Read Dikateny Iombonana Eto Madagasikara Genesỳ 17 Bible Online

Genesỳ 17 - Dikateny Iombonana Eto Madagasikara bible

Genesỳ 17

¹Rehefa feno 99 taona i Abrama, dia nisehoan’ny TOMPO ka nitenenany hoe: — Izaho no Andriamanitra Tsitoha; aoka handeha eo anatrehako ianao sady tsy hanan-tsiny;

²fa hotolorako ny fanekempihavanako ianao, ary hohamaroiko fatratra.

³Dia niankohoka i Abrama; ary hoy indray Andriamanitra taminy:

⁴— Amiko, dia izao no fanekempihavanako aminao: Hanjary razamben’ny firenena maro ianao.

⁵Tsy hatao hoe Abrama intsony ny anaranao fa hanjary Abrahama, satria hataoko razamben’ny firenena maro ianao[62].

⁶Hataoko maro taranaka fatratra ianao ka hanjary firenena maro, sady hisy mpanjaka hipoitra avy aminao.

⁷Hajoroko ny fanekempihavanako aminao mbamin’ny taranakao mandimby anao; ho fanekempihavanana maharitra mandrakizay izany, ka dia ho Andriamanitrao sy ny taranakao mandimby anao Aho[63].

⁸Homeko anao sy ny taranakao mandimby anao ny tany Kanahàna manontolo, dia izao tany ivahinianao izao, ho fananany mandrakizay; ary ho Andriamanitr’izy ireo Aho[64].

⁹Dia hoy koa Andriamanitra tamin’i Abrahama: — Hitandrina ny fanekempihavanako ianao sy ny taranakao mandimby anao hatrany hatrany.

¹⁰Izao no fepetra izay takîko hotandremanareo, dia ianao sy ny taranakao mandimby anao: hoforana ny lehilahy rehetra eo aminareo.

¹¹Ny famorana anareo no ho famantarana ny fanekempihavanana ifanaovako aminareo.

¹²Hoforana ny zazalahy rehetra eo aminareo isaky ny taranaka mifandimby, rehefa feno valo andro; tahaka izany koa ireo mpanompo teraka ao an-tranonao na novidînao vola ka tsy isan’ny fokonao.

¹³Hoforana ny mpanompo teraka tao aminao sy ireo novidînao vola mba hitoetra eo amin’ny nofonareo ho fanekempihavanana maharitra mandrakizay ny mariky ny fanekempihavanako.

¹⁴Fa izay lehilahy tsy voafora eo amin’ny nofony dia hoesorina tsy ho eo amin’ny fireneny, satria tsy nanaja ny fanekempihavanako.

¹⁵Dia hoy koa Andriamanitra tamin’i Abrahama: — I Saray vadinao dia tsy hantsoina intsony hoe Saray; fa hatao hoe Sarà[65] ny anarany.

¹⁶Hotahîko izy ary homeko zanakalahy avy aminy koa ianao. Hotahîko izy ka ho tonga razamben’ny firenena maro, ary hisy mpanjakam-pirenena avy amin’ny taranany.

¹⁷Dia niankohoka tamin’ny tany i Abrahama sady nihomehy, satria hoy izy anakampo hoe: «Moa mbola hisy zaza teraka avy amin’ny lehilahy zato taona ve? Ary i Sarà efa sivifolo taona ve dia mbola hiteraka?»

¹⁸Koa hoy i Abrahama tamin’Andriamanitra: — Enga anie i Jismahela no ho velona eo anatrehanao!

¹⁹Fa namaly Andriamanitra hoe: — Tsia, fa i Sarà vadinao dia hiteraka zazalahy ho anao ka ny anarany hataonao hoe Itsehàka[66]. Hotanako ny fanekempihavanako aminy sy amin’ny taranany mandimby azy ho fanekempihavanana maharitra mandrakizay.

²⁰Ary ny momba an’i Jismahela dia efa nohenoiko ny hatakao; indro hotahîko izy, ka hataoko maro anaka ary hampitomboiko fatratra ny taranany. Hiteraka andriana 12 izy sady ho razamben’ny firenen-dehibe iray.

²¹Fa ny fanekempihavanako kosa dia haoriko amin’i Itsehàka, izay haterak’i Sarà ho anao amin’ny herintaona toy izao.

²²Rehefa vitan’Andriamanitra ny resaka nifanaovany tamin’i Abrahama, dia nandao azy Izy.

²³Dia nalain’i Abrahama i Jismahela zanany lahy sy ireo mpanompony rehetra na izay teraka tao aminy na izay novidîny vola, dia ny lehilahy rehetra tao an-tranony; ka noforany avokoa ireo iny andro iny ihany araka izay nandidian’Andriamanitra azy.

²⁴Efa 99 taona i Abrahama, raha noforana;

²⁵ary i Jismahela kosa dia efa 13 taona.

²⁶Andro iray ihany no namorana azy mianaka,

²⁷mbamin’ny lehilahy rehetra tao an-tranon’i Abrahama, na ireo mpanompo teraka tao an-trano na ireo novidîny vola tamin’ny vahiny.