Read Dikateny Iombonana Eto Madagasikara Genesỳ 35 Bible Online

Genesỳ 35 - Dikateny Iombonana Eto Madagasikara bible

Genesỳ 35

¹Indray andro dia hoy Andriamanitra tamin’i Jakôba: — Miaingà, miakara any Betela ka mitoera any; ary manaova alitara eo ho an’ilay Andriamanitra Izay niseho taminao fony ianao nandositra an’i Hesao rahalahinao[149].

²Dia hoy i Jakôba tamin’ny ankohonany sy izay rehetra niaraka taminy: — Ario avokoa ireo andriamani-kafa eo aminareo, ka midiova ary misoloa fitafiana.

³Ndeha isika hiainga hiakatra any Betela; fa hanamboatra alitara any aho ho an’Andriamanitra Izay nihaino ahy tamin’ny androm-pahoriako sady nomba ahy tamin’izay rehetra nalehako.

⁴Dia natolony an’i Jakôba ireo andriamani-kafa rehetra tany am-pelatanany mbamin’ireo kavina teny an-tsofiny[150], ka nalevin’i Jakôba teo am-pototr’ilay hazo midoroboka tao akaikin’i Sekema.

⁵Ary rehefa niala teo ry i Jakôba sy ny zanany, dia nampihorohoroin’Andriamanitra ireo tanàna manodidina, ka tsy nisy sahy nanarakaraka azy avy taoriana.

⁶I Jakôba sy ireo rehetra niaraka taminy dia tonga tao Lozy, izany hoe tao Betela izay ao amin’ny tany Kanahàna.

⁷Ary nanamboatra alitara teo izy, ka niantso an’io toerana io hoe Andriamanitr’i Betela; satria teo no nisehoan’Andriamanitra taminy fony izy nandositra ny rahalahiny.

⁸Ary maty i Debôrà, izay nitaiza an’i Rebekà, ka nalevina teo akaikin’i Betela, teo am-pototry ny hazo ôaka izay nantsoina hoe «Hazo ôaka fitomaniana» nanomboka hatreo.

⁹Rehefa niverina avy tany Mezôpôtamia ambony i Jakôba, dia nisehoan’Andriamanitra indray sady notsofiny rano

¹⁰ary nitenany hoe: — I Jakôba no anaranao; nefa tsy hatao hoe Jakôba intsony ianao fa hatao hoe Israely[151]. Dia nataon’Andriamanitra hoe Israely ny anarany;

¹¹sady hoy koa Izy taminy: — Izaho no Andriamanitra Tsitoha. Mihamaroa sy mitomboa, ka hisy firenena sy vondrom-pirenena hipoitra avy aminao ary mpanjaka maro avy amin’ny taranakao.

¹²Homeko anao sy ny taranakao[152] mandimby anao ny tany izay nomeko an’i Abrahama sy i Itsehàka.

¹³Dia niala teo amin’ny toerana izay nitenenany tamin’i Jakôba Andriamanitra.

¹⁴I Jakôba kosa nanorina tsangambato teo ka nanoso-menaka ilay tsangambato sy nandraraka divay teo amboniny.

¹⁵Dia nantsoin’i Jakôba hoe «Betela» na Tranon’Andriamanitra io toerana izay nitenenan’Andriamanitra taminy io[153].

¹⁶Niala tao Betela i Jakôba sy ny ankohonany. Raha mbola lavidavitra an’i Efratà no nisy azy mianakavy, dia teraka i Rahely; nefa saro-piterahana izy.

¹⁷Fa raha sahirana teo am-piterahana iny i Rahely, dia hoy ny mpampivelona taminy: — Aza matahotra fa mbola zazalahy no ho anao!

¹⁸Teo am-pialana aina rehefa ho faty izy, dia nataony hoe Bèna-Ony na zanaky ny fahoriako ny anaran’ny zaza; fa ny rainy kosa niantso azy hoe Benjamîna na zanaky ny tanan-kavanana[154].

¹⁹Maty i Rahely ka nalevina teo amoron-dàlana mankany Efratà, izay atao hoe Betlehema ankehitriny.

²⁰Dia nanorenan’i Jakôba tsangambato teo ambonin’ny fasany izay mbola antsoina mandraka androany hoe Tsangambatom-pasan’i Rahely.

²¹Dia niala teo i Jakôba ka nanorin-day tao ambadik’i Migdala-Hedera[155].

²²Fa raha mbola nipetraka tamin’izany faritany izany i Jakôba, dia lasa i Reobena nandry tamin’i Bilehà vadikelin-drainy. Nahare izany i Jakôba ka nisafoaka[156]. Fa nisy roa ambin’ny folo ny zanakalahin’i Jakôba;

²³i Reobena no lahimatoan’i Jakôba tamin’i Leà, avy eo dia i Simehôna, i Levỳ, i Joda, i Jisakara ary i Zebolòna.

²⁴I Jôsefa sy i Benjamîna kosa no zanany tamin’i Rahely.

²⁵I Dana sy Naftalỳ no zanany tamin’i Bilehà mpanompovavin’i Rahely.

²⁶I Gada sy i Asera no zanany tamin’i Zilpà, mpanompovavin’i Leà. Ireo no zanakalahin’i Jakôba teraka tany Mezôpôtamia ambony.

²⁷Ary nandeha i Jakôba nankany amin’i Itsehàka rainy tany Mamre, tao akaikin’i Kiriata-Arbà izay antsoina hoe Hebrôna ankehitriny, fa tao Mamre no nivahinian’i Abrahama sy i Itsehàka.

²⁸Efa nisy valopolo amby zato taona ny andron’i Itsehàka,

²⁹no niala aina izy ka maty; ary efa tratra antitra izy vao nakambana tamin’ny razany. I Hesao sy i Jakôba zanany no nandevina azy.