Read Dikateny Iombonana Eto Madagasikara 1 Mpanjaka 9 Bible Online

1 Mpanjaka 9 - Dikateny Iombonana Eto Madagasikara bible

1 Mpanjaka 9

¹Rehefa vitan’i Salômôna ny fanaovana ny tranon’ny TOMPO sy ny lapan’andriamanjaka ary izay rehetra niriny hatao,

²dia nisehoan’ny TOMPO tahaka ilay nisehoany taminy tao Gibehôna[70] indray izy,

³ka nilazany hoe: — Efa reko ny vavaka amam-pifonana nataonao tamiko; koa efa voatokako ho Ahy ity trano nataonao ity mba hampitoerako mandrakizay ny voninahitro; ka ho ao aminy mandrakariva ny fiahiako anareo sy ny fitiavako anareo.

⁴Ianao kosa, raha mizotra eo anatrehako tahaka ny nizoran’i Davida rainao tamin’ny fo tsotra sy mahitsy, ka manao araka izay rehetra andidiako anao sy mitandrina ny lalàna amam-pitsipiko,

⁵dia hampaharitra mandrakizay ny sezafiandrianam-panjakanao amin’i Israely Aho, araka ny nampanantenaiko an’i Davida rainao ka nilazako fa tsy ho diso taranaka handimby izy eo amin’ny sezafiandrianan’i Israely[71].

⁶Nefa kosa raha miala amiko ianareo sy ny taranakareo, ka tsy mitandrina ny didy aman-dalàna izay napetrako teo anoloanareo fa mandeha manompo andriamani-kafa sy miankohoka eo anatrehany hitsaoka azy,

⁷dia hongotako ianareo, ry Israelita, tsy ho amin’ny tany izay nomeko anareo; ary hariako lavitra Ahy ity tempoly izay natokako hanajana Ahy ity. Amin’izay ianareo Israelita dia ho tonga fandatsa sy fanaraby any amin’ny firenen-kafa rehetra.

⁸Na dia avobe aza ity tempoly ity fahiny, dia hivarahontsana izay rehetra mandalo eo akaikiny ka hanontany hoe: «Nahoana no dia nataon’ny TOMPO toy izao ity tany ity sy ity tempoly ity[72]?»

⁹Ary hisy olona hamaly hoe: «Satria nilaozan’ny Israelita ny TOMPO Andriamaniny, dia Ilay nitondra ny razany niala tany Ejipta; ary nifikitra tamin’andriamani-kafa ireo sady niankohoka teo anatrehany sy nanompo azy, ka dia nampiharan’ny TOMPO izao loza isan-karazany izao.»

¹⁰I Hirama mpanjakan’i Tiro no nanome an’i Salômôna ny hazo sedera sy ny hazo kipreso ary ny volamena rehetra nilainy nenti-nanaovana ny tranon’ny TOMPO sy ny lapan’andriamanjaka. Nony afaka ny roapolo taona nanoneran’i Salômôna ireo trano roa ireo, dia nomeny tanàna roapolo tany amin’ny faritr’i Galilea i Hirama.

¹²Koa niala tany Tiro i Hirama mba hijery ireo tanàna ireo, nefa tsy nisy tiany.

¹³Dia hoy izy: «Tsy misy dikany amiko ireo tanàna nomenao ahy ireo, ry Salômôna rahalahiko». Izany no mbola anaovana izany faritra izany mandraka androany hoe «Tany Kabòla[73]».

¹⁴I Hirama anefa nampanatitra volamena telo taonina sy sasany ihany ho an’ny mpanjaka.

¹⁵Izao no endriky ny asa anterivozona nampanaovin’i Salômôna hanamboarana ny tranon’ny TOMPO sy ny lapan’andriamanjaka, ny tokotany Milao[74], ny mandan’i Jerosalema mbamin’ny tanànan’i Hatsôra sy i Megidao ary i Gezera.

¹⁶Notafihin’ny Farao mpanjakan’i Ejipta mantsy i Gezera, ka azony ary nodorany rehefa avy naripany ho faty ny Kanahanita mponina tao; dia nataony fanomezana ho an-janany vavy vadin’i Salômôna izany,

¹⁷ka namboarin’i Salômôna indray. Namboarin’i Salômôna ihany koa i Bety-Hôrôna ambany,

¹⁸i Bahalato, i Tamara any an-taniefitra,

¹⁹ary ny tanàna rehetra nataony fitahirizam-bokatra na fitobian-kalesy na fitoeran-tsoavaly. Natsangany avokoa izay rehetra tiany haorina tao Jerosalema sy tany Libano ary manerana ny tany nofeheziny. Izao àry no endriky ny asa anterivozona nampanaovin’i Salômôna[75]:

²⁰Mbola nisy tavela teo amin’ny tany ireo antokon’olona isan-karazany, dia ny Amôrita sy Hetita mbamin’ny Perizita sy Hivita ary Jebosita, izay samy tsy anisan’ny Israelita.

²¹Mbola nisy tavela teo tokoa ny taranak’ireo fa tsy naringan’ny Israelita, ka dia nampanaovin’i Salômôna asa fanompoana izay tohiziny mandraka androany.

²²Ny Israelita kosa tsy mba nampanaovin’i Salômôna izany, fa narotsany ho miaramila na ho manamboninahitra na ho mpitari-tafika na ho mpiantafika voafantina na ho mpitondra kalesy na ho mpitaingin-tsoavaly.

²³Ary ny lehiben’ireo mpanara-maso ny asa nampanaovin’i Salômôna kosa dia nisy 250 lahy izay nifehy ny olona mpanatontosa ny asa.

²⁴Rehefa niala tao an-Tanànan’i Davida ny zanakavavin’ny Farao hankany amin’ny trano naorina ho azy, izay vao namboarin’i Salômôna ny tokotany atao hoe Milao.

²⁵Intelo isan-taona i Salômôna no nanolotra sorona dorana manontolo sy sorom-pihavanana teo amin’ny alitara izay naoriny ho an’ny TOMPO. Ary nampandoro vovo-javamanitra koa izy ho fanajana ny TOMPO. Izany no nampiasany ny tempoly[76].

²⁶Ary i Salômôna mpanjaka nanao sambo tao Hetsiôny-Gebera akaikin’i Elôta eo amoron’ny Ranomasin’ny Volotara any amin’ny tany Edôma.

²⁷Dia nalefan’i Hirama tamin’ireo sambo ireo ny tantsambony izay matilò nahay ranomasina mba hiaraka amin’ny tantsambon’i Salômôna.

²⁸Ary tonga tany Ôfira[77] ireo ka nahazo volamena 12 taonina mahery ary nitondra izany ho an’i Salômôna mpanjaka.