Read Dikateny Iombonana Eto Madagasikara 2 Samoela 18 Bible Online

2 Samoela 18 - Dikateny Iombonana Eto Madagasikara bible

2 Samoela 18

¹Nampilaharin’i Davida ny miaramila izay niaraka taminy ka nanendreny mpifehy arivo sy mpifehy zato hibaiko azy.

²Nasain’i Davida hiainga ny tafiny; ka ny ampahatelony nofehezin’i Jôaba, ny ampahatelony hafa nofehezin’i Abisay zanakalahin’i Tseroià sady rahalahin’i Jôaba, ary ny ampahatelo farany nofehezin’i Itàhy izay avy any Gata[90]. Dia hoy ny mpanjaka tamin’ireto miaramila: «Izaho koa dia handeha hiaraka aminareo».

³Fa hoy kosa ny miaramila hoe: — Tsy mahazo mandeha ianao. Satria raha mandositra izahay, dia tsy hisy fahavalo hiraharaha akory; ary na dia maty avokoa aza ny antsasakay, dia tsy hahoany. Fa ianao kosa dia toy ny iray alina eo aminay; koa tsaratsara kokoa raha avy atỳ an-tanàna ianao no mandefa famonjena ho anay.

⁴Ary hoy ny mpanjaka taminy: — Izay sitrakareo ihany no hataoko. Dia nitsangana teo am-bavahady ny mpanjaka, raha nivoaka tsizatozato sy tsiarivoarivo ny tafiny manontolo.

⁵Nandidy an’i Jôaba sy Abisay ary Itàhy ny mpanjaka hoe: — Noho ny amiko, dia aoka ianareo tsy hikasi-tanàna ny zatovolahy Absalôma. Ary ny miaramila rehetra dia samy nandre ny nanomezan’ny mpanjaka didy momba an’i Absalôma.

⁶Nivoaka nankeny an-tsaha ny miaramilan’i Davida hifanehatra amin’ny Israelita hafa ka rafitra tao amin’ny alan’i Efraîma ny ady.

⁷Nilavo lefona teo anatrehan’ny mpanompon’i Davida ny tafik’i Israely. Navesatra loatra ny faharesena tamin’io andro io fa nahatratra 20 000 ny olona maty.

⁸Nitatra eran’ny firenena ny ady, ka be ny maty tany an’ala tamin’izay noho ny maty an’ady.

⁹Nifanehatra tampoka tamin’ny miaramilan’i Davida i Absalôma raha iny nitaingina boriky iny izy. Nitsofoka tany an-tsefatsefaky ny rantsan’ny hazo terebinta lehibe ilay ampondra, ka voasaringotry ny terebinta ny lohan’i Absalôma; ary lasa nanohy dia ilay boriky, fa izy kosa nihantona teo anelanelan’ny lanitra sy ny tany.

¹⁰Nahita azy ny lehilahy iray ka nilaza tamin’i Jôaba hoe: — Hitako mihantona amin’ny terebinta i Absalôma.

¹¹Ary hoy i Jôaba tamin’ilay mpilaza: — Hitanao izy, koa nahoana no tsy nasianao ho faty teo ihany? Ho nomeko sekela volafotsy folo sy fehikibo ianao.

¹²Fa hoy ralehilahy tamin’i Jôaba: — Na dia homenao sekela volafotsy arivo aza aho, dia tsy haninji-tanana amin’io zanakalahin’ny mpanjaka io, satria ny sofintsika no samy nandre ny nandidian’ny mpanjaka anao sy i Abisay ary i Itàhy hoe: «Aoka mba tsy hisy hikasika an’i Absalôma.»

¹³Koa raha nivadika tamin’izany aho ka nahafaty azy, dia tsy misy miafina amin’ny mpanjaka; ary na dia ianao io aza dia hitsangana hiampanga ahy.

¹⁴Koa hoy i Jôaba hoe: — Tsy handany andro aminao eto aho! Dia noraisiny ny lefona telo ka natrobany ny fon’i Absalôma, raha ilay izy mbola velona ka nihantona tamin’ny terebinta iny.

¹⁵Nanodidina an’i Absalôma ny tovolahy folo mpitondra ny fiadian’i Jôaba ka nanapitra ny ainy.

¹⁶Notsofin’i Jôaba ny anjomara, dia natsahatr’ireo miaramilan’i Davida ny fanenjehana ny Israelita satria efa nanakana azy i Jôaba.

¹⁷Nalaina ny fatin’i Absalôma, ka natsipy tao anaty lavaka lehibe iray tany an’ala dia nasiana antontam-bato lehibe teo amboniny. Ary nandositra nody any an-tranony avokoa ny Israelita rehetra.

¹⁸Fahavelony i Absalôma dia efa nampanao tsangambato ho azy tao an-dohasahan’ny mpanjaka, fa hoy izy anakampo: «Tsy manan-janakalahy hamelo-maso ny anarako aho.» Koa ny anaran’ny tenany ihany no niantsoany an’ilay tsangambato. Izany no mbola anaovana azy mandraka ankehitriny hoe «Tsangambaton’i Absalôma».

¹⁹Hoy i Ahimahatsa zanakalahin’i Tsadôka: — Aoka hihazakazahako any amin’ny mpanjaka ny fitondrana ity vaovao mahafaly ny amin’ny nanomezan’ny TOMPO azy rariny ity ka nanafahany azy tamin’ny fahavalony.

²⁰Fa hoy i Jôaba taminy: — Tsia, tsy ho mpitondra vaovao mahafaly ianao raha anio no mankany, satria maty ny zanakalahin’ny mpanjaka; fa amin’ny andro hafa ianao no hitondra vaovao.

²¹Ary hoy i Jôaba tamin’ny Kosita iray mpanompony: — Mandehana ka lazao amin’ny mpanjaka izay efa hitanao! Niankohoka teo anatrehan’i Jôaba ilay Kosita, dia lasa nihazakazaka.

²²Fa hoy indray i Ahimahatsa zanakalahin’i Tsadôka tamin’i Jôaba: — Izay alehany any alehany, fa avelao aho hihazakazaka hanaraka ilay Kosita. Hoy kosa i Jôaba hoe: — Hihazakazaka ahoana, anaka? Tsy hitondra soa ho anao velively ny vaovao toy izany!

²³Fa novalian’i Ahimahatsa hoe: — Tsy mampaninona izany, fa avelao ihany aho handeha. Ka hoy i Jôaba taminy: — Mandehana àry! Dia nihazakazaka nihazo ny lalan’ny lemak’i Jôrdàna i Ahimahatsa ka nisongona ilay Kosita.

²⁴Tamin’izay i Davida dia nipetraka teo anelanelan’ny varavaran-droa. Dia niakatra teo amin’ny marin-tampona ambony vavahadin’ny manda ny mpitily; raha niandrandra izy, dia nahatazana lehilahy iray mihazakazaka.

²⁵Niantso mafy mba hampandre ny mpanjaka ilay mpitily. Dia hoy ny mpanjaka hoe: — Raha irery izy, dia vaovao tsara no hambarany. Rehefa nanatona hatrany ilay lehilahy teo,

²⁶dia nahita olon-kafa nihazakazaka indray ny mpitily. Ka niantso mafy ny mpiandry vavahady izy nanao hoe: — Iny koa mbola misy lehilahy iray tamy mihazakazaka. Fa hoy ihany ny mpanjaka: — Hitondra vaovao tsara koa izany.

²⁷Ary hoy ny mpitily hoe: — Raha ny fomba fihazakazahany, dia fantatro ilay voalohany fa i Ahimahatsa zanakalahin’i Tsadôka. Dia hoy ny mpanjaka: — Lehilahy tsara fanahy iny, ka vaovao tsara no ahatongavany.

²⁸Ary niantso mafy i Ahimahatsa ka nanao tamin’ny mpanjaka hoe: — Fiadanana! Niankohoka nitehi-tany izy teo anatrehan’ny mpanjaka sady nilaza hoe: — Hisaorana anie ny TOMPO Andriamanitrao fa efa natolony anao, ry andriamanjaka, ireo olona nanainga tanana hanohitra anao.

²⁹Dia hoy ny mpanjaka: — Tsara ihany ve ny amin’i Absalôma zatovolahy izay? Fa hoy kosa i Ahimahatsa: — Raha naniraka ity mpanomponao ity sy ny tenako i Jôaba, dia saritadritaka be no hitako nefa tsy fantatro izay antony.

³⁰Ary hoy ny mpanjaka taminy: — Mihataha kely ianao ka mijanona etsy. Dia nihataka kely izy ka nijanona teo.

³¹Ary tonga tamin’izay ilay Kosita ka nanao hoe: — Manam-baovao tsara ho anao aho, ry andriamanjaka; fa ankehitriny ny TOMPO efa nanome rariny anao ka nanafaka anao tamin’ireo rehetra nitsangana hikomy aminao.

³²Dia hoy ny mpanjaka tamin’ilay Kosita: — Mba tsara ihany ve ny amin’i Absalôma zatovolahy izay? Fa hoy kosa ilay Kosîta: — Ho tahaka an’iny zatovolahy iny anie, ry andriamanjaka, ny fahavalonao sy izay rehetra mitsangana hanisy ratsy anao!