Read Dikateny Iombonana Eto Madagasikara Genesỳ 29 Bible Online

Genesỳ 29 - Dikateny Iombonana Eto Madagasikara bible

Genesỳ 29

¹Ary niainga i Jakôba ka nankany amin’ny tany atsinanana, dia ny tanindrazan-dreniny.

²Indray andro izy, dia nahatazana fantsakana teny an-tsaha, ary indreo nisy ondry aman’osy andiany telo nandry teo anilany, fa io fantsakana io no fampisotroana ny biby fiompy. Misy vato lehibe manarona ny vavan’ny fantsakana.

³Rehefa tafangona avokoa ireo andiany rehetra, dia esorina ny vato amin’ny vava fantsakana ary ampisotroina ny andian’ondry aman’osy; aorian’izany, dia averina ho amin’ny toerany eo amin’ny vava fantsakana ilay vato.

⁴Nanontany an’ireo mpiandry ondry i Jakôba hoe: — Ry rahalahy, avy aiza moa ianareo? Ka hoy ireo hoe: — Avy any Haràna izahay.

⁵Dia niteny indray i Jakôba hoe: — Fantatrareo ve i Labàna, zafin’i Nahôra? Ka novalian’ireo hoe: — Eny, fantatray izy.

⁶Fa nanontany ihany i Jakôba hoe: — Salama ihany ve izy? Dia hoy ireo taminy: — Salama izy, ary inty i Rahely zanany vavy fa tonga miaraka amin’ny andian’ondriny.

⁷Ary hoy Jakôba hoe: — Mbola antoandro loatra ny andro, ka tsy mbola fotoana fanangonana ny biby fiompy; fa ampisotroy aloha ireo, dia andraso ihany.

⁸Fa novalian’ireo hoe: — Tsy azonay atao izany, raha tsy efa tafangona avokoa ny andiany rehetra; amin’izay dia hoesorina ny vato eo amin’ny vava fantsakana, ary hampisotro ny ondry aman’osy izahay.

⁹Raha mbola niresaka tamin’ireo i Jakôba, dia tonga i Rahely niaraka tamin’ny ondrin-drainy, fa mpiandry ondry izy.

¹⁰Ary rehefa nahita an’i Rahely zanakavavin’i Labàna anadahin-dreniny sy ireo ondry aman’osiny i Jakôba, dia nanatona nanaisotra ny vato teo amin’ny vava fantsakana, ka nampisotro ireo ondry aman’osin’ny anadahin-dreniny.

¹¹Dia nanoroka an’i Rahely i Jakôba sady nitomany.

¹²Notantarain’i Jakôba tamin’i Rahely fa havan-drainy izy ary zanakalahin’i Rebekà. Dia nihazakazaka i Rahely ka nitantara izany tamin-drainy.

¹³Rehefa nandre ny amin’i Jakôba zanak’anabaviny kosa i Labàna, dia nihazakazaka nitsena azy, ka namihina sady nanoroka azy ary nitondra azy ho any an-tranony. Notantarain’i Jakôba tamin’i Labàna avokoa ny zava-nitranga,

¹⁴ka hoy i Labàna taminy: — Marina tokoa fa havako ianao, ary iray ra amiko. Dia nipetraka iray volana tao aminy i Jakôba.

¹⁵Indray andro dia hoy i Labàna tamin’i Jakôba: — Noho ny maha havako anao ve dia hanompo ahy maimaim-poana ianao? Koa lazao amiko, inona no ho karamanao?

¹⁶Nanana zanakavavy roa anefa i Labàna; ilay zokiny dia nantsoina hoe Leà ary ilay zandriny natao hoe Rahely.

¹⁷I Leà dia malefa-pijery, fa i Rahely kosa tsara tarehy sady bikàna.

¹⁸Ary tia an’i Rahely i Jakôba ka niteny tamin’i Labàna hoe: — Hanompo anao fito taona aho mba hahazoako manambady an’i Rahely faravavinao.

¹⁹Dia namaly azy i Labàna hoe: — Aleoko homena anao izy toy izay ho an’olon-kafa, fa mitoera eto amiko.

²⁰Koa mba hahazoany an’i Rahely, dia nanompo an’i Labàna fito taona i Jakôba; nefa toy ny andro vitsivitsy nandalo izany teo imasony, satria tena tiany razazavavy.

²¹Rehefa afaka izany, dia hoy i Jakôba tamin’i Labàna: — Aiza amin’izay ny vadiko hampakariko, fa efa tapitra ny fe-potoana.

²²Dia nasain’i Labàna ho amin’ny sakafom-panambadiana ny olona rehetra teo an-toerana.

²³Nony hariva dia nalain’i Labàna i Leà zanany vavy ka nentiny tany amin’i Jakôba ary nandry taminy izy.

²⁴Nomen’i Labàna an’i Leà zanany vavy kosa i Zilpà mba ho mpanompovavy hanampy azy.

²⁵Nony maraina vao gaga i Jakôba fa hay i Leà no tao aminy, ka hoy izy tamin’i Labàna: — Inona izao nataonao tamiko izao? Fa angaha tsy i Rahely no nanompoako anao, koa nahoana ianao no namitaka ahy?

²⁶Dia namaly i Labàna hoe: — Tsy fomban-tany aty aminay ny mampanambady ny zandriny alohan’ny zokiny.

²⁷Vitao aloha ny herinandron’ny volantantely amin’ny zokiny, dia homenay anao koa ny zandriny raha manompo ahy fito taona hafa indray ianao.

²⁸Dia nataon’i Jakôba izany, ka novitainy ny herinandron’ny volantantely tamin’i Leà; avy eo dia nomen’i Labàna azy koa i Rahely ho vadiny.

²⁹Nomen’i Labàna an’i Rahely i Bilehà mba ho mpanompovavy hanampy azy.

³⁰Dia nandry tany amin’i Rahely koa i Jakôba ka tiany lavitra noho i Leà izy. Ary nanompo an’i Labàna fito taona hafa koa i Jakôba.

³¹Ary rehefa hitan’ny TOMPO fa tsy tiana noho i Rahely i Leà, dia nataony mitoe-jaza izy; fa i Rahely kosa nataony momba.

³²Dia bevohòka i Leà, ka tera-dahy ary ny anarany nataony hoe Reobena, satria hoy izy hoe: — Ny TOMPO efa nijery ny fahoriako[119], ary ankehitriny dia ho tia ahy ny vadiko.

³³Ary bevohòka indray izy ka tera-dahy, dia niteny hoe: — Efa ren’ny TOMPO fa tsy tiana aho, ka nomeny an’ity indray koa. Dia nataony hoe Simehôna ny anarany[120].

³⁴Mbola bevohòka indray izy ka tera-dahy fanintelony, dia nanao hoe: — Ankehitriny dia hifikitra amiko ny vadiko, satria efa niteraka telo lahy ho azy aho. Noho izany dia nataony hoe Levỳ ny anarany[121].

³⁵Fa mbola bevohòka indray izy, dia niteraka zazalahy fahefatra, ka nanao hoe: — Amin’ity kosa dia hidera ny TOMPO aho. Dia nataony hoe Joda[122] ny anarany. Dia nitsahatra tsy niteraka intsony izy.