Read Dikateny Iombonana Eto Madagasikara 2 Samoela 8 Bible Online

2 Samoela 8 - Dikateny Iombonana Eto Madagasikara bible

2 Samoela 8

¹Taorian’izany dia nandresy ny Filistinina i Davida, ka nampilefitra azy; ary nalainy teo an-tanan’ny Filistinina ny fifehezan-drenivohitra.

²Nandresy ny Môabita koa izy ka nampandrîny tamin’ny tany ireo mba horefesina amin’ny tady; koa novonoiny ho faty ny androatokony ary navelany ho velona kosa ny ampahatelony[45]. Noho izany dia tonga olom-pehezin’i Davida sady mpandoa hetra ho azy ny Môabita.

³Mbola resin’i Davida koa i Hadadehezera, zanakalahin’i Rehôba sady mpanjakan’i Tsôbà[46]; tamin’i Hadadehezera ndeha haka indray ny faritry ny onin’i Eofrata izany.

⁴Mpitaingin-tsoavaly miisa andiany 17 sy miaramila an-tongotra miisa andiany roapolo no voababon’i Davida taminy; saingy nasain’i Davida nokapain-tongotra avokoa ny soavalin-kalesy fa ny tokony ho amin’ny kalesy zato ihany no sisa notazoniny.

⁵Dia tonga ny Sirianina avy any Damasy mba hamonjy an’i Hadadehezera mpanjakan’i Tsôbà; kanefa nahafatesan’i Davida miaramila miisa antokony 22[47] koa ny Sirianina.

⁶Nametrahan’i Davida governora tany Siria faritr’i Damasy, ka dia tonga olom-pehezin’i Davida sady mpandoa hetra ho azy ny Sirianina. Fa nampandresy an’i Davida tamin’izay fanafihany rehetra ny TOMPO.

⁷Ary nalain’i Davida ny ampinga volamena izay teny amin’ireo mpanompon’i Hadadehezera ka nentiny tany Jerosalema.

⁸Nahazoan’i Davida mpanjaka halimo be dia be koa tao Betà sy Berôtahy[48], izay samy tanànan’i Hadadehezera.

⁹Ren’i Tôhỳ, mpanjakan’i Hamata[49], fa resin’i Davida avokoa ny tafik’i Hadadehezera;

¹⁰dia nirahin’i Tôhỳ ho any amin’i Davida mpanjaka i Jôrama zanany lahy mba hiarahaba sy hidera azy noho ny niadiany tamin’i Hadadehezera ka nandreseny azy; fa mpiady tamin’i Tôhỳ io Hadadehezera io. Nitondra fanaka volafotsy sy volamena ary halimo ho an’i Davida i Jôrama.

¹¹Natokan’i Davida mpanjaka ho an’ny TOMPO ireo fanaka ireo, tahaka ny nanokanany ny volafotsy sy ny volamena azony tamin’ireo firenena hafa rehetra efa resiny,

¹²dia ny Sirianina sy Môabita ary Hamônita mbamin’ny Filistinina sy Hamalekita, ary koa nanokanany ny babo azony tamin’i Hadadehezera zanakalahin’i Rehôba sady mpanjakan’i Tsôbà.

¹³Rehefa niverina avy tany Siria i Davida, dia nahazo laza tamin’ny nandreseny koa ny Edômita 18 000 teo amin’ny Lohasahan-tsira[50].

¹⁴Nametrahany governora tany Edôma; eny, nametrahany governora i Edôma manontolo, ka tonga olom-pehezin’i Davida avokoa ny mponiny. Ary nampandresy an’i Davida tamin’izay fanafihany rehetra ny TOMPO.

¹⁵Dia nanjaka tamin’i Israely manontolo i Davida ka nanao ny rariny sy ny fahamarinana tamin’ny vahoakany rehetra.

¹⁶I Jôaba, zanakalahin’i Tserôià, no lehiben’ny tafika; i Jôsafata, zanakalahin’i Ahitoda, no mpitondratenin’ny mpanjaka;

¹⁷i Tsadôka zanakalahin’i Ahitoba mbamin’i Ahimelèka zanakalahin’i Abiatara no mpisorona; i Seraià no mpitantsoratra;

¹⁸i Benaià, zanakalahin’i Jôiadà, no lehiben’ny mpiambina andriamanjaka; ary ireo zanakalahin’i Davida kosa dia mpanolotsaina.