Read Dikateny Iombonana Eto Madagasikara 2 Samoela 22 Bible Online

2 Samoela 22 - Dikateny Iombonana Eto Madagasikara bible

2 Samoela 22

¹Dia nanao izao tononkira izao ho an’ny TOMPO i Davida tamin’ny andro izay nanafahany azy tamin’ireo fahavalony rehetra, indrindra tamin’i Saoly.

²Ka hoy izy hoe: Ny TOMPO no harambato fierena azo antoka ho ahy.

³Izy no Andriamanitro sy vatolampy ialofako, ampinga fiarovana sy herim-pandresena ho ahy. Sady toeram-pamaharana fandosirako Izy, no mpamonjy mahafaka ahy amin’ny fampahoriana.

⁴Hoderaina anie ny TOMPO! Fa niantso Azy aho, dia voavonjy ho afaka amin’ny fahavaloko.

⁵Toy ny onja manototra ahy ny fahafatesana sady nampitahotra ahy toa riaka mandrava;

⁶toy ny fatotra ahodidina ahy ny toeran’ny maty, toa harato amandrihana ahy ny fahafatesana.

⁷Tao an-katerena aho no velon-taraina sy niantso vonjy tamin’ny TOMPO Andriamanitro, ka tany an-Tempoliny Izy no nandre ny feoko ary koa nihaino izany antsoantsoko.

⁸Tamin’izay dia nihovitrovitra mafy ny tany; nikorosy ny fiorenan’ny lanitra, ka nihozongozona ireny fa tezitra ny TOMPO.

⁹Nisy setroka nidonaka avy teo an’orony ary afo mandevona avy teo am-bavany, ka narahina tselatra mandoro izany.

¹⁰Dia nandetsy ny lanitra ny TOMPO ka nidina; rahona matevina no teo ambany tongony,

¹¹ka toy ny kerobima nitaingenany izany; dia nanidina sy nisosa Izy ka teo amin’ny elatry ny rivotra no niseho.

¹²Tao anaty raho-mainty Izy no niery ka voahodidina rahona miavosa izay vesaran’ny rano mamonto azy.

¹³Manoloana Azy nisy hazavam-be izay niteraka afo mitselatra.

¹⁴Tany an-danitra ny TOMPO Avo Indrindra no nampitalakotroka ny varatra sy nampanakoako izany feony;

¹⁵nalefany ny tselatra ka nipariaka toy ny zana-tsipîka nifanaretsaka.

¹⁶Noho ny fandrahonan’ny TOMPO mbamin’ny fifofofofon’ny hatezerany, dia niseho ny fanambanin’ny ranomasimbe, niharihary ny fanorenan’izao tontolo izao.

¹⁷Avy eny an-danitra ambony Izy no naninji-tanana handray ahy sy nisintona ahy hiala tamin-dranobe;

¹⁸ka afaka aho tamin’ny fahavaloko matanjaka, dia tamin’ireo mpandrafy mahery noho izaho.

¹⁹Tamin’ny androm-pahoriako no nanafika ahy ireo nefa tonga ny TOMPO ka nanohana ahy;

²⁰navoakany ho eo an-kalalahana aho ary nafahany satria tena tiany.

²¹Soa no ataon’ny TOMPO ahy satria marina aho; izany no avaliny ahy satria madio ny toetrako,

²²fa voatandriko ny sori-dalan’ny TOMPO ary tsy ivadihako ilay Andriamanitro;

²³ankatoaviko avokoa ny fitsipiny ary tsy mba ialako ireo didiny.

²⁴koa tsy manan-tsiny aho aminy fa nitandrin-tena tsy ho diso.

²⁵Eny, soa tokoa no navalin’ny TOMPO ahy satria marina aho sy hitany madio toetra.

²⁶TOMPO ô, mahatoky Ianao amin’izay matoky Anao; tsy manan-tsiny koa Ianao amin’izay tsy manan-tsiny;

²⁷madio Ianao amin’izay madio, miolakolaka kosa amin’izay mpiolikolika.

²⁸Ianao mihitsy no mamonjy ny vahoaka ory, fa mampitanondrika an’ireo mpiavonavona.

²⁹TOMPO ô, jiro mirehitra ho ahy Ianao; eny, TOMPO ô, Ianao no manazava izany haiziko.

³⁰Noho Ianao Andriamanitro, na hady aza itsambikinako[112], na manda aza ihoarako.

³¹Lavorary ny sori-dalan’Andriamanitra, azo antoka ny torohevitry ny TOMPO; toy ny ampinga fiarovana Izy ho an’izay rehetra mialoka aminy.

³²Fa iza moa no Andriamanitra afa-tsy ny TOMPO ihany? Ary iza no vatolampy ho anay afa-tsy ilay Andriamanitray?

³³Izy no mpiaro mahery ho ahy sy mampizotra ahy lalana lavorary;

³⁴Ataony kinga toy ny gazela aho ary ajorony amin’ny toerana avo[113];

³⁵Izy no manofana ahy ho amin’ny ady ka ahaizako manenjana tsipîka varahina.

³⁶Ny ampingam-pandresenao no atolotrao ahy, Tompo ô; mamaly ny antsoko Ianao ary koa manandratra ahy.

³⁷Ataonao faingam-pandeha kokoa aho, nefa ny hato-tongotro tsy hangozohozo.

³⁸Manenji-pahavalo aho ka mandripaka azy, ary tsy miverina raha tsy efa ringako izy.

³⁹Ringaniko sy montsaniko ireo ka tsy hiarina intsony ary dia mitsitra ambany tongotro.

⁴⁰Omenao hery hoenti-miady manko aho, ka adabokao ho ambaniko ny mpamely ahy.

⁴¹Ataonao mandositra ahy ny fahavaloko ary aringako ireo mpankahala ahy.

⁴²Miherikerika mitady vonjy izy, kanefa tsy misy mamonjy; ny TOMPO no antsoiny fa tsy mamaly azy.

⁴³Kosehiko toa vovoka entin-drivotra ireny; hoseko toy ny fotaka eny an-dalam-be.

⁴⁴Afahanao amin’ny vahoaka mpikomy aho ary arovanao ho filohan’ireo firenena; ka olona tsy fantatro akory no indro manjary manompo ahy.

⁴⁵Vahiny no tonga mila sitraka amiko; teny kely no ataoko, dia ekeny aho.

⁴⁶Mikoy ry zareo ka mangovitra no miala ny manda fiarovany.

⁴⁷Velona ny TOMPO! Isaorana ilay Vatolampiko. Hasandratra anie Andriamanitra vatolampy mampandresy ahy.

⁴⁸Izy no manao ny famaliana ho ahy ary mampanaiky firenena hofeheziko.

⁴⁹TOMPO ô, afahanao amin’ny fahavaloko aho; eny, ataonao resiko ireo mpamely ahy ary tsy mahazo ahy ny mpanao an-keriny.

⁵⁰Koa eo anivom-pirenena no hiderako Anao sady hankalazako Anao amin-kira[114].

⁵¹Ny TOMPO manome fandresena lehibe ho an’ilay mpanjaka voafidiny; ary maneho fitia an’ilay voahosony, dia i Davida sy ireo taranany hatrany amin’ny mandrakizay.