Read Dikateny Iombonana Eto Madagasikara Genesỳ 16 Bible Online

Genesỳ 16 - Dikateny Iombonana Eto Madagasikara bible

Genesỳ 16

¹Ary i Saray, vadin’i Abrama, dia tsy niteraka fa momba; nefa nanana mpanompovavy ejiptianina atao hoe Hagara izy

²ka niteny tamin’i Abrama hoe: — Indro efa tsy nanome zanaka ahy ny TOMPO. Koa mba mandehana re any amin’ny mpanompovaviko; angamba hanan-janaka avy aminy aho[59]. Dia neken’i Abrama ny soso-kevitr’i Saray.

³Nalain’i Saray vadin’i Abrama i Hagara izay Ejiptianina mpanompovaviny ka nomeny an’i Abrama mba hovadîny; ary efa folo taona no nipetrahan’i Abrama tao amin’ny tany Kanahàna tamin’izay.

⁴Dia niray tamin’i Hagara i Abrama ka nitoe-jaza ravehivavy. Rehefa nahita ny tenany bevohòka i Hagara, dia nanao tsinontsinona ny tompovaviny.

⁵Ary hoy i Saray tamin’i Abrama: — Manodiava anao ny fahoriako! Nomeko ho andefimandrinao ny mpanompovaviko; ka nony nahita ny tenany bevohòka izy, dia nanao tsinontsinona ahy. Koa aoka ny TOMPO no hitsara ahy sy ianao!

⁶Fa namaly i Abrama nanao hoe: — Indro ny mpanompovavinao, eo ambany fahefànao izy ka ataovy izay tianao hatao aminy. Dia nampahorîn’i Saray i Hagara ka nitsoaka nandositra.

⁷Hitan’ny anjelin’ny TOMPO teo akaikin’ny loharano iray tao an-taniefitra izy, dia teo amin’ny lalana mankany Sora,

⁸ka nanontaniany hoe: — Ry Hagara, mpanompovavin’i Saray, avy taiza ianao, ary hankaiza? Dia namaly izy hoe: — Nandositra tsy ho eo anatrehan’i Saray tompovaviko aho.

⁹Fa hoy ilay anjelin’ny TOMPO taminy: — Miverena any amin’ny tompovavinao, ka maneke ny fahefàny.

¹⁰Homen’ny TOMPO taranaka marobe tsy tambo isaina ianao.

¹¹Indro efa bevohòka ianao, ka hiteraka zazalahy; ary ny anarany hataonao hoe Jismahela, satria nohenoin’ny TOMPO[60] ny fitarainanao.

¹²Ho toy ny boriky tsy folaka ny zanakao, ary hiady amin’ny olona rehetra sy hiadian’ny olona rehetra izy, nefa dia hitoetra misintaka amin’ny rahalahiny rehetra.

¹³Dia hoy i Hagara anakampo: «Moa nahita marina Ilay mahita ahy ve aho!» Ary dia nomeny ny TOMPO Izay niteny taminy izao anarana izao: «Ianao no ilay Andriamanitra mahita ahy.»

¹⁴Izany no niantsoana ilay fantsakana teo anelanelan’i Kadesy sy i Bareda hoe fantsakan’i Lahay-Rôy na fantsakan’Ilay Velona mahita ahy.

¹⁵Dia niteraka zazalahy i Hagara ka nataon’i Abrama hoe Jismahela[61] ny anarany.

¹⁶Efa enina amby valopolo taona i Abrama, raha niteraka io zazalahy io ho azy i Hagara.