Read Malagasy 1 Korintiana 16 Bible Online

1 Korintiana 16 - Malagasy bible

1 Korintiana 16

¹Ary ny amin'ny famoriam-bola ho an'ny olona masina, dia mba manaova koa ianareo toy izay nasaiko nataon'ny fiangonana any Galatia.

²Amin'ny andro voalohany isan-kerinandro dia samia manokana ao aminy avy ho rakitra na amin'inona na amin'inona no anambinana azy, mba ho vita rahateo ny famoriam-bola mandra-pahatongako.

³Ary rehefa tonga aho, dia izay sitrakareo no hirahiko hitondra taratasy hanatitra ny fiantranareo ho any Jerosalema.

⁴Ary raha tokony handehanako izany, dia hiaraka amiko ireo.

⁵Hankatỳ aminareo aho, rehefa namaky an'i Makedonia - fa hamaky an'i Makedonia aho -

⁶ary angamba hitoetra eo aminareo aho, na handany ny ririnina aza, mba hanateranareo ahy amin'izay halehako.

⁷Fa tsy mikasa hamangy anareo toy ny mandalo aho ankehitriny; fa manantena hitoetra elaela eo aminareo aho, raha sitrapon'ny Tompo.

⁸Nefa hitoetra any Efesosy aho mandra-pihavin'ny Pentekosta;

⁹fa varavarana lehibe no voavoha ho ahy hahazoako miasa tsara, nefa maro ny mpanohitra.

¹⁰Ary rehefa tonga Timoty, dia tandremo mba tsy hanan-tahotra eo aminareo izy; fa ny asan'ny Tompo no ataony, tahaka ny ataoko koa.

¹¹Koa aza avela hisy olona hanao tsinontsinona azy; fa atero soa aman-tsara izy mba ho tonga atỳ amiko; fa miandry azy mbamin'ny rahalahy sasany aho.

¹²Ary ny amin'i Apolosy rahalahy, dia nangataka azy fatratra aho hiara-mandeha amin'ny rahalahy hankatỳ aminareo, saingy tsy sitrapony akory ny handeha tamin'izany; nefa ho avy ihany izy, rehefa misy andro mahalalaka azy.

¹³Miambena ianareo, tomoera tsara amin'ny finoana, aoka hitombandahy, mahereza.

¹⁴Izay rehetra ataonareo dia ataovy amin'ny fitiavana.

¹⁵Fantatrareo ny ankohonan'i Stefanasy, fa voaloham-bokatr'i Akaia izy sady efa nanolo-tena ho amin'ny fanompoana ny olona masina; dia mangataka aminareo aho, ry rahalahy,

¹⁶mba hanaiky tsara ny olona tahaka ireny sy izay rehetra miara-miasa sy mikely aina koa ianareo.

¹⁷Faly aho noho ny fihavian'i Stefanasy sy Fortonato ary Akaiko; fa ireo no nahefa ny tsy vitanareo;

¹⁸fa namelombelona ny fanahiko sy ny anareo koa izy; ka mba ekeo ny tahaka ireny.

¹⁹Manao veloma anareo ny fiangonana atỳ Asia. Manao veloma anareo indrindra ao amin'ny tompo Akoila sy Prisila mbamin'ny fiangonana izay ao an-tranony.

²⁰Manao veloma anareo ny rahalahy rehetra. Mifanaova veloma amin'ny fanorohana masina.

²¹Ny tanako, izaho Paoly, no anaovako veloma.

²²Raha misy tsy tia ny Tompo, aoka ho voaozona izy. Maran ata.

²³Ho aminareo anie ny fahasoavan'i Jesosy Kristy Tompo;

²⁴ny fitiavako dia ao aminareo rehetra ao amin'i Kristy Jesosy. Amena.