Read Dikateny Iombonana Eto Madagasikara 2 Mpanjaka 18 Bible Online

2 Mpanjaka 18 - Dikateny Iombonana Eto Madagasikara bible

2 Mpanjaka 18

¹Tamin’ny taona fahatelo nanjakan’i Hôsea zanakalahin’i Elà tamin’i Israely no tonga mpanjakan’i Joda i Hezekià zanakalahin’i Ahaza.

²Feno 25 taona izy fony vao nanjaka; ary naharitra 29 taona no nanjakany tao Jerosalema. Ny anaran-dreniny dia i Abỳ zanakavavin’i Zakarià.

³Ary nanao izay mahitsy eo imason’ny TOMPO i Hezekià tahaka izay rehetra nataon’i Davida razambeny.

⁴Izy no nanafoana ny toeram-panasinana sy nanamontsana tsangambaton-tsampy sy nikapa ny tsatokazo fanajana an’i Aserà ary nanorotoro ny bibilava halimo izay nataon’i Mosesy[109]; satria hatramin’io fotoana io no efa nandoroan’ny Israelita ditin-kazo manitra ho an’ilay bibilava nantsoina hoe Nehostana.

⁵Fa ny TOMPO Andriamanitr’i Israely no nitokian’i Hezekià, ka dia tsy nisy tahaka azy tamin’ny mpanjakan’i Joda rehetra izay talohany sy izay nandimby azy.

⁶Nifikitra tamin’ny TOMPO izy ka tsy mba niala taminy, fa nitandrina ny didy izay nomen’ny TOMPO an’i Mosesy.

⁷Dia niaraka tamin’i Hezekià ny TOMPO, ka nampahomby izay rehetra nataony. Nikomy tamin’ny mpanjakan’i Asiria izy ka tsy nety hofeheziny intsony.

⁸Nandresy ny Filistinina izy ka nanenjika azy hatrany amin’ny faritr’i Gazà[110]; ary azony avokoa na ireo tilikambom-pitiliana na ireo tanànamimanda.

⁹Tamin’ny taona fahefatra nanjakan’i Hezekià, izany hoe tamin’ny taona fahafito nanjakan’i Hôsea zanakalahin’i Elà tamin’i Israely, no nahatongavan’i Salmanesera mpanjakan’i Asiria hanao fahirano an’i Samaria.

¹⁰Azon’ny Asirianina ny tanàna nony afaka telo taona, izany hoe tamin’ny taona fahenina nanjakan’i Hezekià na tamin’ny taona fahasivy nanjakan’i Hôsea.

¹¹Ary nentin’ny mpanjakan’i Asiria ho babo tany Asiria ny Israelita ka napetrany tao amin’i faritr’i Halà sy tao Gôzàna teo amoron’ny ony Habôra ary tao amin’ireo tanànan’i Media[111].

¹²Tonga izany rehetra izany noho ny tsy nihainoan’ny Israelita ny feon’ny TOMPO Andriamaniny ary noho ny nivadihany tamin’ny fanekempihavanana; tsy nohenoiny sady tsy nampihariny manko ny didy rehetra izay nampitain’i Mosesy mpanompon’ny TOMPO.

¹³Tamin’ny taona[112] faha-14 nanjakan’i Hezekià no nahatongavan’i Saneherîba mpanjakan’i Asiria hanafika ny tanànamimanda rehetra tao amin’ny fanjakan’i Joda ka nahazoany ireny.

¹⁴Ary naniraka olona nankany amin’ny mpanjakan’i Asiria tany Lakisy i Hezekià mpanjakan’i Joda nanao hoe: — Efa diso aho[113], mialà amin’ny taniko, fa hozakaiko izay hampandoavinao ahy. Koa nampandoa volafotsy sivy taonina sy volamena sivinjato kilao an’i Hezekià ny mpanjakan’i Asiria.

¹⁵Dia nomen’i Hezekià azy ny volafotsy rehetra tao an-tranon’ny TOMPO sy tao amin’ny rakitry ny lapan’ny mpanjaka.

¹⁶Tamin’izany fotoana izany no nanendahan’i Hezekià ny takela-bolamena napetany tamin’ireo varavaran’ny tempolin’ny TOMPO sy tamin’ireo tolana; ary dia nomeny ny mpanjakan’i Asiria izany.

¹⁷Ary ny mpanjakan’i Asiria izay tany Lakisy dia naniraka ny filohan-tafika sy ny lehiben’ireo manamboninahitra ary ny dekàny notronin’ny miaramila marobe hankany amin’i Hezekià mpanjaka, any Jerosalema. Raha vao tonga tany Jerosalema ireto iraka, dia nijanona takaikin’ny lakan-drano mankany amin’ny dobo ambony, teo amin’ny lalana mankamin’ny sahan’ny Mpanasa lamba[114],

¹⁸ka nangataka hiresaka amin’ny mpanjaka. Kanjo dia i Eliakima zanakalahin’i Hilkià sady mpiandraikitra ny lapa no niainga hitsena azy niaraka tamin’i Sebnà mpitantsoratra sy i Jôà zanakalahin’i Asafa sady mpitondratenin’ny mpanjaka.

¹⁹Dia hoy ilay dekà tamin’izy telo lahy: — Ndeha lazaonareo amin’i Hezekià ny hafatry ny mpanjaka lehibe, dia ny mpanjakan’i Asiria, manao hoe: «Mba inona izao itokianao izao?

²⁰Heverinao fa ho vitan’ny kobaka am-bava ny tetika sy herimpo hoenti-miady! Koa iza no itokianao no mba sahy mikomy amiko izato ianao?

²¹I Ejipta ve? Io volotara vaky manindrona sy mandrobaka ny tanan’izay mitehina aminy io ve? Fa toy izany ny Farao mpanjakan’i Ejipta amin’izay rehetra matoky azy!

²²«Angamba ianareo hamaly ahy fa ny TOMPO Andriamanitrareo no itokianareo. Kanefa dia ianao indrindra, ry Hezekià, no nanafoana ireo toeram-pisoronana aman’alitarany, ka nandidy ny mponin’i Joda sy i Jerosalema mba tsy hanao fanompoam-pivavahana afa-tsy eo anoloan’ny alitaran’i Jerosalema ihany.»

²³«Koa aoka hifanamby amin’ny andriamanjakan’i Asiria izay tompoiko ianao, fa homeko soavaly roa arivo raha manana olona afaka hitaingina ireo.

²⁴Fa hataonao ahoana no hampandositra ny komandy iray amin’ireo manamboninahitry ny tompoko ireo, na dia izay bitika indrindra aza, raha tàhiny ka i Ejipta no itokianao hahazoana kalesy sy mpitaingin-tsoavaly?

²⁵Ary ankehitriny, moa hamely sy handrava ity tany ity ve ilay mpanjaka tompoiko, raha tsy sitraky ny TOMPO izany? Tsia, fa ny TOMPO mihitsy no nanome baiko azy hamely sy handrava ity tany ity[115].

²⁶Dia hoy i Eliakima sy i Sebnà ary Jôà tamin’ilay dekà asirianina: — Mba teny aramianina[116] re atao aminay, satria azonay ihany izany; fa aza itenenana hebreo izahay noho ny amin’ireo olona eny ambony manda mihaino antsika.

²⁷Fa hoy ny navalin’ilay dekà hoe: — Moa ho an’ny tomponareo sy ho anareo ihany va no nanirahan’ny tompoko ahy hilaza izany teny izany, fa tsy ho an’ny olona mipetraka eny ambony manda koa? Fa ho voatery tahaka anareo izy atsy ho atsy hihinana ny dikiny sy hisotro ny fivalanan-dranony[117]!

²⁸Dia nijaridina ilay dekà ka nihiaka mafy tamin’ny teny hebreo hoe: — Henoy ny tenin’ny mpanjaka lehibe, dia ny mpanjakan’i Asiria,

²⁹fa izao no lazainy: «Aza mety hofitahin’i Hezekià ianareo, satria tsy afaka hamonjy anareo izy tsy akory.

³⁰Ary aza mety hotarihiny hitoky amin’ny TOMPO koa ianareo raha ilazany fa ny TOMPO no hamonjy anareo ka hisakana ahy tsy haka ity tanàna ity.

³¹Aza mihaino an’i Hezekià ianareo, fa izaho mpanjakan’i Asiria kosa miteny aminareo hoe: Manaova fanekempihavanana amiko ianareo ary samia mibaboka atỳ amiko; dia samy hihinana ny voalobony sy ny aviaviny, ary samy hisotro ny rano avy ao amin’ny lava-pantsakany avy.

³²Ho avy aho atsy ho atsy hitondra anareo ho any amin’ny tany tahaka ny anareo, dia tany be varimbazaha hanaova-mofo sy tany be voaloboka hanaovan-divay ary tanin’ôliva tsara diloilo sy tantely. Dia ho velona ianareo amin’izany fa tsy ho faty. Koa aza mihaino an’i Hezekià fa atorony voho ianareo raha ilazany fa hamonjy anareo ny TOMPO!

³³Moa nisy nahavonjy ny taniny tsy hiharan’ny fahefàko ve ireo andriamanitry ny firenen-kafa?

³⁴Aiza ny andriamanitr’i Hamata sy i Arpada? Ary aiza koa ny andriamanitr’i Sefarvaîma sy i Henà ary i Hivà? Moa nahavonjy an’i Samaria tsy ho azoko ve ireo andriamaniny[118]?

³⁵Tsy nisy tamin’ireny andriamanitra rehetra ireny, na dia iray aza, nahavonjy ny taniny tsy hiharan’ny fahefàko; koa ahoana ny TOMPO koa tsy hahavonjy an’i Jerosalema tsy hiharan’ny fahefàko»

³⁶Nangina ny vahoaka ary tsy nisy namaly na dia indraim-bava aza, satria efa nanome baiko ny mpanjaka hoe: «Aza misy mamaly azy ianareo!»

³⁷Ary rehefa nandriatra ny fitafiany i Eliakima mpiandraikitra ny lapa sy i Sebnà mpitantsoratra ary i Jôà zanakalahin’i Asafa sady mpitondratenin’ny mpanjaka, dia nankao amin’i Hezekià ka nitatitra taminy ny tenin’ilay dekà asirianina.