Read Dikateny Iombonana Eto Madagasikara 1 Mpanjaka 12 Bible Online

1 Mpanjaka 12 - Dikateny Iombonana Eto Madagasikara bible

1 Mpanjaka 12

¹Nankany Sekema[96] i Rehabohama, satria tao no efa nahatongavan’ny Israelita tavaratra rehetra hampanjaka azy.

²Raha nandre izany i Jerôbohama zanakalahin’i Nebata, dia mbola tany Ejipta toerana nandosirany an’i Salômôna mpanjaka izy;

³koa nisy olona nirahina haka azy; ary tonga izy sy ny vondron’ny Israelita tavaratra rehetra, ka niteny tamin’i Rehabohama hoe:

⁴— Irainao dia nampitondra zioga mavesatra anay. Fa ankehitriny kosa, raha mba hamaivaninao ny fanompoana mafy tamin-drainao sy ny zioga mavesatra nampiantsorohany anay, dia hanompo anao izahay.

⁵Dia hoy ny navalin’i Rehabohama azy: — Mandehana aloha fa mbola hieritreritra aho; ka raha afaka telo andro, dia miverena atỳ amiko indray ianareo. Dia lasa nody ny olona.

⁶I Rehabohama kosa naka hevitra tamin’ny loholona izay mpandraharahan’i Salômôna rainy fony fahavelony ka nanontany azy hoe: — Ahoana no hevitra omenareo havaliko an’ireo vahoaka ireo?

⁷Dia hoy ny loholona tamin’i Rehabohama: — Raha izao ianao no vonon-kanompo azy ka manao teny mamy aminy, dia ho mpanomponao hatrany izy.

⁸Kanjo tsy noraharahain’i Rehabohama ny torohevitra nomen’ny loholona azy; fa ny tovolahy izay nitovitovy taona taminy sady efa mpandraharahany no nakany hevitra,

⁹ka nanontaniany hoe: — Ahoana kosa no mba hevitra omenareo havalintsika ny vahoaka izay niangavy ahy hanamaivana ny zioga nampiantsorohan-draiko azy.

¹⁰Dia hoy ireto tovolahy ireto tamin’i Rehabohama: — Niangavian’ireo vahoaka ireo ianao hanamaivana ny zioga mavesatra nampiantsorohan-drainao azy. Koa izao no lazao aminy: «Ny ankikeliko dia lehibe noho ny sandrin-draiko[97].

¹¹Raha nampitondra zioga mavesatra anareo ny raiko, izaho kosa vao mainka hanampy trotraka izany; karavasy tsotra no namaizan-draiko anareo, fa karavasy misy faraingo kosa no hamaizako anareo.»

¹²Tamin’ny andro fahatelo dia nankany amin’i Rehabohama i Jerôbohama sy ny vahoaka israelita tavaratra rehetra, araka ny tenin’ny mpanjaka hoe: «Miverena atỳ amiko indray ianareo amin’ny andro fahatelo».

¹³Teny mahery no navalin’ny mpanjaka ireo vahoaka fa tsy noraharahainy akory ny torohevitry ny loholona;

¹⁴ary araka ny torohevitr’ireo tovolahy no nitenenany taminy hoe: — Nampitondra zioga mavesatra anareo ny raiko, fa izaho kosa vao mainka hanampy trotraka izany; karavasy tsotra no namaizan-draiko anareo, fa karavasy misy faraingo kosa no hamaizako anareo.

¹⁵Koa tsy nankatò ny fitakian’ny vahoaka ny mpanjaka; fa ny TOMPO no nahatonga izany zavatra izany mba hahatanteraka ny fampanantenana izay nampilazainy an’i Ahià mpaminany avy any Silao[98] tamin’i Jerôbohama zanakalahin’i Nebata.

¹⁶Rehefa tsapan’ny Israelita tavaratra rehetra fa tsy nankatoavin’ny mpanjaka ny fitakiany, dia hoy ny navalin’ireo hoe: — Tsy manana anjara amin’i Davida isika na manana anjara lova amin’ny zanakalahin’i Jisay. Samia mody any an-tranony avy isika, ry Israelita tavaratra; ary ianao kosa, ry zafikelin’i Davida, karakarao ny fanjakanao[99]! Dia samy nody ho any an-tranony avy ny Israelita tavaratra rehetra.

¹⁷Fa ny Israelita nonina tamin’ny tanànan’i Joda ihany no nanjakan’i Rehabohama.

¹⁸Ary naniraka an’i Adôrama[100] mpiandraikitra ny asa anterivozona i Rehabohama mpanjaka; nefa nitora-bato an’i Adôrama ny Israelita tavaratra rehetra ka nahafaty azy. Zara raha afa-nitaingina ny kalesiny haingana i Rehabohama mba handositra any Jerosalema.

¹⁹Toy izany no nikomian’i Israely avaratra tamin’ny taranak’i Davida mandraka androany.

²⁰Rehefa ren’ny Israelita tavaratra rehetra fa tafaverina indray i Jerôbohama, dia nampiantsoina hankao amin’ny fivoriana izy ka nampanjakainy tamin’i Israely avaratra manontolo; ary dia tsy nisy nanaraka ny taranak’i Davida intsony afa-tsy ny fokon’i Joda ihany.

²¹Vao tonga tany Jerosalema i Rehabohama, dia namory miaramila voafantina miisa vondrona 180 tamin’ny fokon’i Joda sy i Benjamîna mba hiady amin’i Israely avaratra ka hamerina azy indray io fanjakana io ho an’ny tenany, izay zanakalahin’i Salômôna.

²²Kanjo nisy tenin’Andriamanitra tamin’i Semahià olon’Andriamanitra, dia teny nanao hoe:

²³— Ambarao amin’i Rehabohama, zanakalahin’i Salômôna sady mpanjakan’i Joda, ary koa amin’ny taranak’i Joda sy i Benjamîna rehetra ary amin’ny vahoaka sisa,

²⁴fa izao no lazain’ny TOMPO: «Aza mandeha hiady amin’ny Israelita tavaratra mpiray firenena aminareo; samia mody any an-tranony avy ianareo, satria Izaho no nahatonga izao zavatra izao.» Dia nankatoavin’ny olona izany tenin’ny TOMPO izany, ka samy lasa nody tokoa izy araka ny tenin’ny TOMPO.

²⁵Ary nampamboarin’i Jerôbohama ho tanànamimanda i Sekema any amin’ny faritra be tendrombohitr’i Efraîma ka nonenany. Rehefa niala tao Sekema izy, dia nampamboatra an’i Penoela ho tanànamimanda koa.

²⁶Hoy i Jerôbohama anakampo hoe: «Raha izao no fandehan-javatra, dia mety hiverina amin’ny taranak’i Davida indray ny fanjakana.

²⁷Fa raha mbola miakatra hanao sorona ao an-tranon’ny TOMPO any Jerosalema ny vahoaka, dia hitodika amin’i Rehabohama mpanjakan’i Joda tompony indray ny fony; ka hamono ahy ho faty izy ary hiverina any amin’i Rehabohama.»

²⁸Dia nitady hevitra i Jerôbohama mpanjaka ka nanao ombilahikely volamena roa, ary nilaza tamin’ny vahoaka hoe: — Efa be izay niakaranareo matetika tany Jerosalema izay, ry Israely ô, koa indreo ny andriamanitrareo izay nitondra anareo niala tany Ejipta[101].

²⁹Ny sarivongana volamena iray dia napetrany tao Betela ary ny iray kosa tao Dana[102].

³⁰Nanosika ny olona hanota izany, fa maro ireo no tonga nanaraka ny iray tamin’ny sarivongana hatrany Dana.

³¹Nanorina trano teny amin’ny toeram-panasinana i Jerôbohama sady nanendry mpisorona hafa tamin’ny sarambabem-bahoaka, izay tsy anisan’ny taranak’i Levỳ akory.

³²Nanendry andro fety koa izy, dia ny andro faha-15 amin’ny volana fahavalo izay mitovitovy amin’ny fety any Joda[103] ihany, ary dia nanatitra sorona teo ambony alitara koa. Toy izany no nataony tany Betela, fa nanao sorona ho an’ireo ombilahikely namboariny izy; ary nampitoeriny tao Betela ireo mpisorona izay notendreny ho an’ireny toeram-panasinana ireny.

³³Tamin’ny andro faha-15 amin’ny volana fahavalo dia nanatitra sorona teo amin’ny alitara izay naoriny tao Betela i Jerôbohama. Izy ihany no tompon-tsafidy ny amin’io datin’andro io. Ary nataony andro fety ho an’ny Israelita tavaratra izany ka niakatra teo amin’ny alitara mihitsy i Jerôbohama mba handoro ny sorona hanetona.