Read Dikateny Iombonana Eto Madagasikara Genesỳ 9 Bible Online

Genesỳ 9 - Dikateny Iombonana Eto Madagasikara bible

Genesỳ 9

¹Ary Andriamanitra nitsodrano an’i Noà sy ireo zanany lahy hoe: «Maroa fara sy mihabetsaha ka mamenoa ny tany.

²Hisy tahotra sy horohoro anareo ao amin’ny biby rehetra eny ambonin’ny tany mbamin’ny voro-manidina sy ny bibikely ary ao amin’ny trondro rehetra anaty ranomasina, satria nomena ho eo am-pelatananareo ireny.

³Izay rehetra velona sy mihetsiketsika dia omeko ho sakafonareo avokoa tahaka ny nanomezako ny anana[36] ho anareo.

⁴Kanefa kosa ny nofo miaraka amin’ny ainy, izany hoe miaraka amin’ny rany[37], dia aza haninareo mihitsy.

⁵Ary ny ranareo koa, izay ainareo, dia hadiniko amin’ny biby izay namono olona ho faty tahaka ny hanadinako ny olona namono ho faty ny olona toa azy. Eny, hadiniko ny momba ny ain’ny olona:

⁶Izay mandatsaka ran’olona dia halatsak’olona koa ny rany, satria mitovy endrika amin’Andriamanitra no nanaovany ny olona[38].

⁷Fa ianareo kosa dia maroa fara sy mihabetsaha eo amin’ny tany[39] ary mitomboa be dia be eo aminy.»

⁸Ary hoy koa Andriamanitra tamin’i Noà sy ireo zanany lahy niaraka taminy:

⁹«Indro Aho hanorina ny fanekempihavanako aminareo sy amin’ny taranakareo mandimby anareo,

¹⁰ary amin’ny zava-mananaina rehetra eo aminareo na ny vorona, na ny biby fiompy na ny bibidia, dia izay rehetra nivoaka tamin’ny sambofiara niaraka taminareo.

¹¹Izao no fanekempihavanana haoriko aminareo: tsy hisy rano avy amin’ny safo-drano intsony handripaka ny nofo rehetra, ary tsy hisy safo-drano hanimba ny tany intsony mandrakizay.»

¹²Dia mbola nampian’Andriamanitra hoe: «Izao no ataoko mariky ny fanekempihavanantsika ho Ahy sy ho anareo ary ho an’ny zava-mananaina rehetra miaraka aminareo hatramin’ny taranaka fara mandimby.

¹³Apetrako eny amin’ny rahona ny avako ho mariky ny fanekempihavanana eo amiko sy amin’ny tany.

¹⁴Ka isaky ny mampivondrona rahona eny ambonin’ny tany Aho ka miseho ny avana,

¹⁵dia hotsarovako ny fanekempihavanako taminareo sy tamin’ny zava-mananaina rehetra, izany hoe ny voaary rehetra; ka tsy hisy intsony rano hanjary safo-drano handringana ny voaary rehetra.

¹⁶Ho eny amin’ny rahona ny avana ary hojereko mba hampahatsiaro Ahy ny fanekempihavanana mandrakizay eo amiko sy eo amin’ny zava-mananaina rehetra ary eo amin’ny voaary rehetra izay eny ambonin’ny tany.»

¹⁷Dia mbola naverin’Andriamanitra tamin’i Noà hoe: «Izany no famantarana momba ny fanekempihavanana izay naoriko ho amiko sy ho amin’ny voaary rehetra izay eny ambonin’ny tany.»

¹⁸Ny zanakalahin’i Noà, izay nivoaka avy tao amin’ny sambofiara, dia i Sema sy i Hama ary i Jafeta. I Hama no rain’i Kanahàna.

¹⁹Izy telo lahy ireo no zanak’i Noà, ary avy tamin’ireo no niparitahan’ny olombelona eran-tany.

²⁰I Noà no mpiasa tany voalohany namboly voaloboka.

²¹Nisotro divay izy ka mamo ary nitanjaka tao an-dainy;

²²I Hama rain’i Kanahàna, rehefa nahita ny fitanjahan-drainy, dia lasa nampandre ireo rahalahiny roa tao ivelany.

²³Nalain’i Sema sy i Jafeta ny lamba ka nentiny an-tsoroka, ary nanao dia mianòtra izy mirahalahy ka nandrakotra ny fitanjahan-drainy. Fa nitodika nijery tany an-kafa ireo ka tsy nahita ny fitanjahan-drainy.

²⁴Ary nony efa nisava ny hamamoan’i Noà, ka fantany izay nataon’ny zanany faralahy taminy,

²⁵dia hoy izy hoe: Ho voaozona anie i Kanahàna! Aoka izy ho faraidiny amin’ireo mpanompon’ny rahalahiny!

²⁶Dia mbola nampiany hoe: Hoderaina anie ny TOMPO, ilay Andriamanitr’i Sema! Aoka i Kanahàna ho mpanompon’i Sema!

²⁷Hataon’Andriamanitra malalaka anie ny toeran’i Jafeta[40] ka hanana fonenana ao amin’i Sema izy, ary aoka i Kanahàna koa ho mpanompony!

²⁸Mbola velona 350 taona i Noà taorian’ny safo-drano.

²⁹Dia maty i Noà rehefa feno 950 taona.