Read Dikateny Iombonana Eto Madagasikara 2 Samoela 11 Bible Online

2 Samoela 11 - Dikateny Iombonana Eto Madagasikara bible

2 Samoela 11

¹Ny taona manaraka, rehefa tonga ny fotoana fandehanan’ny mpanjaka hiady, dia naniraka an’i Jôaba sy ny manamboninahiny ary ny tafika israelita manontolo i Davida mba handringana ny Hamônita sy hanao fahirano an’i Rabà. I Davida kosa nijanona tany Jerosalema ihany[58].

²Indray takariva dia niarina avy teo am-pandriany i Davida ka nitsangantsangana teo an-tafon-trano marin-tampon’ny lapam-panjakana. Avy teny no nahatazanany vehivavy iray nandro. Tsara tarehy aoka izany ravehivavy.

³Dia naniraka olona i Davida hanadihady ny momba io vehivavy io, ka izao no voalaza: «I Bàty-Sèba, zanakavavin’i Eliama ary vadin’i Orià ilay Hetita io!»

⁴Nampanalain’i Davida izy, ka tonga tao aminy, dia niraisany, ary nody tany an-tranony indray. Vao avy nanadio ny tenany noho ny fadimbolana ravehivavy tamin’izay[59].

⁵Bevohòka anefa ravehivavy ka naniraka olona hilaza amin’i Davida hoe: — Manana anaka aho.

⁶Nanafatra haingana an’i Jôaba i Davida hoe: — Alefaso atỳ amiko i Orià ilay Hetita. Dia nalefan’i Jôaba nankany amin’i Davida i Orià.

⁷Rehefa tonga teo amin’i Davida izy, dia nanontanian’i Davida izay vaovao momba an’i Jôaba sy ny miaramila ary ny fizotry ny ady.

⁸Dia hoy i Davida tamin’i Orià: — Mandehana mody ary makà aina kely. Nandao ny lapan’ny mpanjaka i Orià narahina fanomezana avy taminy.

⁹Kanefa nandry teo am-bavahadin’ny lapam-panjakana niaraka tamin’ny mpiambina ny mpanjaka i Orià, fa tsy nandeha nody tany an-tranony.

¹⁰Rehefa nambara tamin’i Davida fa tsy nody tany aminy akory i Orià, dia nilazany hoe: — Tsy avy lavitra ve ianao? Koa nahoana no tsy nody tany an-tranonao ianao?

¹¹Fa hoy i Orià tamin’i Davida: — Ny Vatamasina ary koa ny tafik’i Israely sy i Joda dia mitoetra an-day; i Jôaba filohan-tafika sy ireo manamboninahiny dia mitoby any an-tsaha, koa izaho kosa ve hody any an-tranoko hihinana sy hisotro ary handry amin’ny vadiko? Raha velona koa ianao, ary raha velona koa ny ainao, dia mianiana aminao aho fa tsy hanao izany.

¹²Ary hoy i Davida tamin’i Orià: — Mijanòna ihany àry atỳ anio. Fa rahampitso dia halefako ianao. Dia nijanona tao Jerosalema hatramin’ny ampitson’iny i Orià.

¹³Nanasa azy i Davida mba hihinana sy hisotro teo amin’ny latabany, ka dia nomamoiny; kanefa nony hariva ny andro, dia lasa nandry teo anilan’ireo mpiambina ny mpanjaka ihany izy fa tsy nandeha nody tany aminy.

¹⁴Ny ampitso maraina, dia nanoratra taratasy ho an’i Jôaba i Davida, ka nampitondrainy an’i Orià izany.

¹⁵Izao no voalazany tao amin’ilay taratasy: «Apetraho amin’ny voalohan-daharana i Orià, dia amin’izay toerana mahamafy indrindra ny ady, dia mihemora aoriany ianareo mba hamelezam-pahavalo azy ho faty.»

¹⁶Rehefa nanara-maso ny fahiranon’ny tanàna i Jôaba, dia nametraka an’i Orià tamin’ny toerana izay fantany fa nisy ny fahavalo mahery fo.

¹⁷Nivoaka ny tanàna voafahirano ny miaramila tao ka nanafika an’i Jôaba. Nisy tamin’ny tafik’i Davida sy ireo manamboninahiny no tavela; ary maty koa i Orià ilay Hetita.

¹⁸Dia nandefa tatitra tany amin’i Davida momba ny fizotry ny ady i Jôaba,

¹⁹ka nanome baiko ilay iraka hoe: — Rehefa voatantaranao an-tsipiriany amin’ny mpanjaka ny fizotry ny ady,

²⁰dia mety ho tezitra ny mpanjaka ka hiteny aminao hoe: «Nahoana no nanakaiky ny tanàna ianareo raha niady? Tsy fantatrareo ve fa hisy hitifitra anareo avy eny amin’ny manda?

²¹Fa iza no namely an’i Abimelèka zanakalahin’i Jerobahala, tao Tebetsy[60]? Moa tsy vehivavy anankiray no nanjera vato fikoseham-bary taminy avy teny ambony manda ka nahafaty azy? Koa nahoana no nanakaiky ny manda ianareo?» Raha izany no tenin’ny mpanjaka, dia valio hoe: «Maty koa i Orià, ilay Hetita manamboninahitra».

²²Dia lasa ilay iraka, ka tonga nanambara tamin’i Davida ny tatitra nampitondrain’i Jôaba azy

²³ary niteny taminy hoe: — Nahery noho izahay ireo fahavalo sady nivoaka ny tanàna hiady taminay teny an-tanety; kanefa dia voatosikay hatreo am-bavahady ihany izy.

²⁴Saingy nisy namely anay ny mpitifitra zana-tsipîka avy teny amin’ny manda; ka izay no nahafaty ny manamboninahitrao sasany, ary anisan’ireo i Orià ilay Hetita.

²⁵Dia hoy i Davida tamin’ilay iraka: — Lazao amin’i Jôaba hoe: «Aza malahelo amin’izany ianao, fa na ny an-kilany na ny an-daniny dia mety misy maty an’ady. Hamafiso hatrany ny fanafihanao ny tanàna ka ravao izy.» Izany no hampaherezanao an’i Jôaba.

²⁶Rehefa fantatry ny vadin’i Orià fa maty ny vadiny, dia nitomany azy izy.

²⁷Nony afa-tsaona izy, dia nampiantsoin’i Davida hankany aminy, ka nalainy ho vady ary niteraka zazalahy taminy.