Read Dikateny Iombonana Eto Madagasikara Genesỳ 14 Bible Online

Genesỳ 14 - Dikateny Iombonana Eto Madagasikara bible

Genesỳ 14

¹Tamin’izany andro izany, i Amrafela mpanjakan’i Sinehara, i Ariôka mpanjakan’i Elasara, i Kedôrlahômera mpanjakan’i Helama, ary i Tidehala mpanjakan’i Goîma,

²dia niady tamin’i Bera mpanjakan’i Sôdôma sy i Birsa mpanjakan’i Gômôra sy i Sinàba mpanjakan’i Admà sy i Semebera mpanjakan’i Tsebôima ary ny mpanjakan’i Bela na hoe Tsôhara.

³Izy rehetra ireo dia nifamotoana tao amin’ny lohasahan’ny Sidima, izay rakotry ny Ranomasina Maty ankehitriny.

⁴Nandritra ny roa ambin’ny folo taona izy ireo dia nanompo an’i Kedôrlahômera fa tamin’ny taona fahatelo ambin’ny folo kosa izy dia nikomy.

⁵Tamin’ny taona fahefatra ambin’ny folo dia tonga i Kedorlahômera mbamin’ireo mpanjaka nomba azy ka nandresy ireo Refaita tao Hastarôta-Karnaîma sy ny Zozita tao Hama sy ireo Emita tao amin’ny lemak’i Kiriataîma

⁶ary ireo Horita tao an-tendrombohitr’i Sehira ka hatrany Ely-Paràna izay akaikin’ny taniefitra.

⁷Avy eo dia niverina ho any Haîna-Mispata na hoe Kadesy izy ireo, ka namely izay rehetra teny an-tsahan’ny Hamalekita mbamin’ireo Amôrita izay nonina tao Hatsetsôna-Tamara.

⁸Dia niroso ny mpanjakan’i Sôdôma sy ny mpanjakan’i Gômôra sy ny mpanjakan’i Admà sy ny mpanjakan’i Tsebôima ary ny mpanjakan’i Bela na hoe Tsôhara, ka nandahatra ny tafiny hiady tamin’ireo tao an-dohasahan’i Sidima,

⁹izany hoe i Kedôrlahômera mpanjakan’i Helama, sy i Tidehala mpanjakan’i Gôima, sy i Amrafela mpanjakan’i Sinehara, ary i Ariôka mpanjakan’i Elasara; mpanjaka dimy mikatroka amin’ny efatra.

¹⁰Nisy lava-drano betsaka nandrevo tao amin’ny lohasahan’i Sidima, ka rahefa nandositra ny mpanjakan’i Sôdôma sy i Gômôra, dia nianjera tao ary ireo sisa kosa nandositra tany an-tendrombohitra.

¹¹Nofaohin’ireo mpandresy avokoa ny haren’ny tao Sôdôma sy tao Gômôra mbamin’ny sakafo rehetra, dia lasa izy ireo.

¹²Nofaohiny niaraka tamin’ireo koa i Lôta zana-drahalahin’i Abrama izay nonina tao Sôdôma mbamin’ny fananany dia lasa izy ireo.

¹³Ary nisy lehilahy iray afa-nandositra, dia tonga nanambara ny vaovao tamin’i Abrama ilay Hebreo nonina an-day tao amin’ny hazo ôakan’i Mamre, izay Amôrita rahalahin’i Eskôla sy i Hanera; fa izy telo lahy dia efa vita fihavanana tamin’i Abrama.

¹⁴Nony ren’i Abrama fa babo ny zana-drahalahiny, dia novoriny ireo valo ambin’ny folo sy telonjato lahy mpomba azy avy tao amin’ny fianakaviany; ka nanenjika ny fahavalo hatrany Dana izy.

¹⁵Natsitokotokon’i Abrama ireo mpanompony mba hanafihana azy amin’ny alina. Dia resiny ireo mpanjaka, ka nenjehiny hatrany Hôbà, any avaratr’i Damasy.

¹⁶Tafaveriny avokoa ny harena rehetra nobaboina sy i Lôta zana-drahalahiny mbamin’ny fananany ary ireo vehivavy mbamin’ny olon-kafa rehetra.

¹⁷Ary rehefa niverina avy nandresy an’i Kedôrlahômera sy ireo mpanjaka nomba azy i Abrama, dia niainga ny mpanjakan’i Sôdôma mba hitsena azy tao an-dohasahan’i Save, izany hoe tao an-dohasahan’ny mpanjaka.

¹⁸Dia nitondra mofo sy divay[52] i Melkitsedèka mpanjakan’i Salema sady mpisoron’ilay Andriamanitra avo indrindra,

¹⁹ary nitsodrano an’i Abrama hoe: — Hotahîn’Andriamanitra avo indrindra mpanao ny lanitra sy ny tany anie i Abrama!

²⁰Hoderaina anie Andriamanitra avo indrindra Izay nanolotra ny fahavalonao ho eo an-tananao! Dia nomen’i Abrama an’i Melkitsedèka ny ampahafolon’ny zavatra rehetra.

²¹Ary ny mpanjakan’i Sôdôma dia niteny tamin’i Abrama hoe: — Omeo ahy ny olona fa ento ho anao kosa ny harena.

²²Fa namaly azy i Abrama hoe: — Atsangako amin’ny TOMPO Andriamanitra nanao ny lanitra sy ny tany ny tanako

²³hianianako fa tsy mba handray avy amin’izay rehetra anao aho, na dia singan-kofehy na fehin-kapa iray aza. Sao manko lazainao hoe: «Izaho no nampanankarena an’i Abrama.»

²⁴Izay nohanin’ireo zatovoko ihany no hotazoniko. Ary ny anjaran’ireo lehilahy niaraka tamiko, izany hoe ny an’i Hanera sy i Eskôla ary i Mamre, dia izy ireo ihany no handray izany.