Read Dikateny Iombonana Eto Madagasikara Genesỳ 26 Bible Online

Genesỳ 26 - Dikateny Iombonana Eto Madagasikara bible

Genesỳ 26

¹Nisy mosary teo amin’ny tany, hafa noho izay niseho tamin’ny andron’i Abrahama; koa lasa i Itsehàka nankany amin’i Abimelèka mpanjakan’i Filistinina[105] tao Gerara.

²Niseho taminy ny TOMPO ka nanao hoe: — Aza mandeha midina any Ejipta, fa monena eo amin’ny tany izay hambarako anao.

³Mivahinia eto amin’ity tany ity fa homba anao Aho ary hitahy anao, satria ny taranakao no homeko ireo faritany rehetra ireo, fa hotanterahiko ny fampanantenana efa nianianako tamin’i Abrahama rainao.

⁴Hataoko marobe tahaka ny kintana eny an-danitra ny taranakao ary homeko ireto faritany rehetra ireto. Amin’ny alalan’ireo taranakao no hitahiako ny firenena rehetra eto ambonin’ny tany[106],

⁵satria efa nihaino ny feoko i Abrahama, ka nitandrina ny baikoko sy ny didiko ary ny fitsipiko sy ny lalànako.

⁶Nonina tao Gerara i Itsehàka.

⁷Nanontany azy momba ny vadiny ny olona tamin’izany toerana izany, fa novaliany hoe: «Anabaviko izy[107].» Natahotra ny hilaza azy hoe vadiny izy, fandrao hovonoin’ny olona tamin’izany toerana izany ho faty ny tenany noho ny amin’i Rebekà fa tsara tarehy loatra ravehivavy.

⁸Ary rehefa ela no nitoeran’i Itsehàka tao, dia nitsirika teo am-baravarankely i Abimelèka indray andro ka nahita an’i Itsehàka nisangisangy an’i Rebekà vadiny.

⁹Nampanantsoin’i Abimelèka i Itsehàka ka nilazany hoe: — Hay tena vadinao tokoa izy, koa nahoana no nolazainao hoe anabavinao? Hoy kosa ny navalin’i Itsehàka azy: — Nilaza izany aho fandrao vonoina ho faty noho ny aminy.

¹⁰Dia hoy indray i Abimelèka hoe: — Inona ity nataonao taminay? Efa nisy lehilahy anankiray tamin’ny vahoaka saika handry tamin’ny vadinao, ka ho nahatonga heloka taminay ianao.

¹¹Ary i Abimelèka mpanjaka nandidy ny vahoaka rehetra hoe: — Izay mikasikasika an’ity lehilahy ity sy ny vadiny dia hovonoina ho faty tokoa.

¹²Tamin’izany taona izany dia namafy tao amin’io tany io i Itsehàka, ka nahazo zato heny satria notahîn’ny TOMPO.

¹³Tsy nitsaha-nitombo ny fananany ka tonga mpanan-karena be izy.

¹⁴Nanana andian’ondry aman’osy sy andian’omby ary mpanompo maro izy, ka nialonan’ny Filistinina.

¹⁵Izany no antony nanotofan’izy ireo tany ny lavaka fantsakana izay nohadîn’ny mpanompon’i Abrahama rainy fony fahavelony.

¹⁶Dia niteny tamin’i Itsehàka i Abimelèka hoe: — Mialà eto aminay satria efa tonga mahery lavitra noho izahay ianao izao.

¹⁷Koa niala teo i Itsehàka, dia nanorin-day tao an-dohasahan’i Gerara ka nipetraka tao.

¹⁸Nasainy nosokafana ireo fantsakana izay voahady fony fahavelon’i Abrahama rainy fa nototofan’ny Filistinina taorian’ny nahafatesany. Ary naveriny tamin’ireny fantsakana ireny indray ny anarana izay efa nomen-drainy azy.

¹⁹Indray andro dia nihady lavaka fantsakana tao an-dohasaha ireo mpanompon’i Itsehàka ka nahita loharano velona.

²⁰Dia niady tamin’ireo mpiandry ondrin’i Itsehàka ireo mpiandry ondry tao Gerara ka nanao hoe: — Anay ny rano. Dia nantsoin’i Itsehàka hoe Hesèka izany hoe Fifandirana ny fantsakana, satria nifandiran’ireo izy.

²¹Dia nihady lavaka fantsakana hafa koa ireo mpanompon’i Itsehàka, nefa nilàn’ireo sotasota indray. Io fantsakana io dia nantsoina hoe Sitnà, izany hoe Sotasota.

²²Koa niala tao izy ary nampandavaka fantsakana hafa indray; fa tsy mba niadian’ireo kosa io ka nantsoin’i Itsehàka hoe Rehôbôta na Fahalalahana, satria hoy izy hoe: «Ankehitriny ny TOMPO dia efa nanome toera-malalaka ho antsika mba hahazoantsika fahombiazana eto amin’ity tany ity.»

²³Dia niala teo izy ka nankany Beera-Seba.

²⁴Nisehoan’ny TOMPO izy nony alina ka nilazany hoe: — Izaho no Andriamanitr’i Abrahama rainao. Aza matahotra fa miaraka aminao Aho, ary mitahy anao. Hampitomboiko ny taranakao noho ny fampanantenana efa nataoko tamin’i Abrahama mpanompoko.

²⁵Nanorina alitara teo i Itsehàka ka nivavaka tamin’Andriamanitra sady niantso Azy hoe TOMPO. Namelatra ny lainy izy ary nihady lavaka fantsakana hafa koa ireo mpanompony.

²⁶Niainga avy tao Gerara i Abimelèka ka nankany amin’i Itsehàka niaraka tamin’i Ahozata sakaizany sy i Pikôla komandin’ny tafiny. [108]

²⁷Nanontany azy ireo i Itsehàka hoe: — Inona moa no alehanareo aty amiko, kanefa ianareo nankahala sy nandroaka ahy?

²⁸Dia novalian’ireo hoe: — Tsapanay tokoa fa momba anao ny TOMPO; koa nihevitra izahay fa tokony hanao fifanekena ombàm-pianianana isika.

²⁹Mianiàna àry aminay fa tsy hanisy ratsy anay ianao tahaka ny tsy nampijalianay anao. Tsy nisy afa-tsy ny soa no nataonay taminao ka nalefanay ombàm-piadanana ianao, izay efa notahîn’ny TOMPO ankehitriny.

³⁰Dia nanao fanasana ho an’i Abimelèka i Itsehàka, ka nihinana sy nisotro izy.

³¹Nifoha maraina avy izy ireo ny ampitso ary samy nifanao velirano. Avy eo nalefan’i Itsehàka izy telo mianaka, ka lasa nody ombàm-piadanana.

³²Androtr’iny ihany dia tonga ireo mpanompon’i Itsehàka nanambara taminy ny vaovao momba ny fantsakana izay nolavahany ka nilaza hoe: — Nahita rano izahay.

³³Nantsoin’i Itsehàka hoe Sibehà (na hoe Fianianana) ilay fantsakana. Izany no nanaovana ny anaran’ny tanàna hoe Beera-Seba na hoe Fantsakana fianianana mandraka androany.

³⁴Feno 40 taona i Hesao raha nampakatra vehivavy hetita anankiroa ho vadiny, dia i Jehodita zanakavavin’i Bery sy i Basemàta zanakavavin’i Elôna.

³⁵Nangidy hoditra tamin’i Itsehàka sy i Rebekà izy roa vavy ireo.