Read Dikateny Iombonana Eto Madagasikara Genesỳ 25 Bible Online

Genesỳ 25 - Dikateny Iombonana Eto Madagasikara bible

Genesỳ 25

¹Mbola naka vady hafa indray i Abrahama, ka i Ketorà no anarany.

²Niteraka enin-dahy tamin’i Abrahama izy, dia ireto avy izany: i Zimràna sy i Jôksàna, i Medàna sy i Midiàna ary i Jisbàka sy i Soa.

³I Jôksàna no rain’i Sebà sy i Dedàna; ny Asorita sy ny Letosita ary ny Leomita no taranak’i Dedàna.

⁴Ny zanakalahin’i Midiàna dia i Hefà sy i Hefera, i Hanôka sy i Abidà ary i Eldahà. Ireo rehetra ireo no taranak’i Ketorà.

⁵Nomen’i Abrahama an’i Itsehàka avokoa izay rehetra nananany.

⁶Dieny mbola velona kosa i Abrahama no samy notolorany fanomezana ireo zanaky ny vadikeliny ary nampanalaviriny an’i Itsehàka zanany hankany amin’ny tany atsinanana.

⁷Nahatratra dimy amby fitopolo amby zato taona no nahaveloman’i Abrahama,

⁸dia niala aina izy ka maty tamim-pahanterana rehefa fotsy volo tsara sy voky andro, ary voakambana tamin’ny razany.

⁹I Itsehàka sy i Jismahela zanany no nandevina azy tao amin’ny lava-baton’i Makpelà, ao amin’ny sahan’i Hefrôna zanakalahin’i Tsôhara izay Hetita, dia ilay saha ao akaikin’i Mamre.

¹⁰Novidîn’i Abrahama tamin’ny taranak’i Heta[98] io saha io, ary tao no nandevenana an’i Abrahama sy i Sarà vadiny.

¹¹Taorian’ny nahafatesan’i Abrahama, dia notahîn’Andriamanitra i Itsehàka zanany, izay nonina tao akaikin’ny fantsakana Lahay-Rôy[99].

¹²Izao no lisitry ny taranak’i Jismahela, zanakalahin’i Abrahama, naterak’i Hagara ilay Ejiptianina mpanompovavin’i Sarà.

¹³Ireto avy no anaran’ny zanakalahin’i Jismahela araka ny laharan’ny nahaterahany: i Nebaiôta sy i Kedara, i Adbeèla sy i Mibsàna,

¹⁴i Mismà sy i Domà, i Masà

¹⁵sy i Hadada, i Temà sy i Jetora ary i Nafisy sy i Kedmà.

¹⁶Ireo no zanak’i Jismahela 12 lahy, samy lehiben-tarika avy. Samy mitondra ny anarany avy ny tanànany sy ny tobiny.

¹⁷Nahatratra 137 taona i Jismahela vao niala aina, ary maty ka nakambana tamin’ny razany.

¹⁸Ny nipetrahan’ny taranak’i Jismahela dia ny faritra manomboka eo Havilà ka hatrany Sora; i Sora dia any akaikin’i Ejipta tamin’iny lalana mankany Asora iny. Nihataka tamin’ireo taranak’i Abrahama hafa no nitoerany.

¹⁹Izao no tantaran’i Itsehàka: I Itsehàka dia zanakalahin’i Abrahama.

²⁰Rehefa feno efapolo taona izy dia nanambady an’i Rebekà, anabavin’i Labàna sady zanakavavin’i Betoela izay Aramianina tao Padàna-Arama.

²¹Nitaraina tamin’ny TOMPO ho an’ny vadiny i Itsehàka satria tsy niteraka izy. Dia nohenoin’ny TOMPO ny fitarainany, koa nitoe-jaza i Rebekà vadiny.

²²Nifandàka ireo zaza kambana tao an-kibony, ka hoy Rebekà hoe: — Raha toy izany, nahoana re aho no nitoe-jaza? Dia lasa nanontany ny TOMPO izy.

²³Fa namaly azy ny TOMPO hoe: Firenena roa no ao an-kibonao, vahoaka roa tonta no haterakao. Ny ankilany hahery noho ny andaniny, ny zokiny hanompo ny zandriny[100].

²⁴Nony tonga ny andro hiterahany, dia niteraka zaza kambana tokoa i Rebekà.

²⁵Ilay teraka voalohany dia menamena, voloina toy ny lamba volom-biby ka natao hoe Hesao ny anarany[101].

²⁶Taorian’izany dia teraka koa ny rahalahiny; nohazoniny ny voditongotr’i Hesao ka natao hoe Jakôba[102] ny anarany. Efa enimpolo taona i Itsehàka tamin’ny nahaterahan’izy mirahalahy.

²⁷Nitombo ireo zaza, ka i Hesao dia tonga mpihaza mahay sady mpianefitra; fa i Jakôba kosa dia lehilahy bonaika, mpipetraka an-day.

²⁸I Itsehàka dia tia an’i Hesao, satria nankafy ny hazany; fa i Rebekà kosa tia an’i Jakôba.

²⁹Teo am-pandrahoana sakafo indrindra i Jakôba indray andro, no tonga avy any an-tsaha i Hesao sady reraka mafy,

³⁰ka nangataka taminy hoe: — Mba omeo kely amin’io sakafo efa menafify io aho fa reraka. (Izany no niantsoana azy tamin’ny anaram-bositra hoe Edôma na Ilaimena[103]).

³¹Dia namaly azy i Jakôba hoe: — Amidio amiko àry aloha ny fizokianao.

³²Dia hoy i Hesao hoe: — Inty hono aho ka ho faty, dia hataoko inona moa izay fizokiana?

³³Fa namaly indray i Jakôba hoe: — Mianiàna amiko àry ianao izao anio izao. Dia nianiana taminy izy ka nivarotra tamin’i Jakôba ny fizokiany.

³⁴Ary nomen’i Jakôba mofo sy voanemba masaka i Hesao ka nihinana sy nisotro. Avy eo izy dia niainga ary lasa nandeha fa tsy niraharaha ny fizokiany[104].