Read Dikateny Iombonana Eto Madagasikara Genesỳ 46 Bible Online

Genesỳ 46 - Dikateny Iombonana Eto Madagasikara bible

Genesỳ 46

¹Niainga i Jakôba sy izay rehetra azy ka tonga tao Beera-Seba; dia nanao sorona teo izy ho an’ilay Andriamanitr’i Itsehàka rainy.

²Nony alina dia niteny taminy tao anaty fahitana Andriamanitra ka nanao hoe: — Ry Jakôba! Ry Jakôba! Ary hoy ny navalin’i Jakôba Azy: — Inty aho!

³Dia hoy indray Izy hoe: — Izaho no Andriamanitra, dia ilay Andriamanitry ny rainao. Aza matahotra hidina any Ejipta ianao; fa hataoko firenena lehibe any.

⁴Hidina hiaraka aminao any Ejipta Aho, ary Izaho koa no mbola hampiakatra anao avy any indray; ary ny tanan’i Jôsefa no hanirina ny masonao, rehefa maty ianao.

⁵Dia niala tao Beera-Seba i Jakôba. Ary ireo zanakalahiny dia nitondra an’i Jakôba rainy sy ireo zaza amam-behivavy tao anatin’ny sarety izay efa nalefan’ny Farao hitondrana azy.

⁶Nentin’ireo koa ny biby fiompiny mbamin’ny fananana hafa izay noharîny tao amin’ny tany Kanahàna. Dia tonga tany Ejipta i Jakôba sy ny taranany rehetra niaraka taminy[178],

⁷fa nasainy nentina tany Ejipta avokoa ny zanany lahy sy ny zanany vavy mbamin’ny zafikeliny.

⁸Ireto no anaran’ny Israelita tonga tany Ejipta, dia i Jakôba sy ny zanaka aman-jafiny: I Reobena, lahimatoan’i Jakôba,

⁹ary ireo zanany lahy, dia i Hanôka, i Palò ary i Hetsirôna sy i Karmỳ.

¹⁰I Simehôna sy ireo zanany lahy, dia i Jemoela sy i Jamìna, i Ohada sy i Jakìna ary i Tsôhara sy i Saola; io Saola io dia zanak’ilay vehivavy kanahanita.

¹¹I Levỳ sy ireo zanany lahy dia i Gersôna sy i Kehata ary i Merary.

¹²I Joda sy ireo zanany lahy, dia i Selà sy i Peretsa ary i Zera; fa ny zanany roa lahy, i Hera sy i Onàna, dia efa maty tany amin’ny tany Kanahàna. Ary ny zanakalahin’i Peretsa dia i Hetsirôna sy i Hamola.

¹³I Jisakara sy ireo zanany lahy, dia i Tôlà sy i Povà ary i Jasoba[179] sy i Simrôna.

¹⁴I Zebolòna sy ireo zanany lahy, dia i Sereda sy i Elôna ary i Jahiliela.

¹⁵Ireo no zanakalahin’i Jakôba naterak’i Leà tany Mezôpôtamia ambony, miampy an’i Dinà anabaviny. Ny isan’izy rehetra mbamin’ny zanany na lahy na vavy dia telo amby telopolo.

¹⁶I Gada sy ireo zanany lahy, dia i Tsifiôna sy i Hagỳ, i Sonỳ sy i Etsibôna, i Herỳ sy Arôdỳ ary i Arelỳ.

¹⁷I Asera sy ireo zanany lahy, dia i Jimnà sy i Jisvà ary i Jisvỳ sy i Berihà, fa i Serà kosa no anabaviny. Ary ny zanakalahin’i Berihà dia i Hebera sy i Malkiela.

¹⁸Ireo telo ambin’ny folo lahy ireo no taranak’i Jakôba tamin’i Zilpà izay nomen’i Labàna ho mpanompovavin’i Leà.

¹⁹Ary ny zanakalahin’i Rahely vadin’i Jakôba kosa dia i Jôsefa sy i Benjamîna.

²⁰Tany Ejipta i Jôsefa dia niteraka zanaka roa lahy, i Manase sy i Efraîma[180], tamin’i Asenata vadiny, izay zanakavavin’i Pôtifera mpisorona tao Ona.

²¹Folo no zanakalahin’i Benjamîna: i Bela sy i Bekera, i Asbela sy i Gerà, i Nahamàna sy i Ehỳ, i Rôsy sy i Hopima ary i Mopîma sy i Arda.

²²Ireo izy efatra ambin’ny folo lahy taranak’i Rahely sy i Jakôba.

²³Dia ao koa i Dana sy i Hosima zanany lahy.

²⁴I Naftalỳ sy ireo zanany lahy, dia i Jahatsiela sy i Gonỳ ary i Jetsera sy i Silema.

²⁵Ireo fito lahy ireo no taranak’i Jakôba tamin’i Bilehà izay nomen’i Labàna ho mpanompovavin’i Rahely.

²⁶Ny isan’ny ankohonan’i Jakôba rehetra, izany hoe ireo taranany mivantana izay tonga tany Ejipta, dia 66 ankoatra ireo vinantovaviny.

²⁷Ampian’ireo zanakalahin’i Jôsefa anankiroa teraka tany Ejipta izany, dia fitopolo no isan’ny ankohonan’i Jakôba rehetra tonga tany Ejipta[181].

²⁸Nirahin’i Jakôba hialoha azy any amin’i Jôsefa i Joda mba hiangavy azy hankany Gôsena. Rehefa tonga tany Gôsena i Jakôba sy ny ankohonany,

²⁹dia nanomana ny kalesiny i Jôsefa ka nandeha hihaona amin’ny rainy tany Gôsena. Raha vao nahita an’i Jakôba izy, dia niantoraka teny am-bozony ary nitomany ela teo sady namihina azy.

³⁰Dia hoy i Jakôba taminy: — Mahazo modimandry amin’izay aho, satria mbola velona ihany ianao sady nifanatri-tava tamiko.

³¹Dia hoy i Jôsefa tamin’ny rahalahiny sy ny olon-kafa ankohonan-drainy: — Handeha hampandre ny Farao aho ka hilaza aminy fa ireo rahalahiko sy ny olon-kafa ankohonan-draiko izay tany amin’ny tany Kanahàna dia efa tonga eto amiko.

³²Holazaiko aminy fa lehilahy mpiandry ondry sy mpiompy ianareo, ka nentinareo koa ny omby sy ny ondry aman’osinareo ary izay rehetra anananareo.

³³Koa rehefa mampiantso anareo ny Farao ka manontany hoe: «Inona no raharahanareo?»,

³⁴dia hovalianareo hoe: Olona mpiompy toy ireo razanay izahay mpanomponao, nanomboka hatramin’ny fahazazànay ka mandraka izao. Amin’izay dia hahazo mipetraka ao amin’ny faritr’i Gôsena ianareo, satria maharikoriko ny Ejiptianina ny mpiandry ondry rehetra.