Read Dikateny Iombonana Eto Madagasikara 1 Mpanjaka 1 Bible Online

1 Mpanjaka 1 - Dikateny Iombonana Eto Madagasikara bible

1 Mpanjaka 1

¹Efa antitra sy konka i Davida mpanjaka; ka na dia norakofan-damba aza izy, dia tsy nety nafana.

²Hoy ny mpanompony taminy: — Aoka ianao, ry andriamanjaka, hitadiavana tovovavy virijiny izay ho eo anatrehanao mandrakariva mba ho mpitaiza anao sy handry eo anilanao, ka dia hafana ianao.

³Dia nitady izay tovovavy tsara tarehy teo amin’ny tanin’i Israely manontolo ireto mpanompon’i Davida; ary tao Sonema[1] no nahitany an’i Abisaga izay nentiny tany amin’ny mpanjaka.

⁴Tsara tarehy fatratra ilay tovovavy ka tonga mpitaiza sy mpanompon’ny mpanjaka; nefa tsy niray taminy akory ny mpanjaka.

⁵Fa i Adônià zanakalahin’i Hagita kosa tamin’izay no nanandra-tena ho mpanjaka. Dia nanomana kalesy sy mpitaingin-tsoavaly[2] ary lehilahy dimampolo ho mpihazakazaka eo anoloany izy.

⁶Hatramin’izay niainany dia tsy mbola niteny mafy azy i Davida rainy na nanontany azy ny antony nanaovany izany. Izy moa dia lehilahy tsara tarehy tokoa, ary natera-dreniny nanarakaraka an’i Absalôma.

⁷Dia niresaka tamin’i Jôaba[3] zanakalahin’i Tseroià sy tamin’i Abiatara mpisorona i Adônià, ka nahazo ny fanohanan’ireo.

⁸Fa i Tsadôka mpisorona sy i Benaià zanakalahin’i Jôiadà sy i Natàna mpaminany mbamin’i Simehỳ sy i Rehỳ ary ireo kalazan’i Davida kosa tsy mba niandany tamin’i Adônià.

⁹Indray andro dia nikorana teo amin’ny vaton’i Zôheleta akaikin’i Haîna-Rôgela[4] i Adônià ka namono ondry sy omby ary biby matavy. Nasainy avokoa ny rahalahiny rehetra zanaky ny mpanjaka ary ny lehilahy rehetra amin’i Joda izay mpanompon’ny mpanjaka.

¹⁰Kanefa tsy mba nasainy i Natàna mpaminany sy i Benaià sy ireo lehilahy kalaza ary i Salômôna rahalahiny.

¹¹Niteny tamin’i Baty-Seba renin’i Salômôna[5] i Natàna ka nanao hoe: — Tsy efa renao va fa nanangan-tena ho mpanjaka i Adônià zanakalahin’i Hagita, nefa i Davida andriamanjaka tsy nahalala izany akory?

¹²Koa etsy hotoroako hevitra ianao mba hamonjena aina ny tenanao sy i Salômôna zanakao.

¹³Mankanesa any amin’i Davida mpanjaka ka lazao aminy hoe: «Moa tsy efa nianiana tamiko va ianao, ry andriamanjaka[6], fa i Salômôna zanako lahy no hanjaka handimby anao ka hipetraka eo amin’ny sezafiandriananao. Koa nahoana no i Adônià indray no tonga mpanjaka?»

¹⁴Dia hoy ihany i Natàna: — Ary raha ilay mbola eo am-piresahana amin’ny mpanjaka iny ianao, dia mba hiditra ao aminy koa aho hanamafy izay voalazanao.

¹⁵Dia nankany amin’ny mpanjaka tao an’efitranony i Baty-Seba. Efa tena antitra ny mpanjaka; ary i Abisaga avy any Sonema no tao nanompo azy.

¹⁶Nandohalika niankohoka teo anatrehan’ny mpanjaka i Baty-Seba, ka nitenenan’ny mpanjaka hoe: — Inona no ilainao?

¹⁷Dia novaliany hoe: — Efa nianiana tamiko teo anatrehan’ny TOMPO Andriamanitrao ianao, ry andriamanjaka, fa i Salômôna zanako lahy no hanjaka handimby anao ka hipetraka eo amin’ny sezafiandriananao.

¹⁸Indro ankehitriny fa i Adônià no manjaka, nefa tsy mba fantatrao akory izany.

¹⁹Ary efa nanao fety be namonoana omby sy biby matavy ary ondry maro izy ka nanasa ny zanakalahinao rehetra sy i Abiatara mpisorona ary i Jôaba filohan’ny tafika, fa i Salômôna mpanomponao ihany no tsy mba nasainy.

²⁰Ankehitriny, ry andriamanjaka, ny vahoakan’i Israely rehetra dia miandrandra fatratra ny fanambarànao ampahibemaso ny anaran’izay hipetraka handimby anao eo amin’ny sezafiandriananao.

²¹Raha tsy izany, rehefa modimandry ka tsy eo intsony ianao, ry andriamanjaka, dia hatao toy ny olo-meloka ny tenako sy i Salômôna zanako.

²²Raha mbola teo am-piresahana tamin’ny mpanjaka ravehivavy, dia niditra i Natàna mpaminany.

²³Ary nisy nilaza tamin’ny mpanjaka hoe: Indro ao i Natàna mpaminany. Dia nankeo anatrehan’ny mpanjaka i Natàna ka niankohoka nitehi-tany ho fanajana azy

²⁴ary niteny hoe: — Ry andriamanjaka ô, angaha ianao efa nilaza fa i Adônià no hanjaka handimby anao ka hipetraka eo amin’ny sezafiandriananao?

²⁵Fa androany izy dia nidina tao amin’ny vaton’i Zôheleta ka nanao fety be izay namonoana omby sy zanak’omby matavy ary ondry maro. Nasainy tao avokoa ny zanakalahinao rehetra sy ny filohan’ny tafika ary i Abiatara mpisorona. Indreo izy rehetra fa mihinana sy misotro eo anatrehany ka mihorakoraka hoe: «Ho ela velona anie i Adônià mpanjaka!».

²⁶Nefa dia tsy mba nasainy na ny tenako na i Tsadôka mpisorona, na i Benaià zanakalahin’i Jôiadà, na i Salômôna zanakalahinao.

²⁷Moa ve baiko avy taminao, ry andriamanjaka, no nahatonga izany? Fa izahay mpanomponao ireto tsy mba nampahafantarinao izay handimby anao eo amin’ny sezafiandriananao.

²⁸Tamin’izay dia niteny i Davida mpanjaka ka nanao hoe: — Antsoy hankatỳ i Baty-Seba. Dia nankeo anatrehan’ny mpanjaka izy ka nijoro teo anoloany.

²⁹Ary ny mpanjaka nanao izao fianianana izao taminy: — Velona ny TOMPO, Izay nanafaka ahy tamin’ny fahoriana rehetra,

³⁰koa mianiana aminao aho fa hotanterahiko anio izay efa nampanantenaiko taminao teo anatrehan’ny TOMPO Andriamanitr’i Israely hoe: «I Salômôna zanakao no hanjaka handimby ahy ka hipetraka eo amin’ny sezafiandrianako».

³¹Dia nandohalika i Baty-Seba ka niankohoka nitehi-tany ho fanajana ny mpanjaka ary nihiaka hoe: — Ho ela velona mandrakizay anie ianao, ry Davida andriamanjaka!

³²Dia nampiantsoin’i Davida i Tsadôka mpisorona sy i Natàna mpaminany ary i Benaià zanakalahin’i Jôiadà; rehefa tonga teo anatrehan’ny mpanjaka izy telo lahy ireo,

³³dia nobaikoiny hoe: — Vorio ny miaramila mpiambina ahy, dia ampitaingeno ny borikivaviko i Salômôna zanako, ka ento midina any Gihôna izy[7].

³⁴Any no hanosotra azy ho mpanjakan’i Israely i Tsadôka mpisorona sy i Natàna mpaminany[8]; ary ianareo sisa kosa hitsoka ny anjomara sady hihiaka hoe: «Ho ela velona anie i Salômôna mpanjaka!»

³⁵Avy eo ianareo dia hiakatra hanaraka azy ao an-tanàna; ary hiditra i Salômôna dia hipetraka eo amin’ny sezafiandrianako ka hanjaka hisolo ahy, satria izy no voatendriko ho filohan’i Israely sy i Joda.

³⁶Dia hoy i Benaià zanakalahin’i Jôiadà namaly ny mpanjaka: — Amen! Izany no tenin’ny TOMPO Andriamanitrao, ry andriamanjaka.

³⁷Toy ny efa nanombàn’ny TOMPO anao anie, ry andriamanjaka, no hanombàny koa an’i Salômôna; ary hataony be voninahitra noho ny anao anie ny sezafiandrianan’i Salômôna!

³⁸Dia nidina nankany amin’i Salômôna i Tsadôka mpisorona sy i Natàna mpaminany ary i Benaià zanakalahin’i Jôiadà, niaraka tamin’ny Keretita sy ny Peletita[9] mpiambina andriana ka nampitaingina azy ny borikivavin’i Davida, ary nitondra azy nankany Gihôna.

³⁹Dia nalain’i Tsadôka mpisorona ny tandroka misy menaka tao amin’ny Tranolay Fihaonana ka nandrarahany tamin’ny lohan’i Salômôna ho fanosorana azy ho mpanjaka. Notsofina tamin’izay ny anjomara, ary ny vahoaka rehetra teo samy nihiaka hoe: «Ho ela velona anie i Salômôna mpanjaka!»

⁴⁰Dia niakatra nanaraka azy tao an-tanàna ny vahoaka rehetra izay nitsoka sodina sady faly aoka izany, ka dia nila hitresaka ny tany noho ny horakorany.

⁴¹Rehefa tapi-nihinana i Adônià sy ny nasainy rehetra dia samy nahare ny horakoraky ny olona; i Jôaba aza dia nandre ny feon’anjomara ka velom-panontaniana hoe: — Fa inona izany kotaba be manerana ny tanàna izany?

⁴²Raha mbola niteny toy izany izy, dia indro niditra i Jônatàna zanakalahin’i Abiatara mpisorona; ka hoy i Adônià taminy: — Mandrosoa fa olom-banona ianao, ka ho vaovao tsara no entinao.

⁴³Fa niteny i Jônatàna ka nanao tamin’i Adônià hoe: — Indrisy, tsy izany akory fa izao: I Davida andriamanjaka no efa nanangana an’i Salômôna ho mpanjaka handimby azy.

⁴⁴Ary i Davida efa naniraka an’i Tsadôka mpisorona sy i Natàna mpaminany ary i Benaià zanakalahin’i Jôiadà mbamin’ny Keretita sy ny Peletita mpiambina mba hiaraka amin’i Salômôna; ka ireo no nampitaingina azy ny borikivavin’ny mpanjaka.

⁴⁵Ary i Tsadôka mpisorona sy i Natàna mpaminany nanosotra azy ho mpanjaka teo Gihôna. Avy eo ny olona rehetra dia niakatra tao an-tanàna naneho ny hafaliany, ka dia feno horakoraka ny tanàna. Izany izao kotaba be renareo izao.

⁴⁶Manaraka izany koa dia efa tafapetraka amin’ny sezafiandrianana maha mpanjaka i Salômôna;

⁴⁷ary tonga niarahaba an’i Davida andriamanjaka ireo minisitra ka nanao hoe: «Hataon’ilay Andriamanitrao ho tsara laza kokoa noho ianao anie i Salômôna, ary hataony ho be voninahitra noho ny sezafiandriananao anie ny sezafiandrianany». Dia niankohoka teo am-parafara ny mpanjaka,

⁴⁸ka niteny hoe: «Hisaorana anie ny TOMPO Andriamanitr’i Israely, fa nanome izay ho mpandimby ahy eo amin’ny sezafiandrianako androany; ary mbola mihiratra ny masoko no mitranga izany».

⁴⁹Raiki-tahotra avokoa ireo olona nasain’i Adônià ka nitsangana ary samy nandositra tamin’izay azony nitsoahana.

⁵⁰Natahotra an’i Salômôna koa i Adônià, dia nitsangana ka lasa namikitra tamin’ny tandroky ny alitara[10].

⁵¹Ary nisy nanambara izany tamin’i Salômôna ka nanao hoe: — Natahotra anao mafy i Adônià, ry Salômôna mpanjaka; ka indro izy fa mamikitra amin’ny tandroky ny alitara sady manao hoe: «Tsy hiala eto mihitsy aho raha tsy mianiana amiko i Salômôna mpanjaka fa tsy hamono ahy ho faty amin’ny sabatra».

⁵²Fa hoy i Salômôna: — Raha mitondra tena toy ny olom-banona izy, dia tsy hisy hikasika na dia singam-bolony iray aza; fa raha hita ho manan-keloka kosa izy, dia ho faty ihany.

⁵³Dia naniraka olona hampidina azy hiala teo amin’ny alitara i Salômôna. Ary tonga niankohoka teo anatrehan’i Salômôna mpanjaka i Adônià ka nitenenany hoe: — Mahazo mody an-tranonao ianao!