Read Malagasy Nomery 34 Bible Online

Nomery 34 - Malagasy bible

Nomery 34

¹Ary Jehovah niteny tamin'i Mosesy ka nanao hoe:

²Mandidia ny Zanak'Isiraely hoe: Raha tonga any amin'ny tany Kanana ianareo, dia izao no tany izay ho azonareo ho lova, dia ny tany Kanana araka izay fari-taniny.

³Ary ny lafiny atsimo amin'ny taninareo dia hatramin'ny efitra Zina, izay mifanolotra amin'i Edoma. Ary ny fari-taninareo atsimo dia hatramin'ny faran'ny Ranomasin-tsira any atsinanana,

⁴dia miolaka eo atsimon'ny fiakarana Akrabima, dia mandroso hatrany Zina, dia mahazo any atsimon'i Kadesibarnea, dia mahazo an'i Hazar-adara ka mandroso hatrany Azmona,

⁵ary miolaka hatrany Azmona ka hatramin'ny lohasahan-driak'i Egypta, ka dia mihatra amin'ny ranomasina.

⁶Ary ny amin'ny fari-tany andrefana, dia indro ny Ranomasina Lehibe sy ny amorony, ka hatreo no ho fari-taninareo andrefana.

⁷Ary izao no ho fari-taninareo avaratra: hatramin'ny Ranomasina Lehibe dia aoka ny tendrombohitra Hora no hotandrifinareo;

⁸ary hatramin'ny tendrombohitra Hora dia aoka ny lalana mankany Hamata no hotandrifinareo, ary aoka ny fari-tany hahazo an'i Zedada,

⁹dia hahazo an'i Zifrona, ka dia hihatra an'i Hazar-enana; izany no ho faritaninareo avaratra.

¹⁰Ary ny ho fari-taninareo atsinanana dia ampifanitsio amin'i Hazar-enana ka hatrany Sefama,

¹¹dia hidina hatrany Sefama ka hatrany Ribla any atsinanan'i Aina, dia mbola hidina ihany koa ka hipaka amin'ny Ranomasin'i Kinereta atsinanana,

¹²dia hidina ihany indray hatrany Jordana, ka dia hihatra amin'ny Ranomasin-tsira. Izany no ho taninareo araka ny fari-taniny manodidina.

¹³Ary Mosesy nandidy ny Zanak'Isiraely ka nanao hoe: Izany no tany izay hozarainareo araka ny filokana, dia izay andidian'i Jehovah homena ny firenena sivy sy sasany;

¹⁴fa ny firenena taranak'i Robena araka ny fianakaviany sy ny firenena taranak'i Gada araka ny fianakaviany dia efa nandray ny zara-taniny, ary ny antsasaky ny firenen'i Manase koa dia efa nandray ny zara-taniny;

¹⁵dia ny firenena roa sy sasany samy efa nandray ny zara-taniny atỳ an-dafy atsinanan'i Jordana, hitsin'i Jeriko, tandrifin'ny fiposahan'ny masoandro.

¹⁶Ary Jehovah niteny tamin'i Mosesy ka nanao hoe:

¹⁷Izao no anaran'ny lehilahy izay hizara ny tany ho anareo: Eleazara mpisorona sy Josoa, zanak'i Nona.

¹⁸Ary loholona iray avy amin'ny isam-pirenena koa no halainareo hizara ny tany.

¹⁹Ary izao no anaran'ireo lehilahy ireo: ny avy amin'ny firenen'i Joda dia Kaleba, zanak'i Jefone;

²⁰ary ny avy amin'ny firenena taranak'i Simeona dia Semoela, zanak'i Amihoda;

²¹ary ny avy amin'ny firenen'i Benjamina dia Elidada, zanak'i Kislona;

²²ary ny lohan'ny firenena taranak'i Dana dia Boky, zanak'i Jogly;

²³ary ny avy amin'ny taranak'i Josefa: ny lohan'ny firenena taranak'i Manase dia Haniela, zanak'i Efoda;

²⁴ary ny lohan'ny firenena taranak'i Efraima dia Kemoela, zanak'i Siftana;

²⁵ary ny lohan'ny firenena taranak'i Zebolona dia Elizafana, zanak'i Parnaka;

²⁶ary ny lohan'ny firenena taranak'Isakara dia Paltiela, zanak'i Azana;

²⁷ary ny lohan'ny firenena taranak'i Asera dia Ahihoda, zanak'i Selomy;

²⁸ary ny lohan'ny firenena taranak'i Naftaly dia Pedahela, zanak'i Amihoda.

²⁹Ireo no nodidian'i Jehovah hizara ny tany Kanana ho an'ny Zanak'Isiraely.