Read Dikateny Iombonana Eto Madagasikara Genesỳ 20 Bible Online

Genesỳ 20 - Dikateny Iombonana Eto Madagasikara bible

Genesỳ 20

¹Niala teo i Abrahama nankany amin’ny faritany atsimo, ka nonina tao anelanelan’i Kadesy sy i Soro, ary nivahiny tao Gerara.

²Nolazain’i Abrahama fa anabaviny[82] i Sarà vadiny; koa naniraka haka an’i Sarà i Abimelèka, mpanjakan’i Gerara.

³Niseho nofy tamin’i Abimelèka anefa Andriamanitra nony alina ka nanao taminy hoe: — Indro ho faty ianao noho ny amin’ny vehivavy izay nalainao, fa manam-bady izy io.

⁴I Abimelèka anefa tsy mbola nanatona akaiky an-dravehivavy akory, ka nilaza hoe: — Tompo ô, moa haringanao koa va ny tenako sy ny fireneko na dia tsy diso aza izahay?

⁵Moa tsy Abrahama va no nilaza tamiko an’i Sarà hoe anabaviny? Ary moa tsy ravehivavy io va no nilaza tamiko an’i Abrahama hoe anadahiny? Koa tamin’ny fo tsotra sy tanana madio no nanaovako izany.

⁶Mbola tamin’io nofy io ihany no nilazan’Andriamanitra tamin’i Abimelèka hoe: — Izaho koa dia mahalala fa tamin’ny fo tsotra no nanaovanao izany. Izaho ihany koa no nisakana anao tsy hanota amiko. Izany no tsy namelako anao hikasika azy.

⁷Koa ankehitriny avereno amin’ny vadiny ravehivavy. Mpaminany izy ka hivavaka ho anao, dia tsy ho faty ianao. Fa raha tsy averinao kosa izy, dia fantaro fa ho faty tokoa ianao sy izay rehetra anao.

⁸Dia nifoha vao maraina be i Abimelèka, ka niantso ny mpanompony rehetra ary nanambara ny zavatra rehetra taminy; dia raiki-tahotra mafy ireo olona ireo.

⁹Nampiantso an’i Abrahama i Abimelèka, ka nanao taminy hoe: — Inona izao nataonao anay izao? Inona no fahotana nataoko taminao no dia saika nampidiranao heloka lehibe toy izao ny tenako sy ny fanjakako? Zavatra tsy fanao no nataonao tamiko.

¹⁰Inona, hoy aho, no kendrenao tamin’ny nanaovanao izao zavatra izao?

¹¹Namaly kosa i Abrahama hoe: — Nihevitra anakampo aho fa tsy misy olona matahotra an’Andriamanitra amin’ity toerana ity, koa hovonoin’ireo aho noho ny amin’ny vadiko.

¹²Marina ihany anefa fa anabaviko izy, iray ray izahay; saingy tsy iray reny amiko izy, ka izany no nahatonga azy ho vadiko.

¹³Rehefa nasain’Andriamanitra nandao ny tranon-draiko aho, dia hoy aho tamin’ny vadiko: «Izao no rohim-pihavanana hampiasainao amiko: Any amin’ny toerana rehetra izay halehantsika dia lazao hoe anadahinao aho.»

¹⁴Dia naka ondry sy osy aman’omby ary mpanompolahy sy mpanompovavy i Abimelèka, ka nomeny an’i Abrahama; naveriny taminy koa i Sarà vadiny.

¹⁵Ary hoy i Abimelèka tamin’i Abrahama: — Indro mivoha ho anao ny taniko, koa mipetraha amin’izay mahafinaritra ny masonao.

¹⁶Hoy kosa izy tamin’i Sarà: — Hitanao fa nomeko volafotsy arivo ny anadahinao mba ho tampi-maso amin’izay rehetra havanao fa tsy manantsiny ianao amin’izao raharaha izao[83].

¹⁷Nataon’ny TOMPO momba koa ny vehivavy rehetra tao an-tranon’i Abimelèka noho ilay raharahan’i Sarà vadin’i Abrahama. Dia nivavaka tamin’Andriamanitra i Abrahama; koa nositranin’Andriamanitra i Abimelèka sy ny vadiny ary ireo mpanompovaviny, ka afa-niteraka indray.