Read Dikateny Iombonana Eto Madagasikara Genesỳ 7 Bible Online

Genesỳ 7 - Dikateny Iombonana Eto Madagasikara bible

Genesỳ 7

¹Hoy ny TOMPO tamin’i Noà: — Midira ao anatin’ny sambofiara ianao sy ny ankohonanao, satria ianao irery no hitako fa marina teo anatrehako tamin’izao taranaka izao.

²Makà biby madio[32] mpivady fito isaky ny karazany avy, ary biby maloto mpivady iray ihany kosa isaky ny karazany avy, ka ento miaraka aminao;

³toy izany koa ny amin’ny voro-manidina, makà mpivady fito isaky ny karazany avy: dia mba samy hamelona taranaka eo amin’ny velaran’ny tany tontolo ireny.

⁴Fa herinandro sisa dia hampilatsaka ranonorana mandritra ny efapolo andro sy efapolo alina amin’ny tany Aho, ka hofoanako eo amin’ny velaran’ny tany ireo zava-mananaina rehetra nataoko.

⁵Dia nataon’i Noà izay rehetra nandidian’ny TOMPO azy[33].

⁶Feno 600 taona i Noà raha tonga ny safo-drano lehibe teto ambonin’ny tany.

⁷Niditra tao anaty sambofiara izy mbamin’ny vady aman-janany ary ireo vinantovaviny mba tsy ho tratry ny safo-drano[34].

⁸Ny biby madio sy ny biby maloto ary ny voro-manidina sy ireo bibikely mihetsiketsika ambonin’ny tany koa

⁹dia tonga tsiroaroa, lahy sy vavy, nankao amin’i Noà tao amin’ny sambofiara araka izay efa nandidian’Andriamanitra an’i Noà.

¹⁰Nony afaka herinandro dia safotry ny ranobe ny tany.

¹¹Iny faha-600 taona niainan’i Noà iny, tamin’ny volana faharoa, andro faha-17, dia niboiboika be ny rano avy any ambanin’ny tany tamin’ireo loharano rehetra, ary nivoha nidanadana ny varavaran’ny lanitra[35].

¹²Dia avy be ny orana teny ambonin’ny tany nandritra ny efapolo andro sy efapolo alina.

¹³Tamin’io andro io no niditra tao amin’ny sambofiara i Noà sy ny vadiny ary koa i Sema sy i Hama ary i Jafeta zanany lahy mbamin’ireo vinantovaviny telo;

¹⁴niditra tao koa ireo bibidia amam-biby fiompy rehetra isan-karazany sy ireo bibikely rehetra isan-karazany mihetsiketsika ambonin’ny tany mbamin’ireo voro-manidina rehetra isan-karazany sy ireo bibikely rehetra manana elatra.

¹⁵Samy tonga tsiroaroa teo amin’i Noà tao anatin’ny sambofiara ireo voaary rehetra manam-pofonaina.

¹⁶Lahy sy vavy tamin’ireo zava-mananaina rehetra ireo no niditra tao, araka izay efa nandidian’Andriamanitra an’i Noà. Avy eo dia nohidin’ny TOMPO ny varavarana.

¹⁷Naharitra efapolo andro ny safo-drano teny ambonin’ny tany. Rehefa nitombo ny rano, dia nanainga ny sambofiara, hitsinkafona hiala amin’ny tany.

¹⁸Ary nihanahery ny rano sady nitombo be dia be, ka dia nandeha teny ambony rano ny sambofiara.

¹⁹Ary nitombo be izaitsizy ny rano tetỳ ambonin’ny tany ka naharakotra hatramin’ireo tendrombohitra avo indrindra taty ambanin’ny lanitra.

²⁰Tafakatra fito metatra sy sasany ambonin’ny tendrombohitra ny haavon’ny rano.

²¹Dia maty ny nofo rehetra izay nihetsiketsika tambonin’ny tany, izany hoe ny voro-manidina sy ny biby fiompy mbamin’ny bibidia, ny bibikely mihahohaho tambonin’ny tany, ary ny olombelona rehetra.

²²Maty avokoa izay rehetra nanam-pofonaina tamin’ny vavorona teny an-tanety.

²³Dia nofoanan’Andriamanitra ny zava-mananaina rehetra teny ambonin’ny tany, nanomboka tamin’ny olona ka hatramin’ny biby lehibe sy kely mbamin’ny voro-manidina; dia nofoanan’Andriamanitra tsy ho amin’ny tany ireny, fa i Noà irery ihany mbamin’izay niaraka taminy tao anatin’ny sambofiara no sisa tavela.

²⁴Naharitra 150 andro ny fahatondrahan’ny rano teny ambonin’ny tany.