Read Dikateny Iombonana Eto Madagasikara Genesỳ 38 Bible Online

Genesỳ 38 - Dikateny Iombonana Eto Madagasikara bible

Genesỳ 38

¹Tamin’izany fotoana izany dia niala teo amin’ny rahalahiny i Joda ka nidina tany Hadolama, ho any amin’ny lehilahy atao hoe Hirà.

²Tany no nahitan’i Joda ny zanakavavin’i Sohà lehilahy kanahanita, ka nalainy ho vady.

³Nitoe-jaza ilay ramatoa ka niteraka zazalahy, izay nantsoin’i Joda hoe Hera.

⁴Mbola nitoe-jaza indray ravehivavy ka niteraka zazalahy nantsoiny hoe Onàna.

⁵Avy eo dia mbola nitoe-jaza hafa indray izy ka nantsoiny hoe Selà. Tany Keziba i Joda no niteraka an’i Selà ny vadiny.

⁶Naka vady ho an’i Hera lahimatoany i Joda, ka Tamara no anarany.

⁷Fa ratsy fanahy teo imason’ny TOMPO i Hera ka nampamonoin’ny TOMPO ho faty.

⁸Dia hoy i Joda tamin’i Onàna: — Mandehana mankany amin’ny vady navelan’ny rahalahinao, ka alao ho vady loloha[164] izy mba hamelo-maso ny rahalahinao.

⁹Fantatr’i Onàna fa tsy ho azy ny taranaka raha misy, koa isaky ny nandry tamin’ny zaobaviny izy, dia nandraraka ny tsirinainy tamin’ny tany mba tsy hanome taranaka ho an’ny rahalahiny.

¹⁰Ary hita fa ratsy teo imason’ny Tompo izay nataon’i Onàna, ka nampamonoin’ny TOMPO ho faty koa izy.

¹¹Dia hoy i Joda tamin’i Tamara vinantovaviny: — Mitoera ho mpitondratena any an-tranon’ny rainao[165] aloha mandra-pahalehiben’i Selà zanako lahy. Fa hoy i Joda anakampony hoe: «Sao dia ho faty toy ny rahalahiny eo koa i Selà.» Dia lasa i Tamara nonina tany an-tranon-drainy.

¹²Ary nony afaka elaela, dia maty ihany koa ny vadin’i Joda izany hoe ilay zanakavavin’i Sohà. Ary rehefa afa-tsaona i Joda, dia niakatra ho any Timnà niaraka tamin’i Hirà izay Hadolamita sakaizany mba hijery ireo mpanety ny ondriny.

¹³Rehefa ren’i Tamara fa nankany Timnà ny rafozany mba hanety ny ondriny,

¹⁴dia nanaisotra ireo fitafiany maha mpitondratena azy ravehivavy ka nisarona fisalobonana tsy hamantarana azy, ary nandeha nipetraka teo am-bavahadin’i Henaîma, amin’ny lalana mankany Timnà. Hitan’i Tamara manko fa efa lehibe i Selà, kanefa tsy nomena ho vadiny.

¹⁵Hitan’i Joda i Tamara ka noheveriny ho mpivarotena, satria nanaron-tava ravehivavy.

¹⁶Tsy nahafantatra azy ho vinantovaviny i Joda, ka dia nivily nanatona azy teo amoron-dalana sy nanao taminy hoe: — Avelao mba handry aminao aho. Fa hoy ny navaliny azy: — Inona anefa no homenao ahy amin’izany?

¹⁷Dia hoy i Joda hoe: — Handefasako zanak’osy avy amin’ny andian’ondry aman’osiko ianao. Fa namaly ravehivavy hoe: — Eny, raha omenao antoka aho mandra-pandefanao ny zanak’osy.

¹⁸Ary hoy i Joda hoe: — Inona àry no antoka homeko anao? Dia novaliany hoe: — Ny tombokasenao sy ny tadiny[166] ary iny tehinao eny an-tananao iny. Dia nomen’i Joda azy tokoa ireny, ka nandeha nandry tamin’i Tamara izy; ary nitoe-jaza ravehivavy.

¹⁹Avy teo dia niainga i Tamara, ka nandeha nody; nesoriny ny fisalobonana, dia nanaovany indray ny fitafiana maha mpitondratena azy.

²⁰Nirahin’i Joda ilay Hadolamita sakaizany mba hitondra ny zanak’osy ho any amin’ilay ramatoa sady haka ny tombokase; kanefa tsy nahita azy ralehilahy,

²¹dia nanontany ny olona tao Henaîma hoe: — Aiza ilay vehivavy mpivarotena tamoron-dàlana teto iny? Ka hoy ny navalin’ireo azy: — Tsy mbola nisy vehivavy mpivarotena izany mihitsy teo.

²²Ary niverina tany amin’i Joda ilay sakaizany ka nanao taminy hoe: — Tsy hitako ilay ramatoa; ary ny olona tao an-toerana aza dia nanamafy tamiko fa tsy mbola nisy vehivavy mpivarotena izany mihitsy teo.

²³Dia hoy i Joda: — Aoka ho lasany any ireny zavatra ireny, sao afa-baràka eo isika! Indro aho efa nampanatitra ny zanak’osy, nefa tsy hitanao ilay ramatoa.

²⁴Nony afaka telo volana, dia nisy nitantara tamin’i Joda hoe: — Nivaro-tena i Tamara vinantovavinao, ka indro bevohòka izy! Dia hoy ny baikon’i Joda hoe: — Avoahy izy hodorana velona.

²⁵Ary raha iny mbola navoaka ny trano iny ilay ramatoa, dia nampaniraka ho any amin’ny rafozan-dahiny izy hilaza hoe: — Izay lehilahy tompon’ireto zavatra ireto no nahabevohòka ahy. Koa fantaro izay tompon’ireto fitombokase sy tady ary tehina ireto?

²⁶Fantatr’i Joda ireo zavatra ireo ka hoy izy hoe: — Marina kokoa noho izaho i Tamara, satria tokony ho nomeko ho vadiny i Selà zanako lahy kanefa tsy nataoko izany. Dia tsy nandry tamin’i Tamara intsony i Joda.

²⁷Rehefa tonga ny andro hiterahan’i Tamara, dia indreo zaza kambana no tao an-kibony.

²⁸Teo am-piterahana, dia niseho ny sandrin’ny zaza iray ka nosamborin’ny mpampivelona sady nofatorany kofehy mena fa hoy izy hoe: — Ity zaza ity no teraka voalohany.

²⁹Kanjo nahemotr’ilay zaza ny sandriny, dia indro ny rahalahiny indray no tafavoaka, ka hoy ny mpampivelona hoe: — Ahoana izao fibosesika nafitsokao izao? Dia nataon’i Joda hoe Peretsa na Fibosesika ny anarany.

³⁰Avy eo dia teraka indray ilay zaza misy kofehy mena tamin’ny sandriny ka nataon’i Joda hoe Zera na Fiposahana ny anarany.