Read Dikateny Iombonana Eto Madagasikara Genesỳ 15 Bible Online

Genesỳ 15 - Dikateny Iombonana Eto Madagasikara bible

Genesỳ 15

¹Taorian’ireo zavatra ireo, dia niseho tamin’i Abrama ny TOMPO ka niteny taminy hoe: — Aza matahotra ianao, ry Abrama, fa Izaho no mpiaro anao; ary ny valisoanao dia ho lehibe tokoa.

²Fa namaly i Abrama hoe: — Ry Tompo ANDRIANANAHARY ô,

³inona no homenao ahy? Izaho ity ho faty tsy manan-taranaka; ary i Elihezera, mpitandrina ny ato an-tranoko, no handova ahy, satria ianao tsy nanome ahy taranaka.

⁴Fa hoy ny TOMPO taminy: — Tsy handova anao izy, fa ilay haterakao ihany no handova anao.

⁵Dia nentin’ny TOMPO nivoaka teny ivelan’ny tranolay izy ka nilazany hoe: — Jereo ange ny lanitra ary isao ny kintana, raha afaka manisa azy ianao[53]! Dia mbola nampiany hoe: — Ho toy izany ny taranakao!

⁶Ary i Abrama nino ny TOMPO; dia naneken’ny TOMPO azy ho marina izany[54].

⁷Ka hoy indray Izy taminy: — Izaho TOMPO no nampivoaka anao avy tany Ora any Babilônia mba hanomezako anao ity tany ity ho fanananao.

⁸Fa nanontany kosa i Abrama hoe: — Ry Tompo ANDRIANANAHARY ô, amin’ny fomba ahoana moa no hahalalako fa ho lasako ity tany ity?

⁹Dia novaliany hoe: — Itondray vantotr’ombivavy iray sy osivavy iray sy ondrilahy iray samy telo taona Aho ary koa domohina sy voromahailala iray avy.

¹⁰Dia nentin’i Abrama teo amin’ny TOMPO ireo rehetra ireo, ary nosasahiny teo afovoany afa-tsy ny vorona ka napetrany mifanatrika ny tapany avy[55].

¹¹Ary nidina teo ambonin’ireo ny vorona mpihaza ka noroahin’i Abrama.

¹²Nony efa hilentika ny masoandro, dia renoky ny torimaso lalina i Abrama, ka indro nisy haizina lehibe mampatahotra nanarona azy[56].

¹³Dia hoy ny TOMPO tamin’i Abrama: — Aoka ho fantatrao tsara fa hivahiny any amin’ny tany izay tsy azy ireo taranakao, ka ho mpanompo any ary hampijalîna mandritra ny efajato taona.

¹⁴Avy eo kosa dia hofaiziko ny firenena izay notompoiny, ka hiainga mitondra fananam-be[57] avy any ireo taranakao.

¹⁵Ianao kosa ho faty amim-piadanana ka halevina, rehefa tratra antitra tsara.

¹⁶Amin’ny taranakao fahefatra vao hiverina eto izy ireo, satria mandraka androany dia tsy mbola feno ny heloky ny Amôrita handroahako azy.

¹⁷Nony efa nilentika ny masoandro, dia nisy haizim-be mikitroka; ary indro nisy fatana midona-tsetroka sy fanilo mirehitra[58] namaky teo anivon’ireo biby voasasaka.

¹⁸Tamin’izay andro izay ny TOMPO dia nanao fanekempihavanana tamin’i Abrama, ka niteny hoe: — Omeko ny taranakao ity tany ity, manomboka eo amin’ny ranon-driakan’i Ejipta ka hatrany Eofrata ony lehibe

¹⁹izany hoe ny tany onenan’ireto foko ireto: ny Kenita sy ny Kenizita, ny Kadmônita

²⁰sy ny Hetita, ny Perizita sy ny Refaita,

²¹ny Amôrita sy ny Kanahanita ary ny Girgasita sy ny Jebosita.