elima; ary tao Elima dia nisy loharano roa ambin'ny folo sy hazo rofia fito-polo, dia nitoby teo izy.

¹⁰Ary nony niala tao Elima izy, dia nitoby tao amoron'ny Ranomasina Mena.

¹¹Ary nony niala tao amoron'ny Ranomasina Mena izy, dia nitoby tany an-efitra Sina.

¹²Ary nony niala tany an-efitra Sina izy, dia nitoby tao Dopka.

¹³Ary nony niala tao Dopka izy, dia nitoby tao Alosy.

¹⁴Ary nony niala tao Alosy izy, dia nitoby tao Refidima; ary tsy nisy rano tao hosotroin'ny olona.

¹⁵Ary nony niala tao Refidima izy, dia nitoby tany an-efitr'i Sinay.

¹⁶Ary nony niala tany an-efitr'i Sinay izy, dia nitoby tao Kibrota-hatava.

¹⁷Ary nony niala tao Kibrota-hatava izy, dia nitoby tao Hazerota.

¹⁸Ary nony niala tao Hazerota izy, dia nitoby tao Ritma.

¹⁹Ary nony niala tao Ritma izy, dia nitoby tao Rimona-pareza.

²⁰Ary nony niala tao Rimona-pareza izy, dia nitoby tao Libna.

²¹Ary nony niala tao Libna izy, dia nitoby tao Risa.

²²Ary nony niala tao Risa izy, dia nitoby tao Kehelata.

²³Ary nony niala tao Kehelata izy, dia nitoby tao an-tendrombohitra Sapera.

²⁴Ary. nony niala tao an-tendrombohitra Sapera izy, dia nitoby tao Harada.

²⁵Ary nony niala tao Harada izy, dia nitoby tao Makelota.

²⁶Ary nony niala tao Makelota izy, dia nitoby tao Tahata.

²⁷Ary nony niala tao Tahata izy, dia nitoby tao Tera.

²⁸Ary nony niala tao Tera izy, dia nitoby tao Mitka.

²⁹Ary nony niala tao Mitka izy, dia nitoby tao Hasmona.

³⁰Ary nony niala tao Hasmona izy, dia nitoby tao Moserota.

³¹Ary nony niala tao Moserota izy, dia nitoby tao Bene-jakana.

³²Ary nony niala tao Bene-jakana izy, dia nitoby tao Hora-hagidgada.

³³Ary nony niala tao Hora-hagidgada izy, dia nitoby tao Jotbata.

³⁴Ary nony niala tao Jotbata izy, dia nitoby tao Abrona.

³⁵Ary nony niala tao Abrona izy, dia nitoby tao Ezion-gebera.

³⁶Ary nony niala tao Ezion-gebera izy, dia nitoby tany an-efitra Zina (Kadesy izany).

³⁷Ary nony niala tao Kadesy izy, dia nitoby tao an-tendrombohitra Hora, tao an-tsisin'ny tany Edoma.

³⁸Ary Arona mpisorona niakatra tao an-tendrombohitra Hora, araka ny didin'i Jehovah, dia maty tao izy tamin'ny fahefa-polo taona taorian'ny nivoahan'ny Zanak'Isiraely avy tany amin'ny tany Egypta, tamin'ny andro voalohany tamin'ny volana fahadimy.

³⁹Ary efa telo amby roa-polo amby zato taona Arona, raha maty tao an-tendrombohitra Hora izy.

⁴⁰Ary ren'ilay Kananita, mpanjakan'i Arada, izay nonina teo amin'ny tany atsimo amin'ny tany Kanana, fa avy ny Zanak'Isiraely.

⁴¹Ary nony niala tao an-tendrombohitra Hora izy, dia nitoby tao Zalmona.

⁴²Ary nony niala tao Zalmona izy, dia nitoby tao Ponona.

⁴³Ary nony niala tao Ponona izy, dia nitoby tao Obota.

⁴⁴Ary nony niala tao Obota izy, dia nitoby tao Ie-abarima tao amin'ny faritanin'i Moaba.

⁴⁵Ary nony niala tao Ie-abarima izy, dia nitoby tao Dibon-gada.

⁴⁶Ary nony niala tao Dibon-gada izy, dia nitoby tao Almon-diblataima.

⁴⁷Ary nony niala tao Almon-diblataima izy, dia nitoby tao amin'ny tendrombohitra Abarima, tandrifin'i Nebo.

⁴⁸Ary nony niala tamin'ny tendrombohitra Abarima izy, dia nitoby tao Arbota-moaba, teo amoron'i Jordana tandrifin'i Jeriko.

⁴⁹Ary nitoby teo amoron'i Jordana izy hatrany Betijesimota ka hatrany Abela-sitima, tao Arbota-moaba.

⁵⁰Ary Jehovah niteny tamin'i Mosesy teo Arbota-moaba, teo amoron'i Jordana tandrifin'i Jeriko, ka nanao hoe:

⁵¹Mitenena amin'ny Zanak'Isiraely hoe: Rehefa tafita an'i Jordana ka tonga any amin'ny tany Kanana ianareo,

⁵²dia horoahinareo eo alohanareo ny mponina rehetra amin'ny tany, ary horavanareo ny vato soratany rehetra, ary hosimbanareo ny sarin-javany an-idina rehetra, ary horavanareo ny fitoerana avony rehetra;

⁵³dia halainareo ny tany, ka hitoetra eo ianareo; fa ianareo no nomeko ny tany ho zara-taninareo.

⁵⁴Ary filokana no hizaranareo ny tany araka ny fokonareo avy: ny maro isa homenareo zara-tany bebe kokoa, ary ny vitsy isa homenareo kelikely kokoa; samy ao amin'izay ivoahan'ny filokana ho azy no ho anjarany; araka ny firenen'ny razanareo no hahazoanareo zara-tany.

⁵⁵Fa raha tsy roahinareo eo alohanareo ny mponina amin'ny tany, dia ho lay amin'ny masonareo sy ho tsilo amin'ny tehezanareo izay avelanareo hitoetra eo, ka handrafy anareo eo amin'ny tany izay onenanareo izy;

⁵⁶ary hataoko aminareo izay nokasaiko hatao aminy.