Read Dikateny Iombonana Eto Madagasikara 2 Mpanjaka 2 Bible Online

2 Mpanjaka 2 - Dikateny Iombonana Eto Madagasikara bible

2 Mpanjaka 2

¹Rehefa hakarin’ny TOMPO any an-danitra ao anatin’ny tadio i Elià, dia niala tao Gilgala niaraka tamin’i Elisà.

²Ary hoy i Elià tamin’i Elisà: — Mijanòna eto re ianao, fa irahin’ny TOMPO hankany Betela aho. Fa novalian’i Elisà hoe: — Velona ny TOMPO ary velona ny ainao, koa mianiana aho fa tsy handao anao! Dia niaraka nankany Betela izy mianaka.

³Fa niainga nankany amin’i Elisà ny andia-mpaminany tao Betela ka nanontany azy hoe: — Fantatrao va fa anio no hanesoran’ny TOMPO ity mpampianatrao ho lavitry ny tenanao? Dia hoy ny navaliny azy: — Eny, fantatro koa izany fa mangina ianareo!

⁴Ary hoy indray i Elià tamin’i Elisà: — Mijanona eto re ianao, ry Elisà, fa irahin’ny TOMPO hankany Jerikao aho. Fa novaliany hoe: — Velona ny TOMPO ary velona ny ainao, koa mianiana aho fa tsy handao anao! Dia niaraka nankany Jerikao izy mianaka.

⁵Fa nanatona an’i Elisà ny andia-mpaminany tao Jerikao ka nanontany azy hoe: — Fantatrao va fa anio no hanesoran’ny TOMPO ity mpampianatrao ho lavitry ny tenanao? Dia hoy ny navaliny azy: — Eny, fantatro koa izany fa mangina ianareo!

⁶Ary hoy indray i Elià tamin’i Elisà: — Mijanona eto re ianao, fa irahin’ny TOMPO hankany Jôrdàna aho. Fa novaliany hoe: — Velona ny TOMPO ary velona ny ainao, koa mianiana aho fa tsy handao anao! Dia niara-nandeha izy mianaka.

⁷Nisy mpaminany dimampolo nanaraka lavidavitra an’i Elià sy i Elisà izay nijanona teo amoron’i Jôrdàna.

⁸Nalain’i Elià ny akanjobeny, dia nahorongorony ary nikapohany ny rano. Dia nisaraka roa ilay rano ka nita tamin’ny tany maina izy mianaka.

⁹Rehefa samy tafita izy, dia hoy i Elià tamin’i Elisà: — Angataho izay tianao hataoko aminao mialoha ny hanesorana ahy ho lavitra anao. Ary hoy i Elisà: — Mba te hahazo anjara roa amin’ny fanahinao re aho.

¹⁰Fa hoy kosa i Elià: — Zava-tsarotra no angatahinao, kanefa raha voajerinao aho amin’iny hoesorina hiala aminao iny, dia ho azonao tokoa izany; fa raha tsy voajerinao kosa aho, dia tsy ho azonao izany.

¹¹Ary raha mbola nanohy dia sy niresaka iny izy mianaka, dia indro nisy kalesy afo sy soavaly afo nampisaraka azy mianaka; ary i Elià dia nakarina tao anaty tadio ho any ana habakabaka any.

¹²Rehefa nijery izany i Elisà, dia niantsoantso hoe: — Ry dada ô, ry dada ô, mahery noho ireo kalesin’i Israely sy ny mpitaingin-tsoavaliny ianao[5]! Nony tsy hitan’i Elisà intsony i Elià, dia notriariny roa ny fitafiany.

¹³Ary nalainy ny akanjobe izay nilatsaka avy teny an-tsorok’i Elià[6]; dia niverina izy ka nitsangana teo amoron’i Jôrdàna.

¹⁴Noraisin’i Elisà ilay akanjoben’i Elià ka nikapohany ny rano, sady nihiaka izy hoe: — Aiza ny TOMPO Andriamanitr’i Elià? Aiza Izy? Mba nikapoka ny rano koa i Elisà, dia nisaraka roa izany ary niampita izy.

¹⁵Raha nahita izay nataon’i Elisà avy teny lavidavitra teny ny andia-mpaminanin’i Jerikao, dia nanao hoe: «Efa mipetraka amin’i Elisà ny fanahin’i Elià.» Ary lasa nitsena an’i Elisà ireo ka niankohoka nitehi-tany teo anatrehany,

¹⁶ary nanao taminy hoe: — Manana lehilahy maherifo dimampolo izahay mpanomponao; koa aoka ireo handeha hitady ity mpampianatrao, fandrao naingain’ny Fanahin’ny TOMPO izy, ka nazerany any an-tendrombohitra na any an-dohasaha any. Fa notenenin’i Elisà ny andia-mpaminany mba tsy haniraka.

¹⁷Nefa mbola nikiry mafy izy, ka farany dia nanaiky ihany i Elisà. Dia naniraka ireto maherifo dimampolo lahy izy mba hitady an’i Elià nandritra ny telo andro nefa tsy nahita azy.

¹⁸Mbola tao Jerikao ihany i Elisà no tafaverina ireo ka nitenenany hoe: — Tsy efa nilazako ve ianareo mba tsy handeha hitady azy?

¹⁹Ary hoy ny mponin’i Jerikao tamin’i Elisà: — Araka izao ahitanao azy izao, tompoko, dia tsara toerana ity tanàna ity; saingy ratsy ny rano ary tsy mahavokatra ny tany.

²⁰Dia hoy i Elisà hoe: — Itondray sira amin’ny lovia vaovao aho. Dia nitondrana izany izy.

²¹Ary niainga nankany amin’ilay loharano i Elisà, dia nanipy sira tao sady niteny hoe: — Izao no lazain’ny TOMPO: «Efa nodioviko ity rano ity, ka tsy hahatonga fahafatesana na tsy fahavokarana intsony izy.»

²²Koa dia nitoetra ho madio mandraka ankehitriny ny rano araka ny nambaran’i Elisà.

²³Avy tao Jerikao i Elisà, dia niakatra hankany Betela. Teny an-dalana anefa dia nisy ankizilahy nivoaka ny tanàna ka nanaraby azy hoe: — Miakara, ry Lesola! Miakara, ry Lesola!

²⁴Dia nitodika i Elisà nijery azy ka nanozona azy tamin’ny anaran’ny TOMPO. Ary nisy orsa roa nivoaka avy tany an’ala namiravira ny 42 tamin’ireo ankizy ireo.

²⁵Dia niala teo i Elisà ka dia nankany an-tendrombohitra Karmela, ary avy tao no niverenany ho any Samaria.