Read Dikateny Iombonana Eto Madagasikara Genesỳ 24 Bible Online

Genesỳ 24 - Dikateny Iombonana Eto Madagasikara bible

Genesỳ 24

¹Ary efa tena antitra be i Abrahama, sady notahîn’ny TOMPO tamin’ny zavatra rehetra.

²Indray andro dia hoy i Abrahama tamin’ilay mpanompony tranainy indrindra tao an-tranony, izay mpifehy ny fananany rehetra: — Apetraho ato ambany feko ny tananao,

³ka mianiàna amin’ny TOMPO Andriamanitry ny lanitra sy ny tany ianao fa tsy haka vady ho an’ny zanako avy amin’ny zanakavavin’ny Kanahanita izay miara-monina amiko.

⁴Fa handeha ho any amin’ny tany fiaviako sy amin’ny havako ianao, ka haka vady ho an’i Itsehàka zanako.

⁵Dia namaly azy ilay mpanompo hoe: — Angamba tsy te hiaraka amiko ho atỳ amin’ity tany ity razazavavy, koa moa tsy maintsy haveriko any amin’ny tany izay efa nilaozanao ve ny zanakao?

⁶Dia hoy i Abrahama namaly azy: — Tandremo tsara mba tsy haverinao any ny zanako.

⁷Ny TOMPO, Andriamanitry ny lanitra, no naka ahy tao an-tranon’ny raiko sy tao an-tanindrazako. Niteny tamiko Izy sady nianiana tamiko fa hanome ity tany ity ho an’ny taranako. Izy no haniraka ny anjeliny eo alohanao, ka any no hakanao vady ho an’ny zanako.

⁸Raha tsy manaiky hanaraka anao ilay razazavavy, dia afaka amin’izao fianianana izao ianao; fa ny zanako kosa aza entinao miverina any.

⁹Dia napetrak’ilay mpanompo tao ambany fen’i Abrahama tompony ny tanany, ary nianiana taminy momba io raharaha io izy.

¹⁰Dia naka rameva folo tamin’ny ramevan’ny tompony izy sady nitondra izay zavatra tsara indrindra nananan’ny tompony, dia niainga hankany Mezôpotamia ambony, any amin’ny tanànan’i Nahôra[96].

¹¹Nony tonga teo akaikin’ny fantsakana teo ivelan’ny tanàna izy, dia nampandohalika ny rameva, fa fotoana hariva fivoahan’ny vehivavy mantsaka tamin’izay.

¹²Izao no vavaka nataony: — Ry TOMPO Andriamanitr’i Abrahama tompoko ô, mba ambino aho anio, ka manehoa fahasoavana amin’i Abrahama tompoko.

¹³Inty aho eto akaikin’ny fantsakana; ary ireo zatovovavy zanaky ny mponina ao an-tanàna dia hivoaka hantsaka rano eto.

¹⁴Koa izay zatovovavy hangatahako mba hampidina kely ny sininy hisotroako, ka hamaly hoe: «Misotroa ary aoka ny ramevanao hampisotroiko ihany koa!», dia amin’izay no hahafantarako fa izy no voatendrinao ho an’i Itsehàka mpanomponao ary efa naneho fahasoavana tamin’ny tompoko Ianao.

¹⁵Fa raha mbola tsy nifarana akory ny teniny, dia indro tamy i Rebekà milanja siny eny an-tsorony. Io Rebekà io dia zanakavavin’i Betoela zanakalahin’i Milkà izay vadin’i Nahôra rahalahin’i Abrahama.

¹⁶Tsara tarehy tokoa razazavavy sady virijiny fa tsy mbola nisy lehilahy niray taminy. Ary nidina teo am-pantsakana izy ka nameno ny sininy, dia niakatra.

¹⁷Fa nihazakazaka hihaona amin-drazazavavy ilay mpanompon’i Abrahama ka nanao hoe: — Mba ampisotroy rano kely avy amin’ny sininao aho azafady!

¹⁸Ary hoy razazavavy hoe: — Misotroa, tompoko. Nampidininy haingana ny siny ho eo an-tanany, dia nampisotroiny ralehilahy.

¹⁹Ary rehefa vitany izany, dia hoy indray razazavavy hoe: — Hantsaka ho an’ny ramevanao koa aho ambara-pisotron’izy rehetra.

²⁰Dia naidiny faingana tao anaty tavy fisotroam-biby ny rano tao an-tsiny ary nihazakazaka nantsaka indray izy, ka nantsakany avokoa ireto rameva rehetra.

²¹Ary nandinika tsara an-drazazavavy tamim-panginana ilay rangahy mba hahafantarany raha nambinin’ny TOMPO tokoa ny diany na tsia.

²²Rehefa tapitra nisotro ny rameva, dia naka kavin’orona volamena iray tokony ho folo grama sy haba volamena roa tokony ho zato grama avy izy ho an-drazazavavy,

²³sady nanontany azy hoe: — Mba lazao ahy hoe: Zanak’iza moa ianao? Ary misy toerana azonay andriana ve ao an-tranon-drainao?

²⁴Dia namaly razazavavy hoe: — Zanakavavin’i Betoela aho, sady zafikelin’i Milkà sy i Nahôra.

²⁵Ary mbola nampiany hoe: — Na ny mololo na ny vilona dia samy betsaka ao aminay sady misy toerana handrianareo koa.

²⁶Niondrika ilay rangahy ary niankohoka nisaotra ny TOMPO

²⁷nanao hoe: — Hisaorana anie Ianao, ry TOMPO Andriamanitr’i Abrahama tompoko, fa tsy namela ny fitiavanao sy ny toetranao mahatoky hiala tamin’ny tompoko Ianao, fa teny an-dalana aho dia nentinao hankaty amin’ny tranon’ireo havan’ny tompoko.

²⁸Dia lasa nihazakazaka nankany an-tranon-dreniny razazavavy hilaza ny vaovao.

²⁹Ary nanana anadahy atao hoe Labàna anefa i Rebekà; dia nihazakazaka io nankany amin’ilay rangahy tany ivelany, teo am-pantsakana.

³⁰Tazany manko ny kavin’orona sy ireo haba teny an-tanan’ny anabaviny ary henony koa ny nitantarany izay voalazan’ilay rangahy. Dia tonga teo amin’ilay rangahy i Labàna; ary mbola mijoro eo anilan’ny fantsakana miaraka amin’ny ramevany izy

³¹no nitenenany hoe: — Mandrosoa ao an-trano, ry ilay notahîn’ny TOMPO. Nahoana ianao no mijanona etỳ ivelany? Izaho anie efa nanomana ny trano sy namboatra toerana ho an’ny rameva e!

³²Dia nandroso tao an-trano ilay mpanompon’i Abrahama. Novahana ny rameva, ka nomena mololo sy vilona; ary nitondrana rano hisasan-tongotra koa ilay rangahy sy ireo olona niaraka taminy.

³³Norosoana sakafo izy nefa nilaza hoe: — Tsy mbola hihinana aho aloha, raha tsy efa voalazako izay tokony holazaiko. Ka hoy i Labàna hoe: — Lazao àry.

³⁴Dia namaly ilay rangahy hoe: — Mpanompon’i Abrahama aho.

³⁵Efa notahîn’ny TOMPO tokoa ny tompoko ka tonga olo-malaza. Nomen’ny TOMPO azy ny andian’ondry aman’osy sy omby ary koa volafotsy sy volamena, mpanompolahy sy mpanompovavy betsaka, ary rameva sy boriky.

³⁶Ary i Sarà vadiny, na dia efa antitra aza, dia niteraka zazalahy taminy; ary izy io no namindrany ny fananany rehetra.

³⁷Nampianiana ahy ny tompoko mba tsy haka vady ho an’ny zanany lahy avy ao amin’ny tanin’ny Kanahanita izay onenany. Ka hoy izy tamiko:

³⁸«Mianiàna amiko fa any amin’ny fianakavian-draiko, any amin’ny foko nipoirako, no halehanao haka vady ho an’ny zanako.»

³⁹Dia nanontany azy aho hoe: «Ary raha ohatra ka tsy mety hanaraka ahy razazavavy?»

⁴⁰Dia novaliany hoe: «Eo anatrehan’ny TOMPO hatrany no izorako, ka Izy haniraka ny anjeliny hiaraka aminao sy hampahomby ny dianao; ny zanako dia hitondranao vady avy amin’ny foko nipoirako sy ny fianakavian-draiko.

⁴¹Ary rehefa mandeha any amin’ny foko nipoirako ianao, na dia tsy omeny aza, dia afaka amin’ny fampianianako.»

⁴²Koa raha vao tonga teo akaikin’ny fantsakana aho androany, dia nivavaka hoe: «Ry TOMPO Andriamanitr’i Abrahama tompoko ô, mba ataovy mahomby ny anton-diako.

⁴³Inty aho mby eto anilan’ny fantsakana, hisy zazavavy hivoaka hantsaka ka hiangaviako mba hampisotro ahy rano kely avy amin’ny sininy.

⁴⁴Koa raha mamaly ahy izy hoe: ‹Misotroa ianao, ary ny ramevanao koa hantsakako›, dia izy no vehivavy voatendrinao, ry TOMPO, ho an’ny zanakalahin’ny tompoko.»

⁴⁵Raha mbola tsy tapitra akory anefa ny teniko anakampo, dia tamy i Rebekà niantsoroka siny, dia nidina nankeo am-pantsakana ka nantsaka; ary hoy aho taminy: «Mba omeo aho hosotroiko, aza fady!»

⁴⁶Dia nampidininy faingana avy teny an-tsorony ny siny ka hoy izy hoe: «Misotroa, ary hampisotroiko koa ny ramevanao.» Dia nisotro aho ary nampisotroiny koa ny rameva.

⁴⁷Ary rehefa nanontany azy aho hoe: «Zanak’iza moa ianao?», dia novaliany hoe: «Zanakavavin’i Betoela aho, ary zafikelin’i Nahôra sy i Milkà.» Dia napetrako teo amin’ny oron-drazazavavy ny kavina ary nataoko teny an-tanany ny haba.

⁴⁸Nandohalika aho hitsaoka ny TOMPO, Andriamanitr’i Abrahama tompoko, ary nisaotra Azy noho ny nitondrany ahy tamin’ny lalana marina haka ny zanakavavin’ny rahalahin’ny tompoko mba ho an-janany.

⁴⁹Koa ankehitriny lazao ahy raha vonona haneho fitia sy firaiketam-po amin’ny tompoko ianareo. Fa raha tsy izany kosa dia handeha ho any an-kafa aho.

⁵⁰Dia namaly i Labàna sy i Betoela hoe: — Avy amin’ny TOMPO no niavian’izao zavatra izao ka tsy azonay iadian-kevitra.

⁵¹Indro i Rebekà eo anoloanao, ento miaraka aminao izy ary aoka ho vadin’ny zanakalahin’ny tomponao, araka izay nambaran’ny TOMPO.

⁵²Rehefa nandre izany teny izany ilay mpanompon’i Abrahama, dia niankohoka tamin’ny tany hisaotra ny TOMPO.

⁵³Avy eo dia namoaka firavaka volafotsy sy volamena ary fitafiana izy ka nomeny an’i Rebekà; nomeny zavatra sarobidy maro koa ny anadahiny sy ny reniny.

⁵⁴Izay vao nihinana sy nisotro ilay mpanompon’i Abrahama sy ireo olona niaraka taminy; avy teo dia lasa natory. Ny ampitso maraina, rehefa nifoha izy ireo, dia hoy ilay mpanompon’i Abrahama hoe: — Alefaso àry aho hiverina any amin’ny tompoko.

⁵⁵Fa namaly kosa ny anadahin-drazazavavy sy ny reniny hoe: — Aoka hipetraka hiaraka aminay kelikely tokony ho folo andro aloha razazavavy, vao mandeha.

⁵⁶Fa namaly azy ireo indray ilay mpanompo hoe: — Aza tananareo aho, fa ny TOMPO efa nanambina ny diako; alefaso aho hiverina ho any amin’ny tompoko.

⁵⁷Hoy kosa ireo hoe: — Aoka àry hantsoinay razazavavy, aoka hanontaniana izay heviny!

⁵⁸Dia nantsoin’ireo i Rebekà ka nanontaniany hoe: — Moa handeha hiaraka amin’io lehilahy io ve ianao? Ary hoy i Rebekà hoe: — Eny, handeha aho.

⁵⁹Koa navelan’ireo handeha i Rebekà sy ny mpitaiza azy hiaraka amin’ilay mpanompon’i Abrahama sy ny olony.

⁶⁰Nitsodrano an’i Rebekà ireo ka nanao taminy hoe: — Ho tonga renin’ny olona an’alinalina anie ianao, rahavana, ary ny taranakao anie hahazo ny tanànan’izay mankahala azy!

⁶¹Dia niainga i Rebekà sy ireo mpanompovaviny ka nitaingin-drameva, ary lasa nandeha niaraka tamin’ilay mpanompon’i Abrahama.

⁶²I Itsehàka kosa niala tao amin’ny fantsakan’i Lahay-Roy[97], ka nonina tao amin’ny faritany atsimo.

⁶³Indray hariva raha nivoaka hitsangantsangana teny an-tsaha izy, dia nanopy maso ka nahita rameva nanatona.

⁶⁴Rehefa nahatazana an’i Itsehàka i Rebekà, dia nidina niala tamin’ny rameva,

⁶⁵ary nanontany ilay mpanompo hoe: — Iza moa io lehilahy mandeha etỳ an-tsaha avy mitsena antsika io? Ka hoy ilay mpanompo hoe: — Io no tompoko. Dia noraisin’i Rebekà ny voaly, ka nisaronany tarehy.

⁶⁶Notantarain’ilay mpanompo an’i Itsehàka avokoa ny zavatra rehetra izay nataony.

⁶⁷Avy eo dia nampandrosoin’i Itsehàka tao an-dain’i Sarà reniny i Rebekà, ka nalainy ho vady sy notiaviny; dia nampionona an’i Itsehàka izany taorian’ny nahafatesan-dreniny.