Read Dikateny Iombonana Eto Madagasikara 2 Samoela 1 Bible Online

2 Samoela 1 - Dikateny Iombonana Eto Madagasikara bible

2 Samoela 1

¹Taorian’ny nahafatesan’i Saoly, dia niverina tao Tsiklaga i Davida ka nijanona roa andro tao rehefa avy nandresy ny Hamalekita[1].

²Tamin’ny andro fahatelo, nisy lehilahy iray tonga avy any amin’ny tobin’i Saoly. Triatriatra ny akanjony ary feno tany ny lohany. Koa rehefa mby teo amin’i Davida izy, dia niankohoka tamin’ny tany.

³Ary nanontany azy i Davida hoe: — Avy taiza moa ianao? Dia hoy ny navaliny: — Avy nandositra ny tobin’i Israely aho, tompoko.

⁴Ka hoy indray i Davida taminy: — Fa nanao ahoana avy ny zava-niseho tany? Mba tantarao amiko. Dia hoy izy hoe: — Nitsoaka nandositra ny tafik’i Israely ary betsaka ny miaramila maty. Ary i Saoly sy i Jônatàna zanany koa samy maty.

⁵Hoy ihany i Davida tamin’ilay zatovo mpilaza vaovao: — Ahoana no nahafantaranao fa maty i Saoly sy i Jônatàna zanany?

⁶Ka novalian’ilay tovolahy hoe: — Sendra teo an-tendrombohitra Gilbôa[2] aho, raha nahita an’i Saoly nitehina tamin’ny lefony; ary efa nanakaiky azy tamin’izay ny kalesy sy ny mpitaingin-tsoavalin’ny fahavalo.

⁷Dia niherika izy ka nahita ahy; nantsoiny aho, ary hoy aho taminy: «Inty aho, tompoko!»

⁸Dia nanontany ny amiko izy, ka nolazaiko azy fa Hamalekita[3] aho.

⁹Koa nasainy nanatona aho mba hamono azy ho faty satria naratra mafy izy na dia mbola mahatsiaro tena tsara aza.

¹⁰Nohatoniko izy ary novonoiko ho faty, satria fantatro fa tsy ho velona amin’ny ratra nahazo azy izy. Koa nalaiko ny satroboninahitra teny an-dohany sy ny haba teny an-tsandriny ka ireto nentiko atỳ aminao ireto, tompoko.

¹¹Notriarin’i Davida ny fitafiany ary mba nanao tahaka izany koa ny olony rehetra izay teo.

¹²Mandra-paharivan’ny andro izy ireo dia nitomany sy nifady hanina ary nisaona an’i Saoly sy i Jônatàna zanany mbamin’ny Israelita izay maty an’ady ka anisan’ny vahoakan’ny TOMPO.

¹³Ary hoy i Davida tamin’ilay zatovo mpilaza vaovao: — Fa mba iza moa ianao? Ka novaliany hoe: — Zanaky ny Hamalekita mpifindra monina aho, tompoko.

¹⁴Dia hoy i Davida taminy: — Ahoana no nahasahianao naninji-tanana ka nahafaty ny mpanjaka voafidin’ny TOMPO?

¹⁵Ary niantso ny mpanompony anankiray i Davida ka nibaiko azy hoe: — Mandehana vonoy any ilehio! Dia nasiany izy ka maty.

¹⁶Ary hoy i Davida taminy: — Nandrora mitsilany ianao izao ka nahavoa tena. Ny vavanao ihany no nanameloka anao ho faty raha nanao hoe: «Izaho no namono ho faty ny mpanjaka voafidin’ny TOMPO.»

¹⁷Namorona izao hira fisaonana an’i Saoly sy i Jônatàna zanany izao i Davida,

¹⁸ka nasainy nampianarina ny mponin’i Joda. Indro ny «Hira fisaonana atao hoe Tsipîka» araka ny voasoratra ao amin’ny Bokin’ilay Marina[4].

¹⁹Ry Israely ô, ireo mpiady reharehanao dia mitsitra eny an-tampon-kavoanao. Indrisy fa maty ireo mahery fo!

²⁰Aza aely any Gata izany vaovao izany na torina eny an-dalamben’i Askelôna[5], fandrao hifalian’ny vehivavin’ny Filistinina na hibitahan’ny tovovavin’ny mpanompo sampy.

²¹Ianareo tendrombohitr’i Gilbôa[6], aza misy ando na orana intsony eo aminareo na koa saha be vokatra hangalam-panatitra, satria teo no nahafa-baràka ny ampingan’ny mahery fo, dia ny ampingan’i Saoly tsy hihoso-diloilo intsony.

²²Teo anoloan’ny ran’ireo Filistinina nitsitra, ny tsipîkan’i Jônatàna tsy mba nihemotra; teo anoloan’ny hatomadin’ireo fahavalo mahery fo, ny sabatr’i Saoly tsy niveri-maina.

²³I Saoly sy i Jônatàna dia nifankatia tokoa fahavelony, ary tsy nosarahina na dia tamin’ny nahafatesany aza; mailaka noho ny voromahery izy mianaka ary mahery fo mihoatra noho ny liona.

²⁴Ianareo vehivavy israelita, mitomania an’i Saoly izay nampitafy jaky kanto anareo sady nandravaka volamena ny fitafianareo.

²⁵Indrisy fa maty an’ady ireo maherifo ary i Jônatàna mitsitra eny an-tampon-kavoanao!

²⁶Malahelo anao aho, ry Jônatàna rahalahiko; eny, nankamamiko fatratra ianao. Mahatalanjona ahy ny fitiavanao, fa sarobidy noho ny fitiavan’ny vehivavy.

²⁷Indrisy fa maty ireo maherifo, ary very ny fitaovam-piadiana?