Read Dikateny Iombonana Eto Madagasikara Genesỳ 40 Bible Online

Genesỳ 40 - Dikateny Iombonana Eto Madagasikara bible

Genesỳ 40

¹Taorian’izany zavatra izany dia nanao fahadisoana tamin’ny mpanjakan’i Ejipta tompony ny lehiben’ny mpandroso zava-pisotro ary koa ny lehiben’ny mpanao mofo.

²Tezitra mafy tamin’ireo tandapany roa lahy ireo ny Farao,

³ka nampanao azy an-tranomaizina; ny fonenan’ilay lehiben’ny mpiambina no nisy io tranomaizina io, dia ny fonja izay nigadran’i Jôsefa.

⁴Ilay lehiben’ny mpiambina kosa nametraka azy roa lahy teo ambany fitandreman’i Jôsefa; ary fotoana vitsivitsy no nitanana azy tao.

⁵Indray alina dia samy nanonofy tao an-tranomaizina izy roa lahy, dia ny lehiben’ny mpandroso zava-pisotro ary koa ny mpanao mofon’ny mpanjakan’i Ejipta; ary samy nanana ny heviny avy ny nofiny.

⁶Nony maraina, rehefa tonga hijery azy ireo i Jôsefa, dia nahita azy nanjoretra,

⁷ka nanontany azy hoe: — Nahoana no malahelo tarehy ianareo androany?

⁸Dia novalian’izy roa lahy hoe: — Samy nanonofy izahay, nefa tsy misy olona mahalaza ny heviny. Hoy kosa i Jôsefa hoe: — Andriamanitra ihany no afaka manome ny heviny, fa mba tantarao amiko aloha ny nofinareo.

⁹Dia nitantara ny nofiny tamin’i Jôsefa ilay lehiben’ny mpandroso zava-pisotron’ny mpanjaka, ka nanao hoe: — Nofiko fa nisy, hono foto-boaloboka iray teo anoloako.

¹⁰Nisampana telo ilay foto-boaloboka, ka raha vao nitsimoka izy, dia namelana ary nisy voaloboka masaka an-tangozany.

¹¹Teny an-tanako ny tsangambavan’ny Farao ary notazako ny voaloboka, ka nofiazako tao; dia natolotro teo an-tanan’ny Farao ilay tsangambava.

¹²Ary hoy i Jôsefa taminy: — Izao no hevitry ny nofinao: ny sampany telo dia manambara andro telo.

¹³Ato anatin’ny telo andro dia hasandratry Farao ianao, ka haveriny eo amin’ny toeranao, ary hanolotra ny tsangambavan’ny Farao toy ny teo aloha araka ny maha lehiben’ny mpandroso zava-pisotro anao.

¹⁴Fa mba tsarovy aho rehefa hambinina ianao, anehoy hatsaram-po ka mba resaho amin’ny Farao hamoahanao ahy hiala amin’ity tranomaizina ity.

¹⁵Fa an-keriny no nitondrana ahy avy tany amin’ny tanin’ny Hebreo; ary teto koa dia tsy nanao na inona na inona akory aho, nefa natao an-tranomaizina.

¹⁶Nony hitan’ilay lehiben’ny mpanao mofo fa tsara ny hevitry ny nofy nambaran’i Jôsefa, dia hoy izy taminy: — Izaho koa mba nanonofy, ka nisy hono harona telo fitondrana mofo nololohaviko.

¹⁷Tao amin’ilay harona ambony indrindra dia feno ireo mofo fihinan’ny Farao, saingy tonga ny voro-manidina ka nihinana azy tao an-karona teny an-dohako.

¹⁸Dia hoy ny navalin’i Jôsefa azy: — Izao no hevitry ny nofinao: ny harona telo dia manambara andro telo.

¹⁹Ato anatin’ny telo andro dia hoesorin’ny Farao amin’ny toeram-boninahitrao ianao, ka hahantony amin’ny hazo; dia ho avy ny voro-manidina hihinana ny nofonao.

²⁰Nony afaka telo andro, dia nitsingerina ny andro nahaterahan’ny Farao, ka nanao fanasam-be ho an’ireo mpanompony rehetra izy. Koa teo anivon’ireo mpanompony no nanehoan’ny Farao an’ilay lehiben’ny mpandroso zava-pisotro sy ilay lehiben’ny mpanao mofo.

²¹Ilay lehiben’ny mpandroso zava-pisotro dia naveriny tamin’ny raharahany ka nanolotra ny tsangambava ho eo an-tanàn’ny Farao;

²²fa ilay lehiben’ny mpanao mofo kosa dia nasainy nahantona. Dia araka izay efa nambaran’i Jôsefa tamin’izy roa lahy avy izany.

²³Kanjo nanadino tanteraka an’i Jôsefa ilay lehiben’ny mpandroso zava-pisotro.